Isamu 144:1-15
Lwimbo luno Devedi wimvile.
144 Si Yeova Iciliwe cane alumbanyiziwe,Aakasambilizya makasa yane ivya kulwa inkondo,Nupya wino akasambilizya iminwe yane ivya kulwa ulwi.
2 Ali kutemwa kwane ukwa cumi nupya aliwe akancingilila,Ali muno nkafisama nupya ali kapususya wane,I cisyangu cane nupya ali muno nkauwa,Aakalenga antu yano nkateeka yanguvwila.
3 We Yeova, uzye umuntu u wa cani uwakuti waikako mano,Uzye umwana wa muntu umwina kufwa u wa cani uwakuti uwasakamala?
4 Umuntu waya sile wa mupu;Manda yakwe yaya wa cinzingwa.
5 We Yeova, wezyako pansi mayulu yako nupya tentemuka;Lema imyamba nu kuleka ukuti yasuuka icunsi.
6 Leka inkuwa imyantule nu kusalanganya aalwani;Lasa inceto zyako nu kuyavulunganya.
7 Konzolola ikasa lyako ukufuma ukwi yulu;Nkulule nu kumpususya ukufuma uku manzi aingi,Mpususye uku yantu ya ku mpanga zyuze,
8 Aakalanda ivya ufiNupya aakakatusya makasa yao aakwi lunji nu kulapa ivya ufi.
9 We Leza, ndakwimbila ulwimbo ulupya.
Ndakwimbila inyimbo zya ku kulumbanya nu kukulizizya icilimba ca nsale 10,
10 Wemuno ukalenga aene ukucimvya,Nupya wemuno ukapususya Devedi umuomvi wako uku lupanga.
11 Nkulule nu kumpususya uku yantu ya ku mpanga zyuze,Aakalanda ivya ufiNupya aakakatusya makasa yao aakwi lunji nu kulapa ivya ufi.
12 Lyene ana itu alumendo yalaya wa miti iikakula zuwa,Nupya ana itu akazyana yalaya wa ncesi izya yemvya makoona yi sano.
13 Mu nkoma zitu mulazuula ivyakulya ivipusanepusane;Viteekwa vya mu mpanga itu vilasandana nu kuya masauzandi na masaunzandi.
14 Ing’ombe zitu izili na maele zitalacula pa kukwata utwana nupya zitalapulumula;Mu misolo ya mu misumba itu, mutalaya ukuloosya pa mulandu ni ntazi.
15 Ansansa aantu yano yakapokelela mapaalo yaa yonsi!
Ansansa aantu yano Yeova ali Leza wao!
