Isamu 99:1-9
99 Yeova wataya u Mwene, si antu yonsi yazakaze.
Wikala pa cilimba ca wene papela yakwe ya kelubi, si insi isunkaane.
2 Yeova wakwatisya amaka umu Zioni,Nupya akateeka antu yonsi.
3 Si yalumbanye izina lyako ilikalamba,Pano i lya koofya nupya i lya muzilo.
4 U Mwene uwa maka uwatemwa umulinganya.
Lyonsi ukacita ivilungame.
Waleka ukuti muli Yakobo muye umulinganya nu ulungami.
5 Lumbanyini Yeova Leza witu nupya mufukame pa ngazo zyakwe,Wene u wa muzilo.
6 Mose na Aloni yaali pali ya simapepo yakwe,Nupya Samweli wali pali yayo aamanga api izina lyakwe.
Yapepanga kuli Yeova,Nawe wayasukanga.
7 Walandanga kuli aliyo ukupitila umwi kumbi.
Yasunganga vino waiusyanga na masunde yano wayapeezile.
8 We Yeova Leza witu wayaswike.
Wayeleelanga,Lelo wayafululanga pa membu zyao.
9 Lumbanyini Yeova Leza wituNupya fukamini pa nkoleelo ya mwamba wakwe uwa muzilo,Pano Yeova Leza witu u wa muzilo.
