Isamu 19:1-14
Ku mukalamba wakwe ya kiimba. Ulwimbo luno Devedi wimvile.
19 Mayulu yakalanda pa lulumbi lwakwe Leza,Nu lwelele lukasimika imilimo yakwe.
2 Cila musanya ukalumbanya Leza,Nu usiku ukasokolola ukumanya kwakwe.
3 Visilanda, nupya vitakwata mazwi;Visiuvwika.
4 Nomba vikauvwika iciunda umu nsi yonsi,Vikauvwika ukufika na kuno insi yapeleela.
Wapangila ilanzi itenti umwi yulu;
5 Ilanzi lyaya kwati a siwinga aakufuma umu muputule wakwe;Likasansamuka kwati umuntu wa maka aakusansamuka umu lwilo lwa kucimvyanya.
6 Likatunka ukufuma uku mpela yuze iiyulu,Nupya likazinguluka ukufika uku mpela yuze;Kusi icikafisama uku cikailila ci lanzi.
7 Masunde yakwe Yeova yaya aamalilike, yakapeela amaka.
Vino Yeova akaiusyako antu yakwe vyatailwa, vikalenga umuntu aatakwata mano ukuya na mano.
8 Vino Yeova akatuneena vyaya i vilungame, vikalenga umwenzo wa muntu ukusansamuka;Masunde yakwe Yeova yaya aasanguluke, yakalenga manso ukulola.
9 Ukoopa Yeova kwasanguluka kukaikalilila manda pe.
Upinguzi wakwe Yeova u wa cumi nupya waya ulungame.
10 Vyazipa ukucila goldi,Vyacila goldi umwengululwe,Nupya vyalyompa ukucila uci, uci uukatona uku malela.
11 Vikalenga umuomvi wako ukucelulwa;Mwaya icilambu icikalamba umu kuvilondela.
12 Uzye a weni aangiluka ukuluvyanya kwakwe?
Unjelele imembu zino ntamanya.
13 Nupya uwacingilila ne muomvi wako uku vicitwa vya cilumba;Utaleka vyantungulula.
Lyene ntalaya nu mulandu,Nupya ndaya uwa kaele uku membu izipisye.
14 Si leka mazwi yane na vino nkaelenganya umu mwenzo waneVyakuzanzya we Yeova, we ciliwe cane nupya kapususya wane.
