Isamu 104:1-35
104 Nkandumbanye Yeova.
We Yeova Leza wane, wakulisya.
Wazwala umucinzi nu lulumbi.
2 Wazwala uluswepo kwati icakuzwala;Ukavungulula mayulu wi tenti.
3 Wika incesi zya miputule yakwe iya papela pa manzi,Waleka makumbi ukuya iceleta lyakwe,Akapitila pa maapa ya muza.
4 Akalenga ya malaika yakwe ukuya sana na maka,*Na aomvi yakwe ukuya umoto uukaoca.
5 Wika insi pa mifula yaiko;Italasela kufuma pano ikala amanda pe.
6 Wavimbilikizye insi na manzi aingi kwati icakuzwala.
Amanzi yafisile na papela ya myamba.
7 Amanzi yutwike lino wayakalipile;Lino yuvwile ciunda cako ica kupangalakansya yapisile zuwa zuwa
8 Imyamba yaile papela ni mikonko nayo yaile pansiUku ncende ino wavipangiile.
9 Wavipangiile imipaka muno vyali nu kupelela,Pakuti vitaca vivimbilikizye insi nupya.
10 Akatuma utufukoka umu mikonko;Amanzi yakapita apakasi ka myamba.
11 Tufukoka tukalenga inyama zyonsi izya mu mpanga zikwate manzi;Ali muno ya punda ya mu mpanga yakamalila ulusala.
12 Ivyunyi vikapangila ivinsanzo umu miti iyayela umupipi na manzi;Vikaimba ala vili umu misambo ya miti kwene iyo.
13 Akakontelela imyamba ukufuma umu miputule yakwe iya papela.
Ivikafuma umu milimo yako vikalenga insi ukwikuta.
14 Akalenga isote lino ing’ombe zikalya ukukulaNi vimelwa vino antu yakaomvya,Akalenga ni vyakulya ukukula umu mpanga
15 Nupya akalenga ukuti kuye waini ikalenga umwenzo wa muntu ukusansamuka,Na mafuta aakalenga icinso ukuyengesa,Alino ni vyakulya ivikalenga umuntu aye na maka.
16 Imiti yakwe Yeova ikakwata amanzi aingi,Kuli kuti imikedali ya mu Lebanoni ino walemile,
17 Amuno ivyunyi vikapangila ivinsanzo.
Inkowa zikaikala umu miti ya yunipa.
18 Imyamba itali i ya mbuzi zya mu myamba;Umu vimawe ali muno ya piimbi yakafisama.
19 Wika umwezi ukuya uwa kumanyilako insita;Ni lanzi lyamanya ningo insita lino lilinzile ukuwilapo.
20 Ukaleta imfinzi, nupya ukaya usiku,Insita ino inyama zyonsi izya mu mpanga zikapitana.
21 Ana yakwe ya cisama yakalila pakuti yakwate ivyakulyaNupya yakalonda ivyakulya ukufuma kuli Leza.
22 Ilanzi nga lyatunka,Yakapita nu kuyalaala umu viwina muno yakaikala.
23 Umuntu akaya umu kuomba imilimo yakwe,Nupya akaomba ukufika manguzi.
24 Vino imilimo yako yavula, we Yeova!
Wapanga ivintu vyonsi pa mulandu na mano yako.
Insi yazulamo vintu vino waumba.
25 Kwaya yemba umukalamba sana nupya umusalale,Umwaya ivya umi vingi, ivikalamba ni vinono.
26 Papa kwene apano ivimawato vikapita,Nupya wapanzile Leviatani* ukuti amuno aizizya.
27 Vyonsi vikaloleela wewePakuti uvipeele ivyakulya pa nsita ilinge.
28 Vikakolonganika ivintu vino ukavipeela.
Nga wafumbatula iminwe yako vikakwata ivintu vingi visuma.
29 Nga wafisa icinso cako vikavulunganyiziwa.
Nga wafumyapo umupasi wa viko vikafwa nu kuswilila uku lukungu.
30 Nga watuma umupasi wako vikaumbwa,Nupya ukazifya pa musili papela.
31 Ucindami wakwe Yeova ulikalilila amanda pe.
Yeova alasansamukila umu milimo yakwe.
32 Akalola insi nayo ikasunkaana;Akalema imyamba nayo ikasuuka icunsi.
33 Ndaimbila Yeova inyimbo umi wane onsi;Ndaimba inyimbo zya kulumbanya Leza wane lyonsi lino indi nu umi.
34 Si melenganyo yane yamusansamusya.
Ndazangila muli Yeova.
35 Ayembu yalafumiziwa umu nsiNupya yatalatwalilila ukuyako.
Nkandumbanye Yeova. Lumbanyini Jah!*
Mafutunoti
^ Mu Ciebele: “Imipasi.”
^ Lolini Ulondolozi wa Mazwi.
^ Nanti “Aleluya” “Jah” iinzila iipi iya kulembelamo izina lyakuti Yeova.
