Ezila 7:1-28
7 Pa cisila ca vintu vii, lino Umwene Alitakisesi uwa ku Pesya watekanga, Ezila* wawezile. Ezila wali a mwana Selaya, mwana Azaliya, mwana Hilikiya,
2 mwana Syalumu, mwana Zadoki, mwana Aitubi,
3 mwana Amaliya, mwana Azaliya, mwana Melaiyoti,
4 mwana Zelaya, mwana Uzi, mwana Buki,
5 mwana Abisyua, mwana Finiasi, mwana Elieza, mwana Aloni simapepo mukalamba.
6 Ezila wafumile uku Babiloni. Waombanga umulimo wa kukopolola* uwamanyile ningo* masunde yakwe Mose yano Yeova Leza wa ina Izlaeli wayapeezile. Nupya umwene wamupeezile vyonsi vino walenzile pano Yeova Leza wakwe wali nawe.
7 Aina Izlaeli yamwi, ya simapepo, Aina Levi, ya kimba, alinzi ya pa mpongolo, na aomvi ya pi tempele* yaile uku Yelusalemu mu mwaka uwalenga 7 uwa kuteeka kwa Mwene Alitakisesi.
8 Nupya Ezila wafisile umu Yelusalemu umu mwezi uwalenga 5, umu mwaka uwalenga 7 uwa kuteeka kwa Mwene Alitakisesi.
9 Pa wanda wa kutandikilako, umu mwezi wa kutandikilako, Ezila wakatwike ukufuma uku Babiloni nupya wafisile umu Yelusalemu pa wanda wa kutandikilako umu mwezi uwalenga 5 pano Leza wakwe wali nawe.
10 Ezila wapekinye umwenzo pakuti alondelezye umu masunde yakwe Yeova nu kuyalondela, nu kusambilizya Aina Izlaeli masunde yakwe Leza nu upinguzi wakwe.
11 Yii ali kalata ino Umwene Alitakisesi wapeezile Ezila simapepo nupya kakopolola,* uwamanyile ningo sana ivya kukopolola masunde yakwe Yeova aapeezilwe uku Ina Izlaeli:
12 * “Ne Alitakisesi umwene wa ene, nakulembela Ezila simapepo, kakopolola wa masunde yakwe Leza wa kwi yulu, si umutende uye naawe.
13 Inikako isunde ilyakuti Umwina Izlaeli wensi aakaikala umu mpanga ino nkateeka kumwi na ya simapepo na Ina Levi aangaitemelwa ukupita naawe uku Yelusalemu yakukonke.
14 Pano umwene ni mpandamano zyakwe 7 yakukutuma pakuti ukalondelezye ndi cakut masunde yakwe Leza wako, yano wamanya, yakulondelwa umu Yuda nu mu Yelusalemu,
15 nupya usende siuva na goldi vino umwene ni mpandamano zyakwe iziitemelwa ukupeela kuli Leza wa Ina Izlaeli, aakaikala umu Yelusalemu,
16 nupya usende na siuva wensi na goldi vino ukapoka umu vitungu vyonsi ivya Babiloni, kumwi nu upe uno antu na ya simapepo iyaitemelwa ukupeela ku ng’anda yakwe Leza wao, iyaya umu Yelusalemu.
17 Nupya impiya zii uce ukalilemo zuwa zuwa ing’ombe, imfwele izikalamba ni zinono, kumwi nu upe wa vyakulya alino nu upe wa vyakumwa, nupya uce ukavipeelele pa ulambo wa ng’anda yakwe Leza wako umu Yelusalemu.
18 “Nupya vyonsi vino wemo na ina yako mulalola ukuti vili ningo, mukavicite ukuomvya siuva na goldi ivyasyala, kulingana nu kulonda kwakwe Leza winu.
19 Iviya vyonsi vino watupeelwa ivya kuomvya ku mulimo wa mu ng’anda yakwe Leza wako, ukavike pa nkoleelo yakwe Leza mu Yelusalemu.
20 Ivintu vyuze ivilaalondekwa umu ng’anda yakwe Leza wako vino ulaalondekwa ukupeela, uce uwaomvya impiya izya mu cipao ca ene.
21 “Ne Mwene Alitakisesi inika isunde kuli yonsi aakasunga icipao ku citungu icayela uku mbalama ya luzi lwa Yufuleti, ilya kuti consi cino Ezila simapepo kakopolola* wa masunde yakwe Leza wa kwi yulu alamulenga, muce mumupeele zuwa zuwa,
22 Mukamupeele matalanti* yakwe siuva 100, ingaano makilogilamu 16, 000, waini malita 2, 200, na mafuta malita 2, 200, alino nu musilya uwaula icipimo.
23 Lekini consi cino Leza wa kwi yulu akulonda kuti cicitike kulozya uku ng’anda yakwe ciye vivyo kwene pakuti ukali wakwe Leza utiza pa uteeko wa mwene na ana yakwe.
24 Nupya ya simapepo, Aina Levi, ya kimba, alinzi ya pa mpongolo, aomvi ya pi tempele,* na aakaombela umu ng’anda yakwe Leza, mutalinzile ukulayasonkesya imisonko, mituulo, nanti misonko yuze.
25 “Fwandi wemo Ezila kulingana na mano yano Leza wakupeela, sonta alasi ya mu vilye na ya kapingula akupingula antu yonsi aaya mu citungu icayela uku mbala ya luzi lwa Yufuleti, kuli kuti yonsi amanya masunde yakwe Leza wako nupya ulinzile ukusambilizya ali wensi aatamanya masunde yayo.
26 Nupya wensi aasikulondela masunde yakwe Leza wako, ni sunde lya mwene alinzile ukupingulwa lilyo kwene sile, kungaya u kumukoma, kumuzinga umu mpanga, kumulipilisya, nanti ukumuyalila umu cifungo.”
27 Si Yeova Leza wa vikolwe vitu alumbanyiziwe, uwacincizye umwenzo wa mwene, pakuti azifye ing’anda yakwe Yeova umu Yelusalemu.
28 Nupya walanga ukutemwa kwa cumi uku mwene na kuli ya mpandamano yakwe nu kuvilolo vya mwene vyonsi ivya maka. Fwandi nasifile pa mulandu wakuti Yeova Leza wane wali nani, nupya nakolonganike akalamba ya mu Izlaeli pakuti yapite nani.
Mafutunoti
^ Icikapiliula ukuti “Uwazwilizyo.”
^ Nanti “wali a kalemba.”
^ Nanti “vya kukopolola.”
^ Nanti “Aina Netinimu.” Mu Cialamaiki: “Aapeelwa.”
^ Nanti “kalemba.”
^ Ezila 7:12 kufika uku 7:26, yalembiilwe umu Cialamaiki.
^ Nanti “kalemba.”
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
^ Nanti “Aina Netinimu.” Mu Cialamaiki “aapeelwa.”
