Isamu 22:1-31
Ku mukalamba wakwe ya kiimba; Pali “Mpombo wa kaci uwa ku Macaca.” Lwimbo luno Devedi wimvile.
22 Leza wane, Leza wane, i cani cino wandekelezezya?
U mulandu ci uno utiziile umu kumpususya,Nupya u mulandu ci uno utaakuvwila ukulila kwane pa mulandu na vino nkucula?
2 Leza wane umusanya nkatwalilila ukulilila kuli wewe, nomba usingasuka;Nupya usiku nsiikala mya.
3 Lelo wewe wa muzilo,Wazingulukwa na Ina Izlaeli aakakulumbanya.
4 Ivikolwe vitu vya kutaila;Vyakutaaile nupya watwalilile ukuvipususya.
5 Vyalilile kuli wewe, nupya wavipuswisye;Vyakutaile, nupya vituvwile insonyi.
6 Lelo nemo nene mombo nupya asi nene muntu,Antu yakanseka nupya yansuula.
7 Yonsi aakandola yakantumfya;Yakanseka nupya yakapukunya imitwe ala yakuti:
8 “Waipeezile kuli Yeova. Lekini amupususye!
Lekini amupususye, pano watemwikwa sana kuli aliwe!”
9 Wewe walenzile ukuti mvyalwe,Wewe walenzile ukuti ncingililwe lino ncili nkonka.
10 Napeelwa kuli wewe kuti wansakamala ukufuma lino naviilwe;Ukufuma lino nafumile umunda yakwe mayo, wewe uli Leza wane.
11 Utataluuka kuli nene, pano intazi zili umupiipi naniNupya ntakweti muze uwa kungazwa.
12 Ya cipambasi aingi iyanzinguluka;Ya cipambasi aa maka aku Basyani iyanzinguluka.
13 Iyayula utunwa twao pakuti yanzanze,Wakwe cisama aakulila wino akusandola inyama ino watalema.
14 Nkwitululwa wa manzi;Mafupa yane yonsi iyasokomoka.
Umwenzo wane uli wi pula;Ukusunguluka.
15 Maka yane iyuma wa cinga;Ululimi ilukambatila uku vyamvu;Ukuntwala uku lukungu lwa mfwa.
16 Alwani yane iyanzinguluka kwati aa simbwa;Iyampalamila kwati iumba lyakwe ya kacita ya viipe,Yakundya makasa na makulu kwati a cisama.
17 Ningapenda mafupa yane yonsi.
Alwani yane ya kuntamba nupya ya kundolekesya.
18 Yakwankana ivyakuzwala vyane,Nupya yakupendola pa cakuzwala cane.
19 Lelo wemo, We Yeova, utataaluka kuli nene.
Wewe ukampeela maka; pitisya ngazwe zuwa.
20 Mpususye uku lupanga,Pususya umi wane ucindame uku ngala zyakwe ya simbwa.
21 Mpususye uku kanwa kakwe cisama nu ku mpembe zyakwe ya cipambasi ya mu mpanga;Ngasuke nu kumpususya.
22 Ndanena ina yane api zina lyako;Ndakulumbanya api umba lya yaomvi yako.
23 Mwemuno mukaopa Yeova mulumbanyini!
Mwe yana yakwe Yakobo mwensi, mulumbanyini!
Moopini mwe yana yakwe Izlaeli mwensi.
24 Pano ataasuula nanti ukupata ukucula kwakwe wino akacuziwa;Ataafisama kuli aliwe.
Lino walilile kuli aliwe pakuti amwazwe, wamuvwile.
25 Ndakulumbanya api umba lya yaomvi yako ilikalamba;Ndafikilizya imilapo yane pa nkoleelo yakwe yayo aakamoopa.
26 Afuuke yalalya nu kwikuta;Yayo aakalonda Yeova yalamulumbanya.
Si muipakizye umi manda pe.
27 Yonsi aakaikala umu nsi yaliusya Yeova nu kuya kuli aliwe.
Indupwa zyonsi izya mu nko zilafukama pa nkoleelo yako.
28 Pano ukateeka u wakwe Yeova;Akateeka inko zyonsi.
29 Acindame yonsi pano nsi yalalya nupya yalafukama;Yonsi aakuya uku lukungu yalamufukamila;Kusi nanti a wenga aangayapususya.
30 Indupwa zyao zilamuombela;Inkulo iikwiza yalainena pali Yeova.
31 Yaliza nu kulanda pa ulungami wakwe.
Yalanena antu aatatala yavyalwa pali vino wacita.
