Ezila 4:1-24
4 Lino alwani ya mutundu wakwe Yuda na wakwe Benjamini yuvwile ukuti aawezile umu uzya yakukuulila Yeova Leza wa Ina Izlaeli itempele,
2 lilyo kwene sile yaile kuli Zelubabeli nu ku ntunguluzi zya ndupwa nupya yalanzile iyati: “Lekini tukuule pamwi namwe pano naswe kwene tukapepa Leza winu nupya tukapeela malambo kuli aliwe ukufuma sile pano Umwene Esa-adoni uwa ku Asilya uwatulesile kuno watandikiile ukuteeka.”
3 Nomba Zelubabeli na Yesyua ni ntunguluzi zya ndupwa zya Ina Izlaeli zyonsi yalanzile iyati: “Mutalinzile ukuombela pamwi naswe kukuula ing’anda yakwe Leza witu, sweswe sile tumakuulila Yeova Leza wa Ina Izlaeli ing’anda wakwe vino Sailasi Umwene wa Ina Pesya watunenyile.”
4 Lyene antu aali umu mpanga iiya yatwalilile ukutoovola Ayuda nu kuyuvwisya intete pakuti yate ukukuula.
5 Yaalipile ya mpandamano aakuti yavulunganye mapange yao manda yonsi yano Umwene Sailasi uwa ku Pesya wateekanga kufika lino Umwene Dalyusi uwa ku Pesya watandike ukuteeka.
6 Lino Asuwelusi watandike ukuteeka, yalemvile kalata muno yapeezile antu aikalanga umu Yuda nu mu Yelusalemu mulandu wa ufi.
7 Lino Umwene Alitakisesi uwa ku Pesya watandike ukuteeka, Bisyilamu, Mitiledati, Tabeeli, na auze yakwe Tabeeli yalembiile Alitakisesi kalata; yapiliwile kalata wiyo umu Cialamaiki ukuomvya ivilembo vya Cialamaiki.
8 * Leumu umulasi umukalamba uwa uteeko na Syimusyai kalemba, yalembiile Umwene Alitakisesi kalata muno yalanzile iviipe pa yantu aikalanga umu Yelusalemu, yalemvile iyati:
9 (Yafumile kuli Leumu umulasi mukalamba uwa uteeko na Syimusyai kalemba alino na aomvi yauze asyala, kuli kuti ya kapingula, alasi yanono, ya kalemba, Aina Eleki, Aina Babiloni, antu aikalanga umu Susa, kuli kuti Aina Elamu,
10 nu ku nko zyonsi zino umwene Asenapali uwalumbwike wasenzile umu uzya nupya izikalanga umu misumba iya Samaliya, alino na yonsi aikalanga uku citungu icayelile uku mbalama ya luzi lwa Yufuleti.
11 Mazwi aali muli kalata ino yatumiile Alitakisesi aeya:)
“Ku Mwene Alitakisesi, twakulembela kalata swe yaomvi yako swemuno tukaikala uku mbalama ya luzi lwa Yufuleti:
12 Musambazi tukukumanyisya ukuti Ayuda aafuma kuli wewe yafika kuno uku Yelusalemu. Yakukuula cipya cipya umusumba uwipe nupya umwaya ya cipondoka, yakumalilila iviumba nupya yakuzifya ni mifula.
13 Musambazi umanye ukuti ndi cakuti musumba uu wakuulwa cipya cipya nupya ni viumba nga vyasila, antu yalata ukupeela imisonko, mutuulo, nanti imisonko yuze, na cii cilalenga ukuti mu vipao vya ene mutaya impiya.
14 Vino swemo ukwi sano akuno tukaliila umusilya* nupya tutanga tutemwe ukulola ivyuma vya musambazi vikononeka, acino twati tukumanyisye pali cii musambazi,
15 pakuti kungaya ukulondelezya mu vyalembwa vya mpiti vya vikolwe vyako. Nga walola umu vyalembwa vya mpiti ulazana ukuti umusumba uu u wakwe ya cipondoka, umwaya antu akatiinya aene na alasi ya mu vitungu nupya umwaya antu aakakomelezya auze ukukatukila uteeko ukufuma sile na mpiti. I calenzile nu kuti musumba uu ononwe.
16 Musambazi tukulonda umanye ukuti ndi cakuti umusumba uu wakuulwa cipya cipya nupya ndi cakuti viumba vyasila, utalakwata maka pa yantu aakaikala uku mbalama ya luzi lwa Yufuleti.”
17 Lyene Umwene Alitakisesi watumile mazwi kuli Leumu mulasi mukalamba uwa uteeko na Syimusyai kalemba, na aomvi yauze asyala aikalanga umu Samaliya na yonsi aikalanga uku mbalama ya luzi lwa Yufuleti, watumile mazwi aakuti:
“Namulamuka!
18 Yambelengela kalata ino mwatutumiile.
19 Napeezile isunde ilyakuti antu yalondelezye, nupya cazanikwe ukuti ukufuma sile na mpiti mu musumba uwo mwali antu aakatukilanga aene, alino na ya cipondoka.
20 Mu Yelusalemu mwali aene ya maka aateekanga incende yonsi iyayelile uku mbalama ya luzi lwa Yufuleti nupya antu yayapeelanga imisonko, mitulo, alino ni misonko yuze.
21 Fwandi ikini isunde ilya kulesya antu yayo ukuomba pakuti umusumba utatwalilila ukukuulwa cipya cipya kufikila lino ndikako isunde lyuze.
22 Musininkizye ukuti mwikako sana mano ukwi lyasi lii pakuti impiya zya ene zitatwalilila ukononeka.”
23 Lino sile kalata ino Umwene Alitakisesi watumile yabelenzilwe kuli Leumu na Syimusyai kalemba alino na aomvi yao yauze, lilyo kwene sile yaile uku Yelusalemu ukwali Ayuda nu kuyayalesya umulimo uku maka.
24 Fwandi umulimo wa kukuula ing’anda yakwe Leza uwaombwanga umu Yelusalemu wimilile; nupya watwalilile ukwimikwa kufika umu mwaka wakwe ciili uwa kuteeka kwa Mwene Dalyusi uwa ku Pesya.
Mafutunoti
^ Ezila 4:8 kufika uku 6:18 yalembiilwe umu Cialamaiki.
^ Nanti, “akuno tukapoka malipilo itu.”
