Isamu 35:1-28
Lwimbo luno Devedi wimvile.
35 We Yeova, mvwangileko kuli yano yakankanya;Ndwileko kuli yano yakandwisya.
2 Toola kasyangu kako kanono ni cisyangu cikalamba,Katuka pakuti uncingilile.
3 Katusya isumo lyako ni mpasa ya mu ulwi pakuti ukome yano yakunzinganya.
Unene uti: “Nene indi kapususya wako.”
4 Si leka yayo aakulonda ukunkoma yazewane nupya yaye ni nsonyi.
Si leka yayo aakulonda ukunkoma yutuke ale yali ni nsonyi.
5 Kayaye wa vipumbu ivikusendwa nu muza;Si malaika wakwe Yeova ayazinge.
6 Si nzila yao ifiite nu kutelepaLino malaika wakwe Yeova akuyazinganya.
7 Pano yanteya isumbo ukwaula umulandu;Yanjimbila iciwina ukwaula umulandu.
8 Si intazi iyaponele ukwaula ukwenekela;Si yalemye umwi sumbo lino yateya;Si yaponele umu ciwina nu kononwa.
9 Lelo nemo ndazangila muli Yeova;Ndasansamukila umu kupususya kwakwe.
10 Mafupa yane yonsi yalalanda yati:
“We Yeova a weni uwaya wakwe wewe?
Ukapususya atakweti uwakumwazwa ukufuma uku yantu ya maka,Ukapususya atakweti uwakuyazwa na apiina kuli yano yakayiyila.”
11 Ya kambone ya ufi yakaiza umu kunsinila,Yakanguzya pa vintu vino ntamanya.
12 Yakancitila iviiipe pa visuma vino nkacita,Yakalenga inayuvwa kwati imfwilwa.
13 Lelo lino yene yalwile, nazwite ivyakuzwala vya kulangilamo ulanda;Naicefizye ukupitila umu kuta ukulya,Nupya lino ipepo lyane litaswikwe,
14 Napitananga ala nkuloosya kwati nkuloosya cuza wane nanti umwina wane;Nafukiime ale indi nu ulanda wa muntu akuloosya nyina.
15 Nomba lino nacuuzile yasansamwike nupya yakolongiine;Yakolongiine pamwi iyanteyamila pakuti yanzanze;Yansandozile umu vimpilinsya nupya yatikazile mya.
16 Antu aipe yakantumfya,Yakandumanyizizya incecete.
17 We Yeova, uzye umandolekesyanga sile ukufika lilaci?
Mpususye pakuti yatankoma,Pususya umi wane ucindame kuli ya cisama.
18 Lyene ndakulumbanya api umba lya yantu aingi;Ndakulumbanyizizya pamwi na antu aingi.
19 Utaleka yano yaya alwani yane apaula umulandu yasansamukile pali nene;Utaleka ampata apaula umulandu yakonya amanso yao.
20 Pano yasilanda mazwi ya mutende,Lelo yakabepa antu ya mutende.
21 Yakayula utunwa twao pakuti yampeele imilandu,Yakalanda iyati: “Eya! Eya! Itukulola.”
22 Watulola icintu cii we Yeova. Utikala mya.
We Yeova utaya ukutali nani.
23 Zyuka nu kukatuka pakuti uncingilile,We Yeova Leza wane, mvwangileko pa milandu ino yakumpeela.
24 Mpingule ukulingana nu ulungami wako, we Yeova Leza wane;Utaleka yasansamukile pali nene.
25 Utaleka yaivwanzye yati: “Eya! Twakwata vino twalondanga.”
Utaleka yavwange yati: “Itumumila.”
26 Leka yonsi yuvwe insonyi nu kuzewana,Yayo akasansamuka pa mulandu nu kucula kwane.
Leka yonsi akasansamukila pali nene yaye ni nsonyi nu kuzewana.
27 Lelo leka yayo akasansamukila umu ulungami wane yapunde ni nsansa;Leka lyonsi yalanda yakuti:
“Si Yeova acindikwe aakasansamukila umu mutende wa yaomvi yakwe.”
28 Lyene ululimi lwane lulalanda pa ulungami wakoNu kukulumbanya uwanda onsi.
