Isamu 30:1-12
-
Kuloosya kwaya insansa
-
Luse lwakwe Leza u lwa manda pe (5)
-
Ulwimbo lwa pa kuzevya kwa kupeela ing’anda. Ulwimbo luno Devedi wimvile.
30 Ndakulumbanya we Yeova pano watunkatusya;Utaalesile ukuti alwani yane yasansamukile pali nene.
2 We Yeova Leza wane, naliliile kuli wewe pakuti ungazwe nupya wampozizye.
3 We Yeova wankatwisye ukufuma umwi Lindi.*
Walesile intwalilile ukuya nu umi; wampuswisye pakuti ntaponela umu ciwina.
4 Imbini inyimbo zya kulumbanya Yeova mwe ya cisinka yakwe,Lumbanyini izina lyakwe ilya muzilo;
5 Pano ukali uno Leza akalanga uku muntu u wa pa kasita sile kanono,Lelo uluse luno akalanga uku muntu u lwa manda pe.
Kungaya ukuloosya manguzi lelo katondo ale kumaya insansa.
6 Lino ivintu vyanzipiile nalanzile inti:
“Ntalatala intenkanyiziwe.”
7 We Yeova, lino nali umutemwikwe kuli wewe, walenzile inje umukome wa mwamba.
Nomba lino wafisile icinso cako natandiike ukuvwa intete.
8 Natwalilile ukulilila kuli wewe we Yeova;Nupya kuli wewe we Yeova akuno natwalilile ukupaapata pakuti unguvwile uluse.
9 Uusuma ci ulimo ndi cakuti nafwa, ndi cakuti natentemukila ukwi lindi?
Uzye ulukungu lulakulumbanya? Uzye lulalanda pali ucisinka wako?
10 Si nguvwe we Yeova nupya unguvwile uluse.
We Yeova, ngazwe.
11 Watulenga ukuti inje ni nsansa ukucila ukuti naloosya;Watunzuula icakuzwala ca kulangilamo ulanda nu kunzwika insansa,
12 Pakuti ningakwimbila ulwimbo lwa ku kulumbanya na pakuti intikala mya.
We Yeova Leza wane ndakulumbanya manda pe.
Mafutunoti
^ Mu Ciebele: “Syeo.” Lolini Ulondolozi wa Mazwi.
