Isamu 25:1-22
Lwimbo luno Devedi wimvile.
א [Aleph]
25 Niza kuli wewe, we Yeova.
ב [Beth]
2 Leza wane, nakutaila;Utaleka nzewane.
Utaleka alwani yane yasansamukile pali nene.
ג [Gimel]
3 Umu cumi kusi nanti a wenga uwa kutaila aalazewana,Lelo ukuzewana kukaloleela yayo aakafutuka auze apaula umulandu.
ד [Daleth]
4 Leka imanye inzila zyako, we Yeova;Nsambilizye inzila zyako.
ה [He]
5 Leka napita umu cumi cako nupya unsambilizye,Pano wewe Leza wane aakampususya.
ו [Waw]
Nkataila muli wewe cila wanda.
ז [Zayin]
6 Iusya uluse lwako, we Yeova, nu kutemwa kwako ukwa cumiKuno ukalanga lyonsi.
ח [Heth]
7 Utiusya imembu zino nacisile lino nali umwance na vino naluvyanyizye.
Njiusye ukulingana nu kutemwa kwako ukwa cumi,Pa mulandu nu usuma wako, we Yeova.
ט [Teth]
8 Yeova u musuma nupya u mulungami.
Ali mulandu uno akasambilizizya ayembu inzila ino yalinzile ukupitamo.
י [Yod]
9 Alatungulula afuuke ukucita ivilungame,Nupya alasambilizya afuuke ukumanya inzila yakwe.
כ [Kaph]
10 Inzila zyakwe Yeova zyonsi zyaya i zya cisinka nupya zyalingana nu kutemwa kwa cumiKuli yayo aakalondela icipangano cakwe na masunde yakwe.
ל [Lamed]
11 Pa mulandu ni zina lyako, we Yeova,Elela ukuluvyanya kwane nanti cakuti u kukalamba.
מ [Mem]
12 A weni aakaopa Yeova?
Alamusambilizya inzila ino alinzile ukusoolola.
נ [Nun]
13 Wene alakwata ivintu ivisuma,Nupya amu lupwa lwakwe yalikala umu nsi.
ס [Samekh]
14 Yayo aakaopa Yeova yakaya ya cuza yakwe,Nupya akalenga yamanye icipangano cakwe.
ע [Ayin]
15 Lyonsi nkalolekesya kuli Yeova,Pano aliwe alapususya ingazo zyane izyatizilemwa umwi sumbo.
פ [Pe]
16 Piliukila kuli nene nu kunguvwila uluse,Pano indi nenga nupya ntakweti uwa kungazwa.
צ [Tsade]
17 Intazi zya mu mwenzo wane izivulilako;Mpususye uku kucula kwane.
ר [Resh]
18 Lola ukucula kwane ni ntazi zyane,Nupya uwelele imembu zyane zyonsi.
19 Lola vino alwani yane yavulaNa vino yampata sana.
ש [Shin]
20 Cingilila umi nu kumpususya.
Utaleka nzewane, pano nkafisama muli wewe.
ת [Taw]
21 Si ukaele nu ulungami vincingilile,Pano nataila muli wewe.
22 We Leza, pususya Izlaeli uku ntazi zyakwe zyonsi.
