Isamu 18:1-50
Ku mukalamba wakwe ya kiimba. Lwimbo lwakwe Devedi umuomvi wakwe Yeova, uwalanzile mazwi yaa umu lwimbo luno wimbiile Yeova umu wanda uno Yeova wamupuswisye uku yalwani yakwe yonsi na kuli Saulo. Walanzile ati:
18 Nakutemwa we Yeova, wemuno ukampeela maka.
2 Yeova i ciliwe cane nupya amuno nkafisama nupya aliwe Akampususya.
Leza wane ali ciliwe cane, amuno nkafisama,I cisyangu cane nupya u lupembe* lwane ulwa kupususya,* nupya ali kacingilila wane.
3 Nkalilila kuli Yeova uwalinga ukulumbanya,Nupya alampususya uku yalwani yane.
4 Imfwa yanzingulwike kwati imyando;Antu awelewele yangofizye kwati a mulamba.
5 Imyando yi Lindi* yanzingulwike;Iviteyo vya mfwa vyali pa nkoleelo yane.
6 Lino naculanga nalilile kuli Yeova,Natwalilile ukulilila kuli Leza wane pakuti angazwe.
Uvwile izwi lyane umwi tempele lyakwe,Nupya uvwile ukulila kwane.
7 Lyene insi ni vimawe vyatandike ukutenkana;Imifula ya myamba yatandike ukuzakazaNupya yasunkananga pa mulandu wakuti yasosizye Leza.
8 Icunsi cafumanga umu mpuno zyakwe,Nu moto wafumanga umu kanwa kakwe;Na makala ya moto yafumanga kuli aliwe.
9 Walenzile mayulu ukuyongana lino watentemukanga,Nupya imfinzi ikalamba yali umwisika lya ngazo zyakwe.
10 Wakwezile pali kelubi nupya wizile ala akupapuka.
Wizile zuwa zuwa pa ciumbwa ca mupasi.*
11 Lyene waivimvile umu mfinzi,Waivimbilikizye kwati ali umwi tenti,Ukuomvya makumbi atifi nupya aatikame.
12 Kufuma umu luswepo ulwali pa nkoleelo yakweImvula ya mawe na makala ya moto vyafumile umu makumbi.
13 Lyene Yeova watandike ukupangalakansya umwi yulu;Uwa Papelapela walenzile izwi lyakwe ukuvwikaKwali ni mvula ya mawe na makala ya moto.
14 Walasile inceto nu kuyasalanganya;Nupya walesile ukuti ukumyantula kwa nkuwa kuyavulunganye.
15 Pansi yakwe yemba patandike ukuloleka;Mifula ya nsi yalolike pa mulandu nu kukalipa kwako, we Yeova,Nu mupu uwingi wafumile umu mpuno zyako.
16 Watambalike ikasa lyakwe ukufuma ukwi yulu;Wandemile nu kumfumya umu manzi aingi.
17 Wampuswisye uku mulwani wane uwa maka,Uku yantu ampata, nupya aakwatisye amaka ukuncila.
18 Izile umu kuncuzya lino nali ni ntazi,Lelo Yeova wantungilile.
19 Wantwazile uku ncende icingililwe;Wampuswisye pa mulandu wakuti wantemilwe.
20 Yeova akandambula ukulingana nu ulungami wane;Akandambula ukulingana na ukaele wane.
21 Pano natwalilila ukulondela masunde yakwe Yeova,Nupya ntaasya Leza wane.
22 Nkalondela masunde yakwe yonsi;Nupya ntalatala njasuule.
23 Ndatwalilila ukuya uwa kaele kuli Leza,Nupya ndatwalilila ukutaluka uku viipe.
24 Si Yeova akandambule ukulingana nu ulungami wane,Nu kulingana na ukaele wane kuli aliwe.
25 Ku muntu uwa cisinka ukaya ni cisinka;Nu ku muntu uwa kaele ukaya uwa kaele;
26 Ku muntu musanguluke ukaya umusanguluke,Lelo uku ncenjezi ukaya umucenjele.
27 Pano ukapususya antu aatitikiziwaLelo ukalenga aa cilumba ukuya aasuulwe.
28 Pano wewe ukankozezya lampi wane, we Yeova,Leza wane aakankozezya umu mfinzi.
29 Pa mulandu nu kwazwa kwako ningalwisya alwani;Pa mulandu na maka yakwe Leza ningatoloka iciumba.
30 Vyonsi vino Leza wa cumi akacita i vimalilike;Vino Yeova akalanda i visanguluke.
I cisyangu kuli yonsi aakafisama muli aliwe.
31 Uzye a Leza ci uwacila pali Yeova?
A Leza ci uwaya wa ciliwe ukucila Leza witu?
32 Leza wa cumi aakampeela maka,Nupya alalenga inzila yane ukuya imalilike.
33 Akalenga ingazo zyane ukuya wakwe zyakwe mpombo;Akandenga ukwimilila pasanzuke.
34 Akansambilizya ivya kulwa inkondo;Namanya ni vya kuomvya ulapwa uwapangilwa na koopa.
35 Ukampeela icisyangu cako ica kupususya,Ikasa lyako ilya kwi lunji likantungilila,Nupya ukuicefya kwako kukancindamika.
36 Ukankuzizya inzila;Nupya ntalapona.
37 Ndazinganya alwani yane nu kuyacimvya;Ntalaweluluka mpaka nkayamale yonsi.
38 Ndayalovya pakuti yatakatuka nupya;Yalaponela pa ngazo zyane.
39 Ulampeela maka ya kulwila ulwi;Ulalenga alwani yane ukupona pansi.
40 Ulalenga alwani yane ukuutuka ukufuma kuli nene,Nupya ndakoma antu aampata.
41 Yakalonda uwa kuyazwa, lelo kutaaya aakayapususya;Yakalilila kuli Yeova, lelo asiyasuka.
42 Ndayasyunola nupya yalasyala wa lukungu umu muza;Ndayasumba kwati a matipa ya mu museo.
43 Ulampususya uku yantu aakandondelezya.
Ulansonta ukuya intunguluzi pa yantu ya mu nko.
Antu yano ntamaya yalampususya.
44 Antu aku mpanga zyuze yalamfukamila;Vino yaluvwa pali nene vilalenga yanguvwila.
45 Antu aku mpanga zyuze yaluvwa intete;Yalazuka ya kuzakaza ukufuma muno yakafisama.
46 Yeova u wa umi! Lekini Leza wane uwaya wa ciliwe alumbanyiziwe!
Nupya lekini Leza wino nkapusukilamo acindikwe.
47 Leza wa cumi akandandwilako;Akalenga antu yano nkateeka yanguvwila.
48 Akampususya uku yalwani yane aakalipe;Ukantalusya kuli yano yakulonda ukunzanza pakuti yatanzanza;Ukampususya uku muntu wa unkalwe.
49 Ali mulandu uno ndakulumbanyizizya we Yeova, mu yantu ya mu nko,Nupya ndiimba inyimbo zya kulumbanya izina lyako.
50 Akacita imilimo ikalamba iya kupususya umwene wakwe;Akalanga ukutemwa kwa cumi ku musoololwe wakwe,Kuli Devedi nu ku yana yakwe manda pe.
Mafutunoti
^ Lolini Ulondolozi wa Mazwi.
^ Nanti “kapususya wane uwa maka.”
^ Mu Ciebele: “Syeo.” Lolini Ulondolozi wa Mazwi.
^ Nanti “pa maapa ya muza.”
