Ezaya 50:1-11
50 Yeova walanda wati:
“Uzye kalata wa kutaanilapo wakwe mayo winu wino nazinga, ali kwi?
A kuli weni pali yano nakongolako wino namukazizyeko?
Lolini! Mwasenzilwe umu uzya pa mulandu ni membu zinu,Nupya pa mulandu nu kuluvyanya kwinu alwani inu yazinzile mayo winu.
2 U mulandu ci uno ntazaniile ali wensi lino nizile?
U mulandu ci uno kutaali ali wensi uwa kwasuka lino namile?
Uzye ikasa lyane iliipi sana ilyakuti litanga limukulule,Nanti uzye ntakweti maka yakumupususya?
Nkakalipila yemba suka apwa;Nkalenga inguzi iziya wa lwanga.
Inswi izyayamo zikafwa pa mulandu wa kuulizya manzi,Nupya zikaola.
3 Nkalenga mayulu iyaya imfinziNu kuyavimba ni cakuzwala ca kulangilamo ulanda.”
4 Umwene wa Papelapela Yeova wampeela ululimi lwa yantu asambilile,Pakuti ningamanya ivya kwasuka atonte ukuomvya mazwi ya cumi.
Akanzyula cila katondo;Nu kuyula matwi yane pakuti nakutika wa yantu asambiliziwe.
5 Umwene wa Papelapela Yeova wayuzile matwi yane,Nupya ntapondwike.
Ntafumile umu nzila yakwe.
6 Ntafisile itundu lyane kuli yano yangumangaNanti ukufisa matama yane kuli yano yanjipulanga ivilezu.
Ntafisile icinso cane kuli yano yantukanga nanti kuli yano yanswilanga amati.
7 Lelo Umwene Uwa Papelapela Yeova alangazwa.
Ali mulandu uno ntaluvwila insonyi.
Ali mulandu uno ndayela umukome,Nupya namanya ukuti ntalazewana.
8 Aakalanda pali nene ukuti nene mulungami ali umupiipi.
A weni angampeela umulandu?
Lekini aize twimilile swensi pakuti yatupingule.
A weni aakweti umulandu nani?
Lekini aize antooke.
9 Umwene wa Papelapela Yeova alangazwa.
A weni aalampeela umulandu?
Yonsi yalasila wa cakuzwala.
Utupepelya utukalya ivyakuzwala tulayalya.
10 A weni pali mwemwe akatiina YeovaNu kukutika ukwi zwi lya muomvi wakwe?
A weni uwatala wapitapo umu kaanda umwaula uluswepo?
Lekini ataile umwi zina lyakwe Yeova nu kusintilila pali Leza wakwe.
11 “Mwensi mwemuno mukukozya umoto,Nu kuleka kuti wapantooka,Pitangini umu luswepo lwa moto kwene uuwo,Mu nsase izikupantooka.
Vii avino ndamufulula:
Mulakwata intazi izipisye.
