Isamu 105:1-45
-
Milimo iya cisinka ino Leza akacitila antu yakwe
105 Taizyini Yeova, lumbanyini izina lyakwe,Lekini imilimo yakwe imanyikwe uku yantu!
2 Mwimbilini, mwimbilini inyimbo zya kumulumbanya,Mwaelenganya sana pa milimo yonsi ya maka ino wacita.
3 Mwauvwa icilumba api zina lyakwe ilya muzilo.
Si myenzo yako yayo aakalonda Yeova isansamuke.
4 Londini Yeova na maka yakwe.
Mwamulonda lyonsi.
5 Mwaiusya imilimo ikalamba ino wacita,Nu kwiusya ivizungusyo vyakwe nu upinguzi,
6 Mwe yana yakwe Abulahamu umuomvi wakwe,Mwe yana yakwe Yakobo, aasoololwe yakwe.
7 A Yeova Leza witu.
Upinguzi wakwe waya umu nsi yonsi.
8 Akaiusya upangano wakwe amanda pe,Ulayo uno walavile uku nkulo masauzandi,
9 Upangano uno wapangine na Abulahamu,Nu mulapo uno walafile kuli Isaki,
10 Mulapo uno walenzile ukuti upampamikwe kuli YakoboNupya uno walenzile ukuti uye upangano wa manda pe kuli Izlaeli,
11 Lino walanzile ati: “Ndakupeela impanga ya KenaniKuti iye impanga yako iya kwikalamo.”
12 Walanzile vii ala yatatala yavula,Ala yatatala yavula nupya ala yacili aenyi umu mpanga.
13 Yalulumbanga ukufuma uku mpanga yonga ukuya uku mpanga yuze,Ukufuma uku wene onga ukuya uku wene uze.
14 Ataazumilizye umuntu ali wensi ukuyacuzya,Lelo wakalipilanga ya mwene pa mulandu wao,
15 Ala akuti: “Uku yantu yane asoololwe mutalemako,Nupya mutacita iviipe kuli ya kasesema yane.”
16 Wamile icipowe ukwiza pa mpanga;Walesizye na ayatwalilanga ivyakulya.
17 Watumile umonsi uwa kuyakoleelelaKuli kuti Jozefu, wino yakazizye umu uzya.
18 Yanyefile amakulu yakwe mu maceni,Iika ni nsingo yakwe umu vyela
19 Kufikila insita ino izwi lyakwe lizile iliya ilya cumi,Vino Yeova akalanda i vyalenzile ukuti asangululwe.
20 Umwene watumile akuyamufumya,Kateeka wa yantu wamukulwile.
21 Wamulenzile ukuya umukalamba pa ya mu ng’anda yakwe,Kuya kateeka pa vintu vyakwe vyonsi,
22 Kutungulula ya cilolo kulingana na vino akulondaNu kusambilizya akalamba mano.
23 Lyene Izlaeli waile umu Ijipti,Nupya Yakobo wikazile wa mwenyi umu mpanga yakwe Hamu.
24 Leza walenzile antu yakwe ukuvula;Wayalenzile ukuya na maka ukucila alwani yao,
25 Yano walenzile ukuti yapate antu yakwe,Nu kupanga ukucitila aomvi yakwe iviipe.
26 Watumile Mose umuomvi wakwe,Na Aloni wino wasoolwile.
27 Yacisile ivimanyililo vyakwe pali aliyo,Ni vizungusyo vyakwe umu mpanga yakwe Hamu.
28 Watumile imfinzi nupya umu mpanga mwafiisile;Yuvwilile mazwi yakwe.
29 Wasenwile manzi yao iyaya uwaziNupya wakomile inswi zyao.
30 Mu mpanga mwazuzile ya cula,Kwikako sile nu mu miputule ya mwi sano.
31 Wanenyile ivizyembele na ya unduUkuzanza incende zyonsi izyaya umu mpanga yao.
32 Walenzile imvula ya mawe ukutoonyaNupya watumile inkuwa umu mpanga yao.
33 Ononyile imyangazi yao ni miti yao iya masamvuNupya ononyile imiti ya mu mpanga yao.
34 Walanzile ukuti ya makanta yazanze,Ya makanta aamusango umwi atanga yapendwe.
35 Yaliile ivimelwa vyonsi ivya mu mpanga,Kumwi ni vilimwa.
36 Wakomile mayeli yonsi umu mpanga,Kuli kuti intandikilo yao iya uvyazi.
37 Wafumizye antu yakwe nupya yasenzile na siuva na goldi;Nupya kutaali nanti aumwi umutonte umu mitundu yao.
38 Aina Ijipti yasansamwike lino Aina Izlaeli yapisile,Pano yoopanga Aina Izlaeli.
39 Watumile ikumbi pakuti lyayacingilila
Nu moto pakuti wayakozezya umu nsita ya usiku.
40 Yalenzile nupya wayapeezile inkwale;Watwalilile ukuyapeela ivyakulya ukufuma ukwi yulu.
41 Wayuzile iciliwe nupya manzi yakonkolwike;Yakonkolwike wa luzi umu lwanga.
42 Pano wiwisye ulayo wa muzilo uno walavile Abulahamu umuomvi wakwe.
43 Wafumizye antu yakwe ala iyasansamuka,Asoololwe yakwe yapundanga ni nsansa.
44 Wayapeezile impanga zya yantu ya mu nko;Yapyanyile ivintu vino antu yauze yaculiile,
45 Pakuti yauvwila vino wayanenangaNu kulondela masunde yakwe.
Lumbanyini Jah!*
Mafutunoti
^ Nanti “Aleluya!” “Jah” iinzila iipi iya kulembelamo izina lyakuti Yeova.
