Ezila 5:1-17
5 Lyene kasesema Hagai na kasesema Zekaliya umwizikulu wakwe Ido, yasesime uku Yayuda aikalanga umu Yuda nu mu Yelusalemu umwi zina lyakwe Leza uwa Ina Izlaeli uwayatungululanga.
2 Pa nsita kwene iiya Zelubabeli mwana Syeatieli na Yesyua mwana Yeozadaki, yatandike ukukuula ing’anda yakwe Leza cipya cipya iyali umu Yelusalemu; ya kasesema yakwe Leza yaali nayo nupya yayatungililanga.
3 Lyene Tatenai umulasi wa ku citungu ca ku mbalama ya luzi lwa Yufuleti na Syetali-bozenai alino na aomvi yauze izile nu kuyuzya iyati: “A weni uwamuzumilizya ukukuula ing’anda yii nu kumalilila iviumba?”
4 Nupya yayuzizye iyati: “Uzye aakukuula icikuulwa cii mazina yao aaweni?”
5 Nomba Leza wali na akalamba ya Yayuda nupya yataatiile ukukuula kufikila lino mazwi yaali nu kutumwa kuli Dalyusi nu kufikila lino kalata yaali nu kuwela ukufuma kuli aliwe.
6 Yii ali kalata ino Tatenai umulasi wa citungu ca ku mbalama ya luzi lwa Yufuleti na Syetali-bozenai na aomvi yauze, kuli kuti alasi yanono, aku citungu ca mbalama ya luzi lwa Yufuleti yatumile uku Mwene Dalyusi;
7 yatumile mazwi kuli aliwe nupya yalemvile iyati:
“Ku Mwene Dalyusi:
“Mutende uye naawe!
8 Tukulonda umwene amanye ukuti twaile uku citungu ca mpanga iya Yuda uku ng’anda yakwe Leza umukalamba, nupya ing’anda ikukuulilwa na mawe akalamba, yakwika ni mbao umu viumba. Antu yakuomba zuwa zuwa umulimo, nupya umulimo ukuya pa nkoleelo pano antu yakuombesya.
9 Lyene tuzizye akalamba yao ituti, ‘A weni uwamuzumilizya ukukuula ing’anda yii nu kumalilila iviumba?’
10 Nupya tuzizye na mazina yao pakuti tukumanyisye musambazi nu kulemba mazina yakwe yano yakutungulula umulimo.
11 “Yatwaswike iyati: ‘Sweswe yaomvi yakwe Leza wi yulu ni insi, nupya tukukuula cipya cipya ing’anda iyakuuzilwe mpiti sana ino umwene umukalamba uwa Ina Izlaeli wakuuzile nu kumalilila.
12 Nomba pa mulandu wakuti ivikolwe vitu vyasosizye Leza wa kwi yulu, wavipeezile uku Mwene Nebukadineza uwa ku Babiloni Umwina Kalideya, uwatamozile ing’anda yii nu kusenda antu umu uzya uku Babiloni.
13 Nomba umu mwaka wa kutandikilako uwa kuteeka kwa Mwene Sailasi uwa ku Babiloni, Umwene Sailasi wapeezile isunde ilya kukuula cipya cipya ing’anda yii yakwe Leza.
14 Nupya Umwene Sailasi wafumizye iviya ivyali umwi tempele ilya ku Babiloni vyakwe goldi na vyakwe siuva ivya mu ng’anda yakwe Leza vino Nebukadineza wasenzile umwi tempele lya mu Yelusalemu nu kuvitwala umwi tempele lya ku Babiloni. Sailasi wapeezile Syesyibaza wino wasonsile ukuya umulasi iviya vivyo.
15 Sailasi wanenyile Syesyibaza ati: “Senda iviya vii. Ukavike umwi tempele ilya mu Yelusalemu, nupya uleke ing’anda yakwe Leza ikuulwe cipya cipya paapa kwene pano yayelile.”
16 Lyene Syesyibaza wizile nu kwika imifula iya ng’anda yakwe Leza umu Yelusalemu; nupya yatandike ukukuulwa ukufika na ndakai, nomba itasila.’
17 “Fwandi ndi cakuti cili ningo kuli we mwene, si ulondelezye muno yakasungila impiya ni vyalembwa vya mwene umu Babiloni, pakuti cimanyikwe ndi cakuti Umwene Sailasi wapeezile isunde lya kukuula cipya cipya ing’anda yakwe Leza umu Yelusalemu; nupya ututumile vino umapingulapo.”
