Milimo ya Atumwa 10:1-48
10 Mu Kesaliya mwali umuntu uwi zina lyakuti Koneli, wali u mukalamba wa yasilika* umwi umba lino yamanga yakuti aina Itali.*
2 Wene pamwi na amu ng’anda yakwe yonsi yatiinanga Leza nupya wacitilanga antu ivisuma ivingi, wapepanga na mapepo ya kupaapata kuli Leza.
3 Lyene uku ma 15:00,* waweni icilolwa umwali malaika wakwe Leza wiza kuli aliwe nu kumwama ati: “Koneli!”
4 Koneli wamulolekisye ala akuvwa intete, nupya uzizye ati: “I cani Mwene?” Nawe wamwaswike ati: “Leza watauvwa mapepo yako nupya watalola vino ukaavwilizya apiina.
5 Fwandi tuma antu uku Yopa pakuti yakaame Simoni wino yakaama ukuti Petulo.
6 Umuntu wii akwikala na Simoni, kanyuka wa mpapa wino ing’anda yakwe yayela umu mbali yakwe yemba.”
7 Lino malaika uwalanzile nawe wapisile sile, Koneli wamile aomvi yakwe yaili nu musilika kapepa uwali pali yano yamuombelanga,
8 nupya wayanenyile vyonsi ivyacitiike nu kuyatuma uku Yopa.
9 Uwanda uwalondelilepo ala yacili pa lwendo nupya ala yali apiipi nu kwingila umu musumba, Petulo wakwezile api paala* uku ma 12:00* umu kupepa.
10 Lelo uvwile sana inzala nupya walondanga ukulya. Nomba lino yacili yakupekanya ivyakulya, waweni cilolwa
11 nupya waweni iyulu lyayulika ni cintu cimwi icakozile icisalu icikalamba ica makoona 4 ala cikwika pansi;
12 nupya mwali imisango yonsi iya nyama zya makuulu 4 na vyonsi ivikasela alino ni vyunyi vya mu lwelele.
13 Lyene uvwile izwi likuti: “Petulo katuka, koma ulye!”
14 Lelo Petulo walanzile ati: “Awe Mwene, ntatala nalyapo icintu icitasanguluka nupya icikowele.”
15 Lyene izwi lyamunenyile umuku wakwe ciili iliti: “Utaama ivintu vino Leza wasangulula ukuti i vikowele.”
16 Cii cacitiike umuku wakwe citatu nupya icintu cico icakozile icisalu casenzilwe umwi yulu.
17 Lino Petulo acili watapeziwa mano pali vino icilolwa cino waweni capiliulanga, aonsi yano Koneli watumile yafisile nu kuzya ukwaelile ing’anda yakwe Simoni nupya yaile iimilila pa mulyango.
18 Lyene yapunzile nu kuzya ndi cakuti Simoni wino yamanga ukuti Petulo wikalanga paapa kwene.
19 Lino Petulo acili akwelenganya pa cilolwa, umupasi wamunenyile iuti: “Lola! Aonsi yatatu yakukulonda.
20 Fwandi katuka, uwike api paala upite nayo, utatwisika nanti apanono pano nene injatuma.”
21 Lyene Petulo wisile api paala nu kuya uku yonsi yayo ayanena ati: “Umuntu wino mukulonda a nene. U mulandu ci uno mwizila?”
22 Nayo yamwaswike iyati: “Koneli umukalamba wa yasilika, u muntu umulungami nupya akatiina Leza, akasimikwa ningo umu luko lonsi ulwa Yayuda. Leza watumile malaika wa muzilo kuli aliwe nu kumunena ukuti akwame uku ng’anda ukwakwe pakuti akuvwe ivintu vino umalanda.”
23 Fwandi wayanenyile ukuti ingile nu kwikala nawe.
Lyene uwanda uwalondelilepo wapisile nayo, nupya na ina yamwi afumile uku Yopa yamulondiile.
24 Uwanda uze uwalondelilepo wafisile uku Kesaliya. Koneli wamulolelanga, nupya alanga wataama ya lupwa yakwe ni vyuza.
25 Lino Petulo wingile, Koneli wamukomenkinye afukama pa nkoleelo yakwe nu kumupeela umucinzi.
26 Lelo Petulo wamukatwisye amunena ati: “Katuka; nani kwene nene muntu sile.”
27 Lino walanzyanyanga na Koneli, wingile nu kuzana antu aingi iyakolongana.
28 Lyene wayanenyile ati: “Mwamanya ningo ukuti ukulingana ni sunde, Muyuda atalinzile ukulanda nanti ukupalama uku muntu wa mutundu uze, lelo Leza watandanga ukuti ntalinzile ukwama umuntu ali wensi ukuti ataasanguluka nanti ukuti u mukowele.
