Ezila 9:1-15
9 Pa cisila sile lino ivintu vii vyacitika, ya cilolo izile kuli nene nu kuneena iyati: “Aina Izlaeli, ya simapepo na Ina Levi yataitalusya uku yantu ya mu nko nu ku viipe vino yakacita, kuli kuti ku Ina Kenani, ku Ina Hiti, ku Ina Pelizi, ku Ina Yebusi, ku Ina Amoni, ku Ina Moabu, ku Ina Ijipti nu ku Ina Amoli.
2 Yatwala ana akazyana aayantu ya mu nko nu kutwalizyako ana yao aonsi. Ana ya muzilo yatandika ukuvwana na antu ya mu nko. Ya cilolo na alasi aaliyo yaya pa nkoleelo umu kucita ivintu kwene vii iviipe.
3 Lino nuvwile sile vii, nalepwile icakuzwala cane ni koti lyane ilyaula makasa nu kwipula inyele zyane zimwi ni vilezu nupya nikazile pansi ala insakamala.
4 Lyene yonsi auvwile intete pa mazwi yano Leza wa Ina Izlaeli walanzile, yakolongine nu kunzinguluka pa mulandu ni viipe vino aawezile ukufuma umu uzya yacisile, nikazile ala insakamala ukufika insita ya kupeelelapo ilambo lya vyakulya ilya manguzi.
5 Lyene pa nsita ya kupeela ilambo lya vyakulya ilya manguzi nakatwike ala icakuzwala cane ni koti lyane ilyaula makasa i vilepuke, nafukiime nu kutambalika makasa kuli Yeova Leza wane.
6 Lyene napefile inti: “We Leza wane nkuvwa ni nsonyi zya kukatusya manso yane kuli wewe, imembu zitu zyatizivulisya, izitulumana ukufika na pa mwamba.
7 Ukufuma umu manda ya vikolwe vitu ukufika na ndakai imembu zitu zyakulisya nupya pa mulandu ni membu zitu, swemo, aene itu na ya simapepo tukapeelwa uku ene ya mu nko, ukukomwa, ukusendwa umu uzya, ukupokwa iviya nu kuzewana wakwe vino cili ndakai.
8 Nomba umu kasita sile kanono we Yeova Leza witu, watutulanga uluse pa kutupususya ukufuma umu uzya nu kutupeela icifulo icicingililwe icayela umu ncende yako iya muzilo pakuti manso itu yalole nupya watutukulula panono ukufuma umu uzya.
9 Nanti cakuti sweswe yazya, Leza witu atatulekelezya umu uzya nupya watulanga ukutemwa kwa cumi uku yene ya ku Pesya, watukulula pakuti tukuule ing’anda yakwe nu kukuula cipya cipya iviumba nupya watupeela iciumba ca mawe umu Yuda nu mu Yelusalemu.
10 “Uzye fwandi we Leza witu i vyani lyene vino tungalanda? Pano twata ukuvwila masunde yako,
11 yano watupeezile ukupitila umu yaomvi yako kuli kuti ya kasesema, lino walanzile uti: ‘Impanga ino mukuya umu kwikalamo i mpanga ikowele pa mulandu ni vintu vya winyi vino antu aakaikalamo yakacita, yazulamo ivintu ivikowele vino yakacita.
12 Fwandi mutaca mwatwalizyanya nayo nanti ukulonda ukupanga nayo umutende nu kulonda ivintu vyao, pakuti mukaye akome nu kuipakizya ivisuma ivyaya umu mpanga yao nu kuipoka pakuti ikaye iya yana inu manda pe.
13 Nupya pa cisila cakuti vintu vii vyonsi viza pali sweswe pa mulandu ni vintu iviipe vino twacita na vino twakuyembukila, we Leza witu, utaatupingula ukulingana nu kuluvyanya kwitu nupya watulenga swemuno tuli pano tupusuke ukufuma umu uzya.
14 Uzye nupya kwene tutame masunde yako nu kutandika ukutwalana na antu aakacita ivintu vya winyi? Uzye utalatusokela sana nu kutulovya icakuti utalasya nanti wenga pali yano yapusuka?
15 We Yeova Leza wa Ina Izlaeli, wewe mulungami pano twapusuka wakwe vino cili ndakai, fwandi utwelele pa mulandu nu kuluvyanya kwitu pano tutange twimilile kuli wewe pa mulandu nu kuluvyanya kuu.”
