Ezila 8:1-36
8 Akalamba ya ndupwa aalembesiwe ukulingana ni ndupwa zino yafumilemo, yano yafumile nani uku Babiloni pa nsita ino Umwene Alitakisesi wateekanga aeya:
2 muli ya mwana Finiasi a Gesyomu, muli ya mwana Itamali a Danieli, muli ya mwana Devedi a Hatusyi;
3 muli ya mwana Syekaniya na muli ya mwana Palosyi a Zekaliya nupya wali na onsi aalemvilwe 150;
4 muli ya mwana Pahati-moabu a Elieho-enai mwana Zelaya nupya wali na onsi 200;
5 muli ya mwana Zatu a Syekaniya mwana Yaazieli nupya wali na onsi 300;
6 muli ya mwana Adini a Ebedi mwana Yonatani nupya wali na onsi 50;
7 muli ya mwana Elamu a Yesyaya mwana Ataliya nupya wali na onsi 70;
8 muli ya mwana Syefatiya a Zebadiya mwana Mikaeli nupya wali na onsi 80;
9 muli ya mwana Yoabu a Obadiya mwana Yehiyeli nupya wali na onsi 218;
10 muli ya mwana Bani a Syelomiti mwana Josifiya nupya wali na onsi 160;
11 muli ya mwana Bebai a Zekaliya mwana Bebai nupya wali na onsi 28;
12 muli ya mwana Azigadi a Yoanani mwana Hakatani nupya wali na onsi 110;
13 muli ya mwana Adonikamu yano yali aakusyalikizya, mazina yao aeya: Elifeleti, Yeiyeli, Syemaya nupya yaali na onsi 60;
14 muli ya mwana Bigivai a Utai mwana Zabudi nupya wali na onsi 70.
15 Nayakolonganike pa luzi ulwapita uku Ahava, nupya twapangiile inkambi papa kwene pa manda yatatu. Nomba lino nalondelizye umu yantu na muli ya simapepo ntazanyilemo Aina Levi ali yonsi.
16 Fwandi natumile aakuyaama Elieza, Alyeli, Syemaya, Elinatani, Yalibu, Elinatani, Natani, Zekaliya, na Mesyulamu aatungululanga antu, na Yoyalibu na Elinatani aasambilizyanga antu.
17 Lyene nayanenyile ukulozya kuli Ido aakatungulula antu umu Kasifiya. Nayanenyile ukuti yanene Ido na ina yakwe na aomvi ya pi tempele* amu Kasifiya ukuti yalete aakuombela umu ng’anda yakwe Leza witu.
18 Pa mulandu wakuti Leza wali naswe, yatuletiile umonsi umucenjele uwa mu yana yakwe Maali umwizikulu wakwe Levi umwana wakwe Izlaeli, izina lyakwe a Syelebiya nupya wizile na ana yakwe na ina yakwe, yonsi pamwi yali 18;
19 alino na Hasyabiya nupya wali na Yesyaya uwa mu Ina Melali, wizile na ina yakwe na ana yakwe yonsi, pamwi yali 20.
20 Nupya pa yaomvi ya pi tempele* yano Devedi na ya cilolo yasonsile ukuomba umulimo wa Ina Levi paali antu 220 aalemvilwe mazina.
21 Lyene nanenyile antu ukuti yate ukulya pa luzi lwa Ahava pakuti tuicefye kuli Leza witu nu kumulenga ukuti atutungulule pa lwendo nu kutucingilila na antu itu ni vintu vitu vyonsi.
22 Nuvwile insonyi zya kulenga ukuti umwene atupeele asilika na onsi aapa mfwalasi aakutucingilila uku yalwani umu nzila pano twanenyile umwene ituti: “Leza akaya na antu aakamulonda, lelo akalanga amaka nu ukali wakwe ku yantu aasimuvwila.”
23 Fwandi twatiile ukulya nupya twalenzile uwazwilizyo kuli Leza witu nawe uvwile vino twamulenzile.
24 Lyene napaatwile ya simapepo aakalamba 12 kuli kuti Syelebiya na Hasyabiya kumwi na ina yao 10.
25 Lyene nayapimiile siuva na goldi ni viya, umusangulo uno umwene ni mpandamano zyakwe kumwi na ya cilolo yakwe alino na Ina Izlaeli yonsi aalipo yapeezile ivya kutwala uku ng’anda yakwe Leza witu.
26 Fwandi nayapimiile matalanti* yakwe siuva 650, iviya 100 vyakwe siuva ivingalingana na matalanti yaili, matalanti yakwe goldi 100,
27 imbale izinono 20 zyakwe goldi izingalingana ni mpiya zyakwe goldi 1,000 izya ku Pesya, ni viya viili vyakwe koopa ivyayengesanga, ivyalolekanga ningo wakwe goldi.
28 Lyene nayanenyile inti: “Mwemwe ya muzilo kuli Yeova ni viya i vya muzilo, nupya siuva na goldi uupe wa kuitemelwa uwa kupeela kuli Yeova Leza wa vikolwe vinu.
29 Muvisunge ningo ukufikila mukaye mukavipime umu Yelusalemu mu miputule ya kuliilamo umu ng’anda yakwe Yeova ala na ya simapepo yakalamba, Aina Levi na ya cilolo ya mu ndupwa zya Ina Izlaeli yakulolako.”
30 Nupya ya simapepo na Ina Levi yasenzile siuva, goldi ni viya vino yayapimiile pakuti yavitwale uku Yelusalemu uku ng’anda yakwe Leza witu.
31 Lyene twatandike ulwendo lwa kuya uku Yelusalemu ukufuma pa luzi lwa Ahava pa wanda uwalenga 12 umu mwenzi wa kutandikilako, nupya Leza witu wali naswe nupya watucingilile umu nzila uku yalwani nu ku vipondo.
32 Fwandi twafisile uku Yelusalemu nupya twapuzile pa manda yatatu.
33 Nupya pa wanda uwalenga 4 twapimile siuva, goldi ni viya umu ng’anda yakwe Leza witu nupya twavipeezile kuli Melemoti mwana Uliya simapepo nupya wali na Elieza mwana Finiasi na Ina Levi kuli kuti Yozabadi mwana Yesyua na Noadiya mwana Binui.
34 Vyonsi vyapenzilwe nu kupimwa, nupya yalemvile ukufina kwakwe vyonsi.
35 Yonsi aafumile umu uzya ukufuma uku Babiloni yapeezile malambo ya koca kuli Leza wa Ina Izlaeli kuli kuti ya cipambasi 12 pa Ina Izlaeli yonsi, ya suuku 96 na ya suuku anono 77 nupya yapeezile ilambo lya pa luyembu, ya saawe 12, yaa yonsi yali a malambo ya koca aapezilwe kuli Yeova.
36 Lyene twapeezile kalata wa mwene uku imilizi ya mwene nu ku yalasi aku mbalama ya Luzi Lwa Yufuleti nupya yatungilile antu nu kuyapeela vyonsi ivyalondekwanga pa ng’anda yakwe Leza wa cumi.
Mafutunoti
^ Nanti “Aina Netinimu.” Mu Ciebele: “Aapeelwa.”
^ Nanti “Aina Netinimu.” Mu Ciebele: “Aapeelwa.”
^ Italanti lyonga lyafinanga makilogilamu 34.2. Lolini Ivyeo na Vyuze pa B14.
