Ezila 1:1-11
1 Mu mwaka wa kutandikilako uwa kuteeka kwa Mwene Sailasi uwa ku Pesya, pakuti amazwi yano Yeova walanzile ukupitila muli kasesema Yelemiya yangafikiliziwa, Yeova wacincizye umwenzo wa Mwene Sailasi uwa ku Pesya ukuti amanyisye antu umu mpanga yonsi ino wateekangamo, nupya Sailasi walemvile mazwi aakuti:
2 “Umwene Sailasi uwa ku Pesya walanda wati, ‘Yeova Leza uwa kwi yulu watampeela mawene yonsi aaya pano nsi nupya watansoolola ukuti imukuulile ing’anda umu Yelusalemu mu mpanga iya Yuda.
3 Si Leza aye namwe mwensi cila muntu nupya aleke cila muntu aye umu Yelusalemu mu mpanga iya Yuda nu kuyakuula cipya cipya ing’anda yakwe Yeova Leza wa Ina Izlaeli, kuli kuti Leza wa cumi wino ing’anda yakwe yayelile umu Yelusalemu.*
4 Umwina Izlaeli wensi aakaikala umu mpanga yuze asi mulandu na kuno akaikalila lekini antu yano akaikala nayo uku ncende iiyo yamwazwilizye, ukupitila umu kumupeela siuva na goldi ni viya vyuze alino ni viteekwa kumwi nu upe wa kuitemelwa ivya kupeela uku ng’anda yakwe Leza wa cumi iyayelile umu Yelusalemu.’”
5 Lyene intunguluzi zya mu mutundu wakwe Yuda ni zya mu mutundu wakwe Benjamini na ya simapepo na Ina Levi yaipekanyizye ukuya umu kukuula cipya cipya ing’anda yakwe Yeova iyayelile umu Yelusalemu.
6 Antu yonsi yano ikalanga nayo yayatungilile ukupitila umu kuyapeela iviya vyakwe siuva na vyakwe goldi, ni viya vyuze, viteekwa, ni vintu vya mutengo ukulunda pa upe wa kuitemelwa.
7 Nupya Umwene Sailasi wafumizye iviya vya mu ng’anda yakwe Yeova vino Nebukadineza wafumizye uku Yelusalemu nu kuviika umu ng’anda yakwe leza wakwe.
8 Umwene Sailasi uwa ku Pesya walesile ukuti Mitiledati uwasunganga impiya afumye iviya vivyo, wavipenzile nu kuvipeela kuli Syesyibaza* uwatungululanga umutundu wakwe Yuda.
9 Iviya ivyapenzilwe vyali vii: mabasiketi 30 aapangilwa na goldi, mabasiketi 1,000 aapangilwa na siuva, ni viya na vyuze 29 ivyakoline na vii,
10 imbale izinono 30 izyapangilwa na goldi, imbale izinono 410 izyapangilwa na siuva, ni viya na vyuze 1,000.
11 Iviya vyonsi vyakwe goldi na siuva vyali 5,400. Syesyibaza wasenzile iviya vii vyonsi pa nsita ino aasenzilwe umu uzya uku Babiloni yaswililanga uku Yelusalemu.
Mafutunoti
^ Nanti limwi, “uwaya umu Yelusalemu.”
