Isamu 9:1-20
Ku mukalamba wakwe ya kiimba; pali Mutilabeni.* Ulwimbo luno Devedi wimvile.
א [Aleph]
9 We Yeova, ndakulumbanya nu mwenzo wane onsi;Ndalanda pa milimo yako yonsi iyakuzungusya.
2 Ndasansamukila muli wewe;Ndakwimbila inyimbo zya kulumbanya izina lyako, we wa Papelapela.
ב [Beth]
3 Ndi cakuti alwani yane yutuka,Yalapumika nu kulowela pa nkoleelo yako.
4 Pano ukancingilila pakuti mpingule umu mulinganya;Ukaikala pa cilimba cako ica wene lino ukupingula umu ulungami.
ג [Gimel]
5 Wakalipila inko nu konona umwipe,Wafuuta izina lyao manda pe.
6 Alwani iyononwa manda pe;Watunukula imisumba yao,Nupya kusi aalaiusya.
ה [He]
7 Lelo Yeova wikala pa cilimba ca wene manda pe;Wakomya icilimba cakwe ica wene pano akapingwila umu mulinganya.
8 Alapingula antu aakaikala umu nsi umu ulungami;Alapingula inko mu ulungami.
ו [Waw]
9 Yeova aliwe alaya umwakufisama kuli yayo aakucuziwa,Ali mwakufisama umu nsita ya ntazi.
10 Yayo aamanya izina lyako yalakutaila;We Yeova, utalatala usye yayo aakakulonda.
ז [Zayin]
11 Mwemuno mukaikala umu Zioni lumbanyini Yeova;Manyisyini antu amu nko pa milimo yakwe.
12 Pano Leza aakalandula pa wazi wao alaiusya;Atalatala ailile ukulila kwa yantu aakucuziwa.
ח [Heth]
13 Si nguvwile uluse we Yeova, si lola vino antu ampata yakuncuzya,Wemuno ukankatusya pa mpongolo zya mfwa,
14 Pakuti manyisye antu pa milimo yako iya kuzungusya umu mpongolo zya mwana umukazyana wakwe Zioni,Nu kusansamukila umu kupususya kwako.
ט [Teth]
15 Amu nko yaponela umu ciwina cino yaimbile aineco;Ni ngazo zyao zyalemya umwi sumbo lino yaiteiile aineco.
16 Yeova wamanyikilwa kuli vino akapingula.
Umwipe walemya umu vicitwa vyakwe.
Higayoni.* (Selah)
י [Yod]
17 Aipe yalaya ukwi Lindi.*Kukwene akuno amu nko zyonsi ailila Leza yalaya.
18 Lelo antu aapina yatalililwa;Nu upalilo wa yantu aafuke utalatala ononwe.
כ [Kaph]
19 Si katuka we Yeova! Utaleka umuntu umwina kufwa acimvye.
Si antu amu nko yapingulwe pa nkoleelo yako.
20 Si leka yaye ni ntete we Yeova,Leka antu amu nko yamanye ukuti yene a ina kufwa sile. (Selah)
Mafutunoti
^ Lolini Ulondondozi wa Mazwi.
^ Lolini Ulondolozi wa Mazwi.
^ Mu Ciebele: “Syeo.” Lolini Ulondolozi wa Mazwi.
