Kuli Filimoni 1:1-25
1 Ne Paulo, ne mufungwa pa mulandu wakwe Klistu Yesu, na Timoti mwina witu, nakulembela we Filimoni we muomvi unji wino twatemwa,
2 alino na Afiya nkazi witu, na Akipasi musilika unji alino ni cilongano icayela mu ng’anda yako:
3 Si cikuuku cikulu nu mutende ivikafuma kuli Leza Tata witu nu ku Mwene Yesu Klistu viye namwe.
4 Lyonsi nkataizya Leza wane lino nkukulumbula mu mapepo,
5 pano nkauvwa pa utailo wako nu kutemwa kuno watemwa Umwene Yesu na amuzilo yonsi.
6 Nkapepa kuti utailo uno wakwata pamwi na ina Klistu yauzo wakulenga ukumanya ivisuma vyonsi vino twapokelela kupitila muli Klistu.
7 Mwinane nali sana ni nsansa nupya nateekeziwe pa kuvwa ukutemwa kuno waya nako, pano wakomelizye amuzilo.
8 Ukwene ali mulandu uno nanti cakuti nkweti sana untungwa uwa kukunena vino ulinzile ukucita pa mulandu wakuti nene mutumwa wakwe Klistu,
9 nkukupapata pano nakutemwa, ne Paulo umukoloci, nupya ndakai indi umu cifungo pa mulandu wakwe Klistu Yesu.
10 Nkukupapata pa mulandu wakwe Onesimasi, uwizile aya umwanane lino nali umu cifungo.*
11 Mpiti ataakweti umulimo kuli wewe, nomba ndakai akweti umulimo kuli wewe na kuli nene kwene.
12 Onesimasi wino natemwa sana, nimamuwezya kuli wewe.
13 Ningatemwa ukuti aikale kukwene pakuti aomba umulimo uno wewe waombanga uwa kunsakamala lino ncili umu cifungo pa mulandu wi lyasi lisuma.
14 Lelo nsikulonda ukucita icili consi ukwaula ukuti uzumilizye, pakuti ucite vino nkukunena umu kuitemelwa ukwaula ukupatikiziwa.
15 Limwi ali mulandu uno ataayelile naawe pa nsita inono* pakuti ungamuwezya nu kwizaya nawe manda pe,
16 ndakai asi muzya sile, lelo u mwina umutemwikwe, sana sana kuli nene, lelo kuli wewe watacila napo pano u muzya umu milimo yako nu mu milimo ya Mwene.
17 Fwandi ndi cakuti ukandola ukuti nene cuzako,* mupokelele ningo wakwe vino ungampokelela.
18 Nupya ndi cakuti kuli cino wakuluvyanyizye nanti wakukongwile icili consi, ndakulipila.
19 Ne Paulo, nkukulembela ni ikasa lyane: Ndakulipila, lelo ntalinzile nu kukunena ukuti naawe kwene umi wako i nkongole kuli nene.
20 Mwinane, si leka mpokelele uwavwilizyo kufuma kuli wewe kupitila umu Mwene; unteekezye kupitila muli Klistu.
21 Insininkizya ukuti ulacita vino nalenga, fwandi acino nakulembela pano natimanya ukuti ulacita ni vicizile pali vino nalanda.
22 Kulunda pali cico, umpekanyizizye nu mwakwikala, pano nintaila ukuti ndi cakuti yalamfumya umu cifungo pa mulandu na mapepo inu, indi nu kwiza kuli mwemwe.
23 Epafula umufungwa munji pa mulandu wakwe Klistu Yesu wakulamuka,
24 alino na aomvi yanji kuli kuti Mako, Alisitaka, Demasi, na Luka, nayo kwene yakulamuka.
25 Cikuuku cikulu ca Mwene Yesu Klistu ciye namwe pa mulandu ni miyele inu isuma.
