Kufuma 35:1-35
35 Pa cisila Mose wakolonganike Aina Izlaeli yonsi capamwi nu kuyanena ati: “Vii avino Yeova watalanda ukuti i vilinzile ukucitwa:
2 Imilimo ilinzile ukuombwa umu manda 6, lelo uwanda uwalenga 7 ulaya uwanda wa muzilo kuli mwemwe, i sabata lya kupuuza kuli Yeova. Wensi aalaomba umulimo pa wanda uwo, alakomwa.
3 Mutalinzile ukupemba umoto umu mang’anda inu yonsi pa wanda wi Sabata.”
4 Lyene Mose wanenyile Aina Izlaeli yonsi aakolongine pamwi ati: “Vii avino Yeova watalanda,
5 ‘Peelini umusangulo kuli Yeova. Lekini wensi uwaitemelwa apeele umusangulo kuli Yeova, kuli kuti goldi, siuva, koopa,
6 kotoni yakwe bulu, kotoni iyenzulukile, kotoni iyenzu, kotoni itiswe, mavumbu ya mbuzi,
7 impapa zyakwe ya suuku zino yasangula ukuya iziyenzu, impapa izitontekane ni mbao zyakwe akasya,
8 mafuta amuli ya lampi, basamu iya kupangilako mafuta ya muzilo ni vinunkile,
9 mawe yakwe onikisi, alino na mawe yauze aakwika muli efodi nu ku cakuzwala ca pa cisao.
10 “Lekini yonsi aamanyikisya imilimo muli mwemwe yace yapange vyonsi vino Yeova watalanda,
11 kuli kuti itenti lya kupepelapo ni nsalu alino ni ca kuvimbapo, tumikowelo alino na mafulemu, tumiti ututali, incesi alino nu twakwimikapo mafulemu ni ncesi;
12 Imbokosi ya upangano nu tumiti ututali, intupiko na ketani uwa kucinga;
13 tebo nu tumiti ututali alino ni viya vyonsi ni mikate ya muzilo;
14 ica kuteekapo ya lampi aakuomvya uku luswepo ni viya vya kuomvya pa ca kuteekapo ya lampi alino na ya lampi na mafuta ya kwikamo;
15 ulambo wa kocelapo ivinunkile kumwi nu tumiti ututali; mafuta ya muzilo ni vinunkile; ketani wa pa mulyango wi tenti lya kupepelapo;
16 ulambo wa kocelapo malambo kumwi na waya wakwe koopa uwa kocelapo, utumiti ututali ni viya vyonsi ivya pa ulambo; beseni ni ca kuteekapo;
17 yace yapange maketani aakucingilizya umusolo, incesi ni vya kwimikapo; ketani wa pa mulyango wa kwingilila pa musolo;
18 Impopo zya kwi tenti lya kupepelapo ni mpopo zya mu misolo kumwi ni ntambo;
19 Ivyakuzwala ivipikulwe ningo ivya kuomvya umu ncende ya muzilo, ivyakuzwala vya muzilo vyakwe Aloni simapepo, ni vyakuzwala vya yana yakwe lino yakuomba usimapepo.’”
20 Lyene Aina Izlaeli yonsi yafumile pa nkoleelo yakwe Mose.
21 Yonsi yano yaali nu mwenzo wa kuitemelwa na yonsi yano umupasi wacincizye, iizile nu kupeela umusangulo kuli Yeova uwa kuomvya ukwi tenti lya kupepelapo nu ku mulimo onsi uwa pi tenti kwene lilyo nu kuuomvya uku kupangilako ivyakuzwala vya muzilo.
22 Aonsi yonsi na anaci aali nu mwenzo wa kuitemelwa, yaatwalilile ukwiza ala yali ni viyembelo vya ku vyakuzwala, maelena, imbalaminwe,* ni viyembelo vyuze, alino ni viya ivipusanepusane ivyapangilwa na goldi. Yonsi yapeezile ivya upe vyao vyakwe goldi kuli Yeova.
23 Nupya yonsi aakweti kotoni yakwe bulu, kotoni iyenzulukile, kotoni iyenzu, kotoni itiswe, mavumbu ya mbuzi, impapa zyakwe ya suuku zino yasangula ukuya iziyenzu alino ni mpapa izitontekane, yaavilesile.
24 Yonsi aitemiilwe ukusangwilako siuva na koopa yasangwilile kuli Yeova na yonsi aakweti imbao zyakwe akasya izya kuomvya ku mulimo uli onsi uwa pi tenti lya kupepelapo, yaazilesile.
25 Anaci aacenjele umu vya kupangapanga, yapanzile kotoni yakwe bulu, iyenzulukile, iyenzu ni itiswe nupya yasangwile kuli Leza.
26 Nupya anaci yonsi aamanya ivya kupangapanga aitemiilwe, yapanzile kotoni ukuomvya mavumbu ya mbuzi.
27 Nupya intunguluzi zyalesile mawe yakwe onikisi alino na mawe yauze aakwika kuli efodi nu ku cakuzwala ca pa cisao,
28 na basamu na mafuta aakuomvya muli ya lampi nu ku kupangilako mafuta ya muzilo alino nu kupangilako ivinunkile.
29 Aonsi yonsi na anaci aitemiilwe ukupeela, yasangwilileko ku mulimo uno Yeova walanzile ukuti uombwe ukupitila muli Mose; Aina Izlaeli yalesile upe wa kuitemelwa kuli Yeova.
30 Lyene Mose wanenyile Aina Izlaeli ati: “Lolini, Yeova watasoolola Bezalele mwana Uli nupya umwizikulu wakwe Huli uwa mu mutundu wakwe Yuda.
31 Leza watamupeela umupasi wakwe, amano nu kwiluka, nupya watalenga ukuti amanye ivya kupangapanga,
32 watamanya vino ivintu vilinzile ukupangwa ukuomvya goldi, siuva na koopa,
33 watalenga nu kuti amanye ivya kuputula mawe ni vya kuyatantika, nupya watamanya ivya kupanga ivintu ivipusanepusane ukuomvya imbao.
34 Nupya Leza watalenga Bezalele na Olyabu mwana Aisamaki uwa mu mutundu wakwe Dani ukumanya ivya kusambilizya yauze.
35 Watayapeela mano aakumanya ivya kupangapanga vyonsi, kuli kuti ivya kuyemvya, ivya kupikula ukuomvya kotoni yakwe bulu, kotoni iyenzulukile, kotoni iyenzu, kotoni itiswe nu kuomba imilimo yuze yonsi iya vya kupangapanga. Aonsi yaa yalaomba imilimo ipusanepusane nu kupanga ivintu ivipusanepusane.
Mafutunoti
^ Nanti “maling’i; impete.”
