Milimo ya Atumwa 11:1-30
11 Lyene atumwa na ina aali umu Yudeya yuvwile ukuti amu nko nayo kwene iyataila izwi lyakwe Leza.
2 Fwandi lino Petulo waile uku Yelusalemu, antu alondelanga isunde lya kuzembululwa yatandike ukumupeela imilandu,
3 iyati: “Waile uwingila mu ng’anda ya yantu atazembululwa nu kulya nayo.”
4 Lyene Petulo watandike ukuyalondolwela vino cali, ati:
5 “Nali umu musumba wa Yopa ala nkupepa, nupya naweni icilolwa muno cintu cimwi icakozile icisalu icikalamba ica makoona 4 ciikanga pansi ukufuma mwi yulu, nupya cizile pano nali.
6 Lino nacilolekisye, naweni inyama izyakwata makulu 4, vilyanyi vya mu mpanga, ivikasela, alino ni vyunyi vya mu lwelele.
7 Nupya nuvwile izwi likuti: ‘Petulo, katuka, koma ulye!’
8 Lelo natiile: ‘Awe Mwene, ntatala nalyapo icintu icitasanguluka nanti cikowele.’
9 Lyene kuvwisile izwi umuku wakwe ciili ukufuma ukwi yulu iliti: ‘Utaama ivintu vino Leza wasangulula ukuti i vikowele.’
10 Cii cacitiike umuku wakwe citatu nupya vyonsi vyasenzilwe umwi yulu.
11 Nupya lilyo kwene, aonsi yatatu aatumilwe kuli nene ukufuma uku Kesaliya izile imilila pa ng’anda ino twikalangapo.
12 Lyene umupasi wanenyile ukuti impite nayo ukwaula nu kutwisika. Aina yaa 6 nayo kwene yakonsile, nupya twaile itwingila umu ng’anda yakwe Koneli.
13 “Watunenyile vino waweni malaika wataimilila umu ng’anda yakwe nu kumunena ati: ‘Tuma antu uku Yopa pakuti yakaame Simoni wino yakaama ukuti Petulo,
14 nupya alakunena ivintu ivilalenga ukuti wemo na amu ng’anda yako yonsi mupusuke.’
15 Lelo lino natandike ukulanda, umupasi wa muzilo wizile pali aliyo wakwe vino cali na kuli sweswe pa kutandika.
16 Lyene niwisye amazwi yano Umwene walandanga akuti: ‘Yoani wabatizyanga na manzi, lelo mwemo mulabatiziwa nu mupasi wa muzilo.’
17 Fwandi ndi cakuti Leza wayapeezile upe uli umwi na uno wapeezile sweswe swemuno twataila Umwene Yesu Klistu, nene weni uwa kulesya Leza?”
18 Lino yuvwile amazwi yayo, yatiile ukupeela Petulo imilandu nupya yalumbanyizye Leza iyati: “Fwandi lyene Leza akulonda na antu amu nko kwene yalapile pakuti yakaye nu umi.”
19 Lyene antu asalangine pa mulandu nu kucuzya ukwatandike pa cisila ca mfwa yakwe Sitivini yaile umu Fonisya, mu Kupulo, nu mu Antioki, nomba yasimikilanga sile Ayuda yatupu.
20 Lelo antu yamwi pali yano yafumile uku Kupulo nu ku Kuleni yaile uku Antioki nupya yatandike ukulanda na antu aalandanga Cigiliki ala yakuyasimikila ilyasi lisuma pa Mwene Yesu.
21 Nupya Yeova wayavwanga, na antu aingi yasenwike nu kutaila Umwene.
22 Lyene ilyasi pali aliyo lyafisile umu cilongano ca ku Yelusalemu, acino yatumile Banaba uku Antioki.
23 Lino wafisile nu kulola vino Leza wayalanzile cikuuku cikulu, watemilwe sana nupya watandike ukukomelezya yonsi ukutwalilila ukuya acumi uku Mwene;
24 pano wali u muntu umusuma uwakweti sana utailo nu mupasi wa muzilo. Na antu aingi yataile Umwene.
25 Fwandi waile uku Tasi uku kulonda Saulo.
26 Lino wamuzanyile, wamutwazile uku Antioki. Pa mwaka onga yalongananga yonsi umu cilongano nu kusambilizya antu aingi, nupya umu Antioki ali muno Leza watandikilepo ukupeela asambi izina lya kuti aina Klistu.
27 Umu manda yaya ali muno ya kasesema yafumile uku Yelusalemu iyaya uku Antioki.
28 Agabasi uwali a kasesema wenga pali yayo, wimilile nu kusesema ukupitila umu mupasi wa muzilo ukuti kwali nu kuya icipowe icikalamba umu nsi yonsi, nupya icipowe cico cizile iciyako umu manda yakwe Klaudi.
29 Fwandi asambi yatumile uwazwilizyo uku ina aikalanga umu Yudeya, ukulingana na vino cila muntu wakweti;
30 nupya yapeezile Banaba na Saulo kuti yatwale kuli ya eluda.
