Ezaya 9:1-21
9 Lelo imfinzi italaya wakwe vino yaali lino umu mpanga mwali intazi, nupya lino impanga yakwe Zebuluni ni mpanga yakwe Nafutali yasuuzilwe. Lelo pa cisila alalenga impanga ukucindikwa, kuli kuti impanga iyaya umupiipi ni nzila iya kuya kuli yemba, mu citungu ca luzi lwa Yodani, mu mpanga ya Galili umwaya antu ya mu nko.
2 Antu aapitanga umu mfinziIyalola uluswepo ulukalamba.
Na antu aakaikala umu mfinzi iipisyeLuswepo iluyakozezya.
3 Watulenga uluko ukukula;Watulenga insansa zyao zivulileko.
Yakusansamuka pa nkoleelo yakoWakwe vino antu yakasansamuka umu nsita ya kuzombola,Wakwe vino aakwankana vino iyapokolola umu ulwi yakasansamuka.
4 Watukontoola iyoko ilinyome lino yasenzile,Watukontoola umukota uwali pa viye vyao ni intuwa ya muntu uwayangalilangaWakwe vino cali umu manda ya Ina Midyani.
5 Insapato zyonsi izya mu ulwi izikatensya insiNi vyakuzwala vyonsi ivyakwata uwaziVilaya wa nkwi izya kupembela umoto.
6 Pano umwana watavyalwa kuli sweswe,Iyatupeela umwana umonsi;Nupya ukateeka ulaya pa ciye cakwe.
Alaamwa ukuti Impandamano Isuma, Leza wa Maka, Isi wa Manda pe, Cilolo wa mutende.
7 Uwene wakwe utalasilaKumwi nu mutende kwenePa cilimba ca wene cakwe Devedi nu mu wene wakwe,Uwene ulaya ukome nupya ulatwalilila ukuyakoPa mulandu nu mulinganya nu ulungami,Kufuma likwene na manda pe.
Yeova wa maumba alacita vii pa mulandu nu kucincila kwakwe.
8 Yeova watumile mazwi ya upinguzi kuli Yakobo,Nupya iyafikiliziwa kuli Izlaeli.
9 Nupya mazwi yayo yalamanyikwa uku yantu yonsiKuli kuti kuli Efulemu nu ku yantu aakaikala umu SamaliyaAakalanda cilumba cilumba ni mitumfyo iyati:
10 “Injelwa izipona,Lelo tulakuula ukuomvya mawe aaputulwe.
Miti ya misamvu yatikomwa,Lelo tulapyanikizyapo imikedali.”
11 Yeova alatumila Lezini alwani ya kumuzanzaNupya alalenga alwani yakwe Izlaeli ukuzanza zuwa,
12 Aina Silya yalafuma uku ufumondaka na Ina Filisti uku uwondaka,Yaliza yazanze Aina Izlaeli wakwe vino inyama zya mu mpanga zikazanza cino zikulonda ukulya.
Pa mulandu na ucipondoka wao, ukali wakwe utaasila,Lelo watwalilila ukukonzolola ikasa lyakwe pakuti ayakome.
13 Antu yataaswilila kuli wino wayafulwile;Yatalonda Yeova Leza wa maumba.
14 Mu wanda sile onga Yeova alaputula umutwe nu musinda wakwe IzlaeliKuli kuti cisinte ni isote ilitali mu Izlaeli.
15 Intunguluzi nu muntu mucindikwe aali mutweNupya kasesema aakalanda ivya ufi aali musinda.
16 Aakatungulula antu yaa yakayalenga ukululumba,Nupya aakatungululwa yavulunganyiziwa.
17 Aali mulandu kwene uno Yeova atalayela ni nsansa pa yana yao aonsi,Nupya atalaya nu luse uku yana ya nsiwa na ya mukamfwilwa aa yantu yaaPano yonsi kwene aasangu nupya aakacita ya viiipeYonsi yakalanda ivya uwelewele.
Pa mulandu na ucipondoka wao, ukali wakwe utaasila,Lelo watwalilila ukukonzolola ikasa lyakwe pakuti ayakome.
18 Pano uyi ukupya wa moto,Ukoca imiti ya myunga ni vikoona.
Uloca ivipuupa vya mu mpangaNupya vilafutumula icunsi ukufika nu mu makumbi.
19 Pa mulandu nu ukali wakwe Yeova wa maumbaImpanga ikupya,Nupya antu aliyo yalaya inkwi
Kusi aalapususya nanti umwinakwe.
20 Umuntu alaputula cimwi ukwi lunji icakuti alyeLelo alatwalilila ukuya ni nzala;Umuze nawe alaputula cimwi kuli cimani icakuti alyeLelo atalikuta.
Cila muntu alalya umunyefu wa kwi kasa lyakwe,
21 Manase alalya Efulemu,Efulemu nawe alalya Manase.
Lyene yonsi yalazanza Yuda.
Pa mulandu na ucipondoka wao, ukali wakwe utaasila,Lelo watwalilila ukukonzolola ikasa lyakwe pakuti ayakome.
