Luti 1:1-22
1 Mu manda yano ya kapingula yapingulanga, kwaponyile icipowe umu mpanga; nupya umuntu umwi wafumile uku Betelemu iya mu Yuda nu kuyaikala uku mpanga yuze ku Moabu, kumwi nu muci na ana yakwe yaili aonsi.
2 Izina lya muntu wiyo wali a Elimeleki,* umuci wakwe wali a Naomi,* nupya ana yakwe aonsi yaali a Maaloni* na Kilyoni.* Yaali Aina Efulata ukufuma uku Betelemu iya mu Yuda. Nupya yaile uku mpanga ya Moabu nu kuyaikala kuuku kwene.
3 Lino papisile insita, Elimeleki iya wakwe Naomi wafwile, nupya Naomi wasile na ana yaili.
4 Pa cisila, aonsi yayo yatwazile anaci Aina Moabu; wenga wali a Olipa, muze nawe wali a Luti. Iikazile kuuku kwene umupiipi ni myaka 10.
5 Lyene ana yaili, Maaloni na Kilyoni, nayo kwene yafwile, nupya Naomi wasiile ukwaula ana nanti iya.
6 Fwandi wakatwike na ya nyinavyala ukufuma uku Moabu nu kuswilila uku mpanga ya kumwao, pano lino wali umu Moabu, uvwile ukuti Yeova watapaala antu yakwe nupya, ukupitila umu kuyapeela ivyakulya.
7 Wafumile uku ncende ino wikalangako pamwi na ya nyinavyala yoili. Lino yapitanga umu museo ala yakuswilila uku mpanga iya ku Yuda,
8 Naomi wanenyile ya nyinavyala yonsi yoili ati: “Pitangini, cila muntu aswilile ku ng’anda kuli ya mayo yakwe. Si Yeova alange ukutemwa kwa cisinka kuli mwemwe, wakwe vino namwe mwalanga ukutemwa kwa cisinka kuli ya winu aafwa na kuli nene.
9 Si Yeova amupeele ya winu mwensi mweili pakuti mungacingililwa.” Lyene wayatonswile nupya yalizile impooma.
10 Yatwalilile ukunena Naomi iyati: “Awe, tumapita namwe uku yantu inu.”
11 Lelo Naomi walanzile ati: “Swililini yanane. U mulandu ci uno mukulonda munkonkele? Uzye ningavyala ana angaca yamutwale?
12 Swililini yanane, pitangini, pano inkota sana nupya ntanga ntwalwe. Nanti icakuti naali nu kutwalwa ilelo kwene nu kukwata ana,
13 uzye mungatwalilila ukuyalolela ukufikila yakakule? Uzye mungikala ukwaula ukutwalwa pa mulandu na aliyo? Awe yanane, nkumuvwila sana ulanda, pano Yeova watangalukila.”
14 Nupya kwene yalizile impooma, pa cisila Olipa watonswile nyinavyala nu kuswilila. Lelo Luti watwalilile ukuya na Naomi.
15 Naomi walanzile ati: “Lola! Kaci muzo waswilila uku yantu yakwe na kuli ya leza yakwe. Naawe kwene swilila.”
16 Lelo Luti walanzile ati: “Mutampatikizya ukumusya nu kuta ukumulondela; kuno mumaya akuno nani kwene nimaya, nupya kuno mumalaala akuno nani kwene nimalaala. Antu inu yalaya antu yane, na Leza winu alaya a Leza wane.
17 Kuno mulafwila akuno nani kwene ndafwila nupya kuko kwene akuno ndaziikwa. Si Yeova amfulule sana nu kucizyapo ndi cakuti cimwi campaatula kuli mwemwe ukucila apa mfwa.”
18 Lino Naomi waweni ukuti Luti wakomapo sile ukuti amukonke, watiile ukumulesya.
19 Nupya yonsi yoili yatwalilile ulwendo iyasuka iyafika uku Betelemu. Lino yafisile sile umu Betelemu, antu yonsi umu musumba yasansamwike pa kuyalola, nupya anaci yuzyanyanga yakuti: “Uzye asi Naomi wii?
20 Nawe wanenanga anaci ati: “Mutangama mukuti Naomi.* Lelo mwangama mukuti Maala,* pano Uwa Maka Yonsi watalenga ukuti inje sana nu ulanda.
21 Nakweti vyonsi lino napisile, lelo Yeova watalenga ukuti mbwele minwe. Mungangama uli ukuti Naomi, lino Yeova uwatangalukila nupya Uwa Maka Yonsi uwatandetela intazi?”
22 Vikwene avino Naomi wawezile ukufuma uku mpanga ya Moabu, kumwi na Luti nyinavyala umwina Moabu. Yafisile uku Betelemu pa nsita ya kutandika ukuzombola baale.
Mafutunoti
^ Ilikapiliula ukuti “Leza Wane U Mwene.”
^ Icikapiliula ukuti “Uwa Nsansa.”
^ Limwi lyafuma kwi zwi lya Ciebele ilikapiliula “ukutonta; ukulwala.”
^ Icikapiliula ukuti “Mutonte; Aali Apiipi nu Kufwa.”
^ Icikapiliula ukuti “Uwa Nsansa.”
^ Icikapiliula ukuti “Ulanda.”