29 Acino lino yangamile, ntakanyile ukwiza. Fwandi neene umulandu uno watungamila.”
30 Lyene Koneli walanzile ati: “Amanda 4 atiyapita ukupenda ukufuma pi awala kwene lii, napepanga umu ng’anda umwane uku ma 15:00;* lyene papo kwene umuntu umwi uwazwite ivyakuzwala iviengese wizile aimilila pa nkoleelo yane
31 nu kuneena ati: ‘Koneli ipepo lyako ilyuvwika, nupya Leza wataiusya ivintu ivisuma vino ukacita.
32 Acino tuma antu uku Yopa kuti yakaame Simoni wino yakaama ukuti Petulo. Umuntu wii u mwenyi umu ng’anda yakwe Simoni kanyuka wa mpapa aakaikalila umu mbali yakwe yemba.’
33 Lyene lilyo kwene natumile aakwiza umu kukwama, nupya watucita ningo pa kwiza. Fwandi swensi tuli pano pa nkoleelo yakwe Leza pakuti tuvwe ivintu vyonsi vino Yeova watakunena ukuti ulande.”
34 Lino Petulo uvwile vivyo, walanzile ati: “Lyene nasininkizya ukuti Leza atakwata kapaatulula,
35 lelo umu nko zyonsi umuntu aakamutiina nu kucita ivisuma akapokelelwa kuli aliwe.
36 Leza watumile izwi lyakwe ukuti likasimikilwe uku yana yakwe Izlaeli; izwi lilyo i lyasi lisuma ilya mutende uukayako pa mulandu na Yesu Klistu; wikwene ali Mwene wakwe yonsi.
37 Mwamanya ilyasi lino antu yalanda sana umu mpanga yonsi iya Yudeya ukutandikila umu Galili pa cisila ca lubatizyo luno Yoani wasimikilanga:
38 pali Yesu umwina Nazaleti, na vino Leza wamupasile nu mupasi wa muzilo nu kumupeela amaka, nupya wapisile umu mpanga yonsi ala akucita ivisuma nu kupozya yonsi yano Ciwa wacuzyanga, pano Leza wali nawe.
39 Nupya sweswe ya kambone pa vintu vyonsi vino wacisile umu mpanga ya Yayuda nu mu Yelusalemu; lelo yamukomile lino yamupoopiile pa cimuti.
40 Leza wamutuutulwile pa wanda wakwe citatu nu kuleka alolekele uku yantu,
41 lelo asi uku yantu yonsi, suka kuli sweswe swemuno twaliile nu kumwa nawe lino watuutulwilwe ukufuma uku yafwe. Leza watusontiile limwi ukuya ya kambone.
42 Nupya watunenyile ukuti twanena antu nu kusimikila sana ukuti wikwene awino Leza wasonta ukuya kapingula wa yantu ya umi na afwe.
43 Ya kasesema yonsi yakalanda pali aliwe ukuti, wensi uwataila muli aliwe akaelelwa imembu kupitila umwi zina lyakwe.”
44 Lino Petulo acili akulanda pa vintu vii, mupasi wa muzilo wizile pali yonsi auvwanga amazwi yayo.
45 Nupya aina azembululwe aizile na Petulo yazungwike, pano upe wakwe Leza, kuli kuti umupasi wa muzilo wapongolwilwe na pa yantu ya mu nko kwene.
46 Pano yuvwile yakulandila umu ndimi zyuze nu kulumbanya Leza. Lyene Petulo walanzile ati:
47 “Uzye kuli ali wensi angalesya ukuti antu yaa atiyapokelela umupasi wa muzilo wakwe vino naswe twapokelela yabatiziwe umu manzi?”
48 Lino walanzile vivyo, wayanenyile ukuti yabatiziwe umwi zina lyakwe Yesu Klistu. Lyene yamulenzile ukuti aikale nayo amanda yamwi.
Mafutunoti
^ Wangalilanga asilika 100.
^ Umwi umba lilyo mwali asilika 600 aina Loma.
^ Mu Cigiliki: “Iawala ilyalenga 9.”
^ Pa nsita iiya amang’anda aingi yatakwatanga amapaala asuluke nupya antu izizyangapo na enyi, ukupitapo, nanti sile ukulaalapo.
^ Mu Cigiliki: “Iawala ilyalenga 6.”
^ Mu Cigiliki: “Iawala ilyalenga 9.”
