Isamu 108:1-13
Ulwimbo luno Devedi wimvile.
108 Umwenzo wane u wa cisinka, we Leza.
Ndiimba nu kupanga inyimbo nu mwenzo wane onsi.
2 Katuka we cilimba ca nsale, naawe kwene we zeeze.
Namakatusya macaca.
3 Ndakulumbanya we Yeova api umba lya yantu,Ndakwimbila inyimbo zya kukulumbaya pa yantu ya mu nko.
4 Pano ukutemwa kwako ukwa cumi u kukalamba,Kwatalimpa wa mayulu nupya ucisinka wako wafika umu lwelele.
5 Ucindamikwe pa mayulu we Leza;Si ululumbi lwako luye umu nsi yonsi.
6 Pakuti antu yano watemwa yapusuke,Tupususye ukuomvya ikasa lyako ilya kwi lunji nu kungasuka.
7 Leza watalanda muli umuzilo wakwe ati:
“Ndasansamuka pa kupeela Syekemu ukuya ica upyanyi,Nupya ndapima umukonko wa Sukoti.
8 Gilyadi u wane wakwe vino caya na kuli Manase,Na Efulemu i cisote cane;Yuda nawe iintuwa ya mukalamba wa yasilika yane.
9 Moabu a beseni wane uwa kufulalilamo.
Ndasumba indyatu zyane pali Edomu.
Ndapunda ni nsansa pano ndacimvya Filisti.”
10 A weni alantwala uku musumba uukuulililwe ni linga?
A weni alantungulula ukufika uku Edomu?
11 Uzye asi wewe we Leza wemuno watukaana,We Leza witu wemuno wata ukupita na asilika itu?
12 Twazwe umu ntazi zitu,Pano ukupususya kwa yantu u kwa sile sile.
13 Tulakwata maka pa mulandu na Leza,Nupya alalyatola alwani itu.
