Milimo ya Atumwa 14:1-28
14 Lyene lino Paulo na Banaba yaali umu Ikoniya, iingile umwi sunagogi* lya Yayuda, nupya yalanzile umu nzila yakuti Ayuda na Agiliki aingi iyataila.
2 Nomba Ayuda aatataile yaleesile icimvulunganya nu kutunka antu amu nko pakuti yakatukile aina.
3 Fwandi yaomvizye insita ikalamba ala yakulanda nu kusipa pa mulandu na maka yakwe Yeova, uwayazumilizye ukucita ivimanyililo ni vizungusyo pa mulandu ni cikuuku cakwe icikulu.
4 Lelo antu aingi amu musumba yapaatukine; yamwi yali uku lusansa lwa Yayuda, yauze nayo ku yatumwa.
5 Lyene antu amu nko na Ayuda alino ni ntunguluzi zyao, yalondanga ukuyapontela nu kuyatama na mawe,
6 lino yuvwile vivyo yutukiile umu misumba ya Likoniya, Lisitila na Debe, alino nu mu mizi iyali umupiipi.
7 Kuuku kwene akuno yatwalilile ukusimikila ilyasi lisuma.
8 Lyene umu Lisitila, mwali umonsi uwikalanga lyonsi pa mulandu wakuti wali umulemale makulu. Waviilwe umulemale nupya atatazile apitepo.
9 Umuntu wii wakutikanga lino Paulo walandanga. Lyene lino Paulo wamulolekisye nu kulola ukuti ali nu utailo nupya angapoziwa,
10 walanzile ni izwi likalamba ati: “Imilila.” Fwandi umonsi wiyo watolwike nu kutandika ukupita.
11 Lino antu yaweni vino Paulo wacisile, yapunzile umu lulimi lwa Cilikoniya iyati: “Ya leza iyaya wa yantu nupya iiza kuli sweswe!”
12 Nupya yatandike ukwama Banaba yakuti Zeusi, Paulo nawe yamwamanga yakuti Helemesi pano aliwe walandangapo sana.
13 Nupya simapepo wakwe Zeusi uwakweti itempele pa mulyango wa musumba, waleesile ya cipambasi na maluwa* pa mpongolo nupya walondanga ukupeela malambo pamwi ni iumba.
14 Lelo lino umutumwa Banaba nu mutumwa Paulo yuvwile vivyo, yalepwile ivyakuzwala vyao nu kusimwilila umwi umba ala yakupunda yakuti:
15 “Mwe yantu mwe, u mulandu ci uno mukucitila vii? Naswe kwene sweswe yantu sile wakwe mwemwe kwene. Nupya tukumusimikila ilyasi lisuma pakuti mufume ku vintu vii ivya sile sile nu kuya kuli Leza wa umi, uwaumvile iyulu ni nsi na yemba alino na vyonsi ivyayamo.
16 Ku nkulo izyaliko mpiti Leza wazumilizye antu amu nko zyonsi ukuti yaacita vino yalondanga,
17 nupya waimanyisizye ukupitila umu kucita ivisuma, wamupeezile imvula ni nsita ya kuzombola, alino ni vyakulya ivingi nupya walenzile imyenzo inu ukuya sana ni nsansa.”
18 Nanti cakuti yalanzile ivintu vii, citali cangupale ukulesya antu ukupeela malambo kuli aliyo.
19 Nomba Ayuda aafumile uku Antioki nu ku Ikoniya yatunsile iumba nupya yatamile Paulo na mawe nu kumufumizya ukunzi ya musumba, pano yelenganyanga ukuti watafwa.
20 Lelo lino asambi yamuzingulwike, wakatwike nu kwingila umu musumba. Nupya uwanda uwalondelilepo, waile na Banaba uku Debe.
21 Pa cisila ca kusimikila ilyasi lisuma umu musumba uuwa nu kupangamo asambi aingi, yaswilile uku Lisitila, ku Ikoniya nu ku Antioki.
22 Kuuku akuno yakomelizye asambi nu kuyacincizya ukuti yatwalilile ukuya nu utailo nupya yayanenyile iyati: “Tulinzile ukupita umu macuzi aingi pa kwingila umu Wene wakwe Leza.”
23 Nupya yayasontiile ya eluda umu cilongano conga na conga, yapefile nu kuleka ukulya pa nsita imwi,* nupya yayapeezile kuli Yeova wino yataile.
24 Lyene yapisile umu Pisidiya nu kuya uku Pamfuliya,
25 nupya pa cisila ca kusimikila umu Pega, yaile uku Ataliya.
26 Lino yafumile kuuku, yakwezile uwato nu kuya uku Antioki kuno Leza waile ayalanga cikuuku cikulu pa mulimo uno yaomvile.
27 Lino yafisile nu kukolongana pamwi na amu cilongano, yalondolwile ivintu ivingi vino Leza wacisile ukupitila muli aliyo, nu kuti wayuzile inzila uku yantu amu nko pakuti yataile.
28 Fwandi iikazile na asambi pa nsita itali.
Mafutunoti
^ I cikuulwa muno Ayuda yapepelanga nu kubelengela Malembo.
^ Maluwa ya kuzwala ku mutwe.
^ Nanti “kufunga.”
