Isamu 72:1-20
Lwimbo ulukulanda pali Solomoni.
72 We Leza, peela umwene upinguzi wako,Nupya peela umwana wa mwene ulungami wako.
2 Leka aapaapatilako antu yako mu ulungami,Nu kupaapatilako antu yako aapiina mu mulinganya.
3 Si myamba ilete umutende uku yantu,Nu tumyamba tulete ulungami.
4 Leka acingilile apiina,Leka apususye ana ya yapiina,Nu konona acenjezi.
5 Yalatwalilila ukukoopa wakwe vino ilanzi lilatwalilila ukuyakoNupya wakwe vino umwezi ulatwalilila ukuyako,Kuli kuti ku nkulo ni nkulo.
6 Alaya wa mvula iikatonyezya pi sote ilipupwe,Wa mvula iikankotelela insi.
7 Mu manda yakwe, alungami yalavula,Nupya kulaya sana umutende ukufikila lino kutalaya umwezi.
8 Alakwata aateekwa ukufuma kuli yemba ukufika kuli yembaNu kufuma uku Luzi* kufika kuno insi yapeleela.
9 Aakaikala umu lwanga yalamufukamila,Na alwani yakwe yalamyanta ulukungu.
10 Aene ya ku Tasyisyi na pa vilila yalalipila imisonko.
Aene ya ku Syeba na Seba yalamupeela ivya upe.
11 Aene yonsi yalamufukamila,Nupya inko zyonsi zilamuombela.
12 Pano alapususya umupiina aakuleenga uwazwilizyo,Nupya alapususya umuntu wensi umusuulwe aatakwata uwa kumwazwa.
13 Aluvwila uluse antu aasuulwe na apiina,Nupya alapususya apiina.
14 Alayapususya uku yantu aakayacuzya nu ku yankalwe,Nupya uwazi wao ulaya u wa mutengo kuli aliwe.
15 Si atwalilile ukuya nu umi nupya apeelwe goldi wa ku Syeba.
Si antu yamupepelako lyonsi,Nupya si apaalwe manda pe.
16 Umu nsi mulaya sana vyakulya;Vilavulisya kumwi na papela ya myamba kwene.
Ivizao vyakwe vilavula wa mu Lebanoni,Nupya antu yalavula umu misumba wa vimelwa vya mu nsi.
17 Si izina lyakwe litwalilile ukuyako manda pe,Si vintu vitwalilile ukumuzipila wakwe vino ilanzi lyatwalilila ukuyako.
Si antu yonsi yapaalwe pa mulandu na aliwe;Inko zyonsi zitwalilile ukulanda pali aliwe ukuti waya ni nsansa.
18 Si Yeova Leza alumbanyiziwe, Leza wa Ina Izlaeli,Wenga sile aakacita ivizungusyo.
19 Si izina lyakwe ilya lulumbi lilumbanyiziwe manda pe,Nupya ululumbi lwakwe luzuule umu nsi yonsi.
Ameni, Ameni.
20 Paa apano mapepo yakwe Devedi mwana Yese yasilila.
Mafutunoti
^ Kuli kuti, Yufuleti.
