Isamu 55:1-23
Ku mukalamba wakwe ya kiimba; ukuomvya ivilimba vya nsale. Masikiu.* Lwimbo luno Devedi wimvile.
55 Uvwa ukwi pepo lyane, we Leza,Utasuula ukupaapata kwane ukwa kulenga uwelelo.
2 Ika mano kuli nene nu kungasuka.
Ivikunsakamika vikuntosya,Nupya imvulunganyiziwa
3 Pa mulandu na vino umulwani wane akalandaAlino na vino umwipe aakampatikizya.
Pano yakancuzya sana,Nupya yampata pa mulandu nu ukali wao.
4 Mwenzo wane uli nu ulanda,Nupya intete zya mfwa izintonsya.
5 Intete nu kuzakaza iviza pali nene,Nupya ukuzakaza iikuncimvya.
6 Nkalanda ukuti: “Ndi cakuti nkwata mapa wa nkunda!
Ningapapuka nu kuyaikala uku ncende icingililwe.
7 Ningutukila ukutali.
Nupya ningaya nkaikala umu lwanga. (Selah)
8 Ningutukila zuwa zuwa uku ncende icingililweUkutaaya icimuza ni cipunga.”
9 Si yavulunganye we Yeova, uvulunganye mapange yao,Pano indola unkalwe ni cimvulunganya umu musumba.
10 Umusanya nu usiku yakapitana papela ya malinga;Nupya umu musumba mwaya intazi na antu aakaikalamo aipe.
11 Mu musumba uuwo mwaya uwononesi;Mutitikizya nu ucenjezi visitala ivifuma umu musolo wa musumba uuwo.
12 Pano asi umulwani aakantumfya;Aya umulwani ningazizimizya.
Asi umulwani aakankatukila;Aya umulwani ningamufisama.
13 Nomba a wewe we muntu wakwe nene,Cuzane wino namanya ningo.
14 Twaipakizyanga ucuza;Twapitilanga pamwi ni umba pa kuya uku ng’anda yakwe Leza.
15 Uwononesi wize pali aliyo!
Yatentemukile ukwi Lindi* apuma;Pano umu ncende zyao mwaya iviipe nu mu myenzo yao kwene.
16 Nemo ndalilila kuli Leza,Nupya Yeova alampususya.
17 Manguzi, katondo nu musanya nkacululuka nu kuteta,Nawe akauvwa izwi lyane.
18 Alampususya kuli yano yakandwisya nupya alampeela umutende,Pano maumba ya yantu yakaiza umu kundwisya.
19 Leza uwikala pa cilimba ca wene ukufuma na mpiti,Aluvwa nupya alayasuka. (Selah)
Antu aasitiina Leza,Yalakana ukusenuka.
20 Uwali cuzane mpiti wazanzile antu aali pa mutende nawe;Ononyile upangano wakwe.
21 Amazwi yakwe yatelepa ukucila umukaka utimbe,Lelo umu mwenzo wakwe mwaya ivimvulunganya.
Mazwi yakwe yatontekana ukucila mafuta,Nomba yakalipa kwati a malupanga.
22 Uwasumbila icisendo cako pali Yeova,Nawe alakwazwa.
Atalaleka umulungami ukupona.
23 Lelo we Leza, ulayasumbila umu ciwina icizike sana.
Antu aakwata umulandu wa wazi nupya acenjezi yalononwa lino yatatala yafika pakasi ka myaka ya umi wao.
Lelo nemo ndataila muli wewe.
