Isamu 68:1-35
Ku mukalamba wakwe ya kiimba. Lwimbo luno Devedi wimvile. Lwimbo.
68 Si Leza akatuke, si alwani yakwe yasalangane.Si yayo aamupata yutuke ukufuma kuli aliwe.
2 Si yazinge wakwe vino icunsi cikaululwa;Si antu aipe yalowe pa nkoleelo yakwe Leza,Wakwe vino ipula likasunguluka uku moto.
3 Nomba si alungami yasansamuke;Yasansamuke sana pa nkoleelo yakwe Leza;Kayazange nu kusansamuka.
4 Imbilini Leza; imbini inyimbo zya kulumbanya izina lyakwe.
Imbilini aakapita umu lwanga.*
Izina lyakwe a Jah!* Sansamukini pa nkoleelo yakwe!
5 Isi wa yana ya nsiwa nupya aakacingilila ya mukamfwilwa a LezaAakaikala umu ncende yakwe iya muzilo.
6 Leza akapeela aatakweti uwa kuyazwa umwakwikala;Akasapula afungwa nu kuleka ukuti vintu vyayazipila.
Lelo antu ya cilumba* yakaikala umu mpanga iyume.
7 We Leza lino watungulwile antu yako,Lino wapisile umu lwanga, (Selah)
8 Insi yatenkanyile;Iyulu litulwile imvula pa mulandu wakwe Leza;Umwamba uu uwa Sinai watenkanyile pa mulandu wakwe Leza, Leza wa Ina Izlaeli.
9 We Leza walenzile imvula itoonye sana;Wapeezile antu yako aatonsile sana maka.
10 Iikazile umu ncende yako iya matenti;We Leza wasakamile apiina pa mulandu nu usuma wako.
11 Yeova watalanda;Anaci aakasimikila ilyasi lisuma i umba ilikulu.
12 Aene na asilika yao iyutuka!
Umwanaci aakasyala pa ng’anda nawe watasendako iviya vino iyapoka umu ulwi.
13 Nanti cakuti mwe yonsi mwalaalanga umu mbali ya moto wa nkwi,*Kulaya maapa ya nkunda aapakweko siuvaNa maapa aapakweko goldi umwengululwe.
14 Lino Uwa Maka Yonsi wasalanginye aene kuuku,Usu wa mvula waponiile umu Zalimoni.
15 Umwamba wa Basyani u mwamba wakwe Leza;Umwamba wa Basyani wakwata incende izitumpuke izingi.
16 Mwe myamba mwemuno mwakwata incende izitumpuke,U mulandu ci uno mukalolekesya nu muvimbila uku mwamba uno Leza wasoolola ukuti aikalamo?
Yeova alikala kuuku kwene manda pe.
17 Maceleta yakwe Leza aa ulwi, yaya masauzandi mintapendwa.
Yeova watafuma umu mwamba wa Sinai ukuya umu ncende ya muzilo.
18 We Jah, Leza witu wakwezile papela;Wasenzile afungwa;Wasenzile antu aizile iyaya ivya upe,Kumwi na acilumba kuti yaye pamwi nayo.
19 Si Yeova alumbanyiziwe aakatusendela ivisendo cila wanda,Leza wa cumi aakatupususya. (Selah)
20 Leza wa cumi a Leza witu aakatupususya;Nupya Yeova Umwene wa Papelapela akatupususya uku mfwa.
21 Leza alavungola imitwe ya yalwani yakwe,Umutwe wa muntu ali wensi aakatwalilila ukuya uwa mulandu.
22 Yeova walanda wati: “Ndayafumya uku Basyani;Ndayafumya pansi yakwe yemba,
23 Pakuti ingazo zinu zingalyata umu waziNa ya simbwa inu yangamyanta uwazi wa yalwani.”
24 We Leza yakalola kuno imilongo ya yantu yako, milongo ya yantu yakwe Leza wane,Umwene wane yakwingila umu ncende ya muzilo.
25 Ya kiimba yakakolela ala ya kalizya ya vilimba iyayalondela yakulizya ivilimba vya nsale;Ala pakasi pali akazyana aakulizya utungoma.
26 Lumbanyini Leza umu maumba ya yantu;Lumbanyini Yeova mwemuno mwafuma umu ntuntuko yakwe Izlaeli.
27 Kuko akuno Benjamini umunono pali yonsi akuyacimvizya,Na ya cilolo yakwe Yuda ni umba lyao ilya congo,Kumwi na ya cilolo yakwe Zebuluni na ya cilolo yakwe Nafutali.
28 Leza wako watalanda ukuti ulaya na maka.
Langa maka yako we Leza wemuno watwazwa.
29 Pa mulandu ni tempele lyako umu Yelusalemu,Aene yalaleta ivya upe kuli wewe.
30 Kalipila ivilyanyi vya mu matete,Maumba yakwe ya cipambasi na ana ya ng’ombe,Mpaka antu yakafukame lino yakuleta siuva.
Lelo akasalanganya antu aatemwa inkondo.
31 Iviya vyakwe koopa vilaletwa* ukufuma uku Ijipti;Kusyi alapeela ivya upe kuli Leza zuwa zuwa.
32 Mwe yene ya mu nsi, imbilini Leza,Imbini inyimbo zya kulumbanya Yeova, (Selah)
33 Lumbanyini uwakwela pa mayulu ya mayulu ya mpiti.
Lolini! Akapangalakansya ukuomvya izwi lyakwe.
34 Manyini amaka yano Leza wakwata.
Ucindami wakwe waya pa Ina Izlaeli,Na maka yakwe yaya umu lwelele.
35 Leza u wa kuzungusya umu ncende yakwe iya muzilo ikalamba.
A Leza wa Ina Izlaeli,Akapeela maka uku yantu.
Lumbanyini Leza.
Mafutunoti
^ Nanti limwi, “aakapita umu makumbi”.
^ “Jah” iinzila iipi iya kulembelamo izina lyakuti Yeova.
^ Nanti “ya cipondoka.”
^ Nanti limwi, “vitata vya mfwele.”
^ Nanti limwi, “inkombe ziliza.”
