Isamu 67:1-7
Ku mukalamba wakwe ya kiimba; kuomvya ivilimba vya nsale. Lwimbo.
67 Leza alatulanga icikuuku nupya alatupaala.Alaleka icinso cakwe ciwalile pali sweswe (Selah)
2 Pakuti inzila zyakwe zingamanyikwa umu nsi yonsi,Nu kupususya kwako ukumanyikwa uku nko zyonsi.
3 Si antu yakulumbanye we Leza;Si antu yonsi yakulumbanye.
4 Si antu ya mu nko yasansamuke nu kupunda ni nsansa,Pano ulapingula antu umu mulinganya.
Ulatungulula inko zya pano nsi. (Selah)
5 Si antu yakulumbanye we Leza;Si antu yonsi yakulumbanye.
6 Insi ilamezya ivimelwa;Leza witu alatupaala.
7 Leza alatupaala,Nupya antu yonsi ukufika nu ku mpela ya nsi yalamoopa.*
Mafutunoti
^ Nanti “yalamucindika.”
