Isamu 74:1-23
Masikiu.* Lwimbo luno Asafu wimvile.
74 We Leza, u mulandu ci uno watulekelezezya amanda pe?
U mulandu ci uno wasokela imfwele izya mu mulemvwe wako?
2 Iusya antu yako yano wasolwile mpiti sana,Umutundu uno wakulwile ukuya ica upyanyi cako.
Iusya umwamba wa Zioni, muno ukaikala.
3 Yanga uku ncende iyononwa amanda pe.
Umulwani wataonona vyonsi ivyaya umu ncende ya muzilo.
4 Alwani yakwe yakang’anza umukasi ka ncende yakwe iya kukomanilamo.
Iikamo ivipampa vyao ukuya ivimanyililo.
5 Yali wa yonsi akukomoola imiti umu mutengo ukuomvya impasa.
6 Yatamozile vyonsi vino yaomvizye umu kuyemvya umu cikulwa ca muzilo, ukuomvya impasa ni mingwala.
7 Yosile incende yako iya muzilo.
Yakowizye icikuulwa cako ica muzilo apaali izina lyako nu kuciponya pansi.
8 Yene pamwi na ana yao yalanzile umu myenzo yao iyati:
“Ivifulo vyonsi ivya kupepelapo Leza ivyaya umu mpanga vifwile ukociiwa.”
9 Kutaya ivimanyililo;Kutaya kasesema ali wensi,Nupya kusi ali wensi pali sweswe uwamanya lino ivintu vii vilasila.
10 We Leza, uzye alwani yako yalatwalilila ukuponta ukufika lilaci?
Uzye alwani yako yalatwalilila ukusaalula izina lyako amanda pe?
11 U mulandu ci uno ukuwezezya ikasa lyako ililunji?
Livungulule nu kuyalovya yonsi.
12 Lelo Leza u Mwene wane ukufuma na mpiti,Aali kapususya mukalamba umu nsi.
13 Wasunkanyizye yemba ukuomvya amaka yako;Watamozile imitwe ya vilyanyi vya pali yemba.
14 Watamozile imitwe ya ngwena;*Waipeezile uku yantu aakaikala umu lwanga ukuti yalye.
15 Wacilwile utufukoka nu tunguzi;Wakamizye inguzi izikapita lyonsi.
16 Umusanya nu usiku i vyako.
Wapanzile uluswepo ni lanzi.
17 Wewe wisile imipaka iya nsi yonsi;Wapanzile insita ya cisanya ni nsita ya mpepo.
18 Iusya vino alwani yakaponta, we Yeova,Na vino antu awelewele yakasaalula izina lyako.
19 Utapeela inkunda zyako uku vilyanyi vya mu mpanga.
Utilila amanda pe umi wa yantu yako akacuziwa.
20 Iusya upangano,Pano umu ncende zya mfinzi izyaya umu nsi u mukwikala sana antu ankalwe.
21 Leka atitikiziwa yatatoovoka;Leka aalanda na apiina yalumbanye izina lyako.
22 Si katuka we Leza uivwangile.
Iusya vino awelewele yakakuzewanya uwanda onsi.
23 Utilila vino alwani yako yakulanda.
Na vino icongo cakwe yano yakakulwisya cikuilako papela.
Mafutunoti
^ Lolini Ulondolozi wa Mazwi.
^ Mu Ciebele: “Leviatani,” cinyama icikalamba ica mu manzi icakwatisya maka.
