Isamu 58:1-11
-
Kwaya Leza aakapingula amu nsi
-
Ipepo lya kulenga ukufulula aipe (6-8)
-
Ku mukalamba wakwe ya kiimba; lwimbo ulukulanda ukuti “Utonona.” Lwimbo luno Devedi wimvile. Mikitamu.*
58 Uzye mungalanda pa ulungami lino muli mya?
Mwe yana ya yantu, uzye mungapingula umu ulungami?
2 Lelo mukacita ivisi vilungame umu myenzo inu,Mwaya nu unkalwe umu mpanga ino mukaikalamo.
3 Antu aipe yapumbuka umu nzila ukufuma pa kuvyalwa kwao;Yapumbuka nupya yakabepa ukufuma sile lino yaviilwe.
4 Usungu wao waya wa usungu wa nzoka;Yapalila kwati a ngosye uwatacilika matwi.
5 Asiuvwa ukwi zwi lya yantu aakaomvya imilembo ya nzoka,Asi mulandu na vino antu yayo yamanyikisya imilembo.
6 We Leza sokola amino umu tunwa twao!
We Yeova vunola inzekete zyakwe ya cisama yaa!
7 Si yalowe kwati amanzi aakukama.
Si aomvye ulapwa wakwe nu kuyalasa ni nceto pakuti yapene.
8 Si yaye wa nyonga ikusunguluka lino ikupita;Wa mwana wino wavyalwa umufwe aasilola ilanzi.
9 Lino impoto zinu izya kwelekelamo zitatala zyuvwa icikailila ica moto wa myunga,Alapyela utumisambo utwisi kumwi nu tukupya, ukuomvya icimuza icikalamba.
10 Umulungami alasansamuka pa mulandu wa kulola icilanduzi;Ingazo zyakwe zilalyata umu wazi wa yantu aipe.
11 Lyene antu yalalanda yati: “I cumi kwene kwaya icilambu ca muntu mulungami.
Kwaya Leza aakapingula umu nsi.”
Mafutunoti
^ Lolini Ulondolozi wa Mazwi.
