Milimo ya Atumwa 15:1-41
15 Lyene antu yamwi aafumile uku Yudeya yatandike ukusambilizya aina iyati: “Ndi cakuti mutazembulwilwe ukulingana nu lutambi lwakwe Mose, mutanga mupusuke.”
2 Pa cisila cakuti Paulo na Banaba yapusana sana na antu yayo nu kupaazyanya , aina yatumile Paulo na Banaba alino na yauze ukuya uku yatumwa na ya eluda aali mu Yelusalemu pa mulandu ni lyasi lii.
3 Pa cisila cakuti amu cilongano yayasukilila, aonsi yaa yatwalilile nu ulendo, yapisile umu Fonisya nu mu Samaliya ala yakulondolola pali vino antu ya mu nko yasenwike, nupya lino aina yonsi yuvwile vivyo, yatemilwe sana.
4 Lino yafisile umu Yelusalemu, amu cilongano na atumwa alino na ya eluda yayapokelile ningo, nupya yalondolwile ivintu ivingi vino Leza wacisile ukupitila muli aliyo.
5 Lelo antu yamwi ali umwi umba lya Yafaliseo nupya aataile, yakatwike pa vilimba nu kulanda iyati: “Cili sile ningo ukuzembulula antu yaa nu kuyanena ukuti yalondela Masunde Yakwe Mose.”
6 Fwandi atumwa na ya eluda yakolongine pamwi pakuti yalanzyanye pa mulandu uu.
7 Pa cisila ca kulanzyanya* sana, Petulo wakatwike nu kuyanena ati: “Inane, mwamanya ningo ukuti kufuma mpiti, Leza wansoolwile ukufuma muli mwemwe pakuti antu amu nko yuvwe ilyasi lisuma nu kutaila.
8 Nupya Leza uwamanya ivyaya umu mwenzo, walangilile ukuti watayapokelela lino wayapeezile umupasi wa muzilo, wakwe vino wacisile na kuli sweswe.
9 Nupya atalangizye kapaatulula pali sweswe na pali aliyo, lelo wasangulwile imyenzo yao pa mulandu nu utailo wao.
10 U mulandu ci fwandi uno mukwezezya Leza pa kutwika asambi visendo ivinyome vino ivikolwe vitu nanti asweswe tutatazile tusendepo?
11 Lelo twakwata utailo wakuti twapusuka ukupitila umu cikuuku cikulu ica Mwene Yesu wakwe vino nayo kwene yataila.”
12 Lino antu yonsi yuvwile vivyo, ikazile mya, nupya yatandike ukukutika kuli Banaba na Paulo lino yalondololanga ivimanyililo ivingi ni vizungusyo vino Leza wacisile ku yantu ya mu nko kupitila muli aliyo.
13 Lino yamazile ukulanda, Yakobo nawe walanzile ati: “Mwe inane, uvwini kuno.
14 Simyoni watalondolola ningo vino Leza pa muku wa kutandikilako wapiliukile uku yantu ya mu nko pakuti asoolole antu akaamilwa ukwi zina lyakwe.
15 Nupya mazwi yayo yakauvwana na mazwi yakwe ya Kasesema, wakwe vino calembwa ukuti:
16 ‘Pa cisila cakwe vii, ndaswilila nu kuyakuula ing’anda yakwe Devedi iyapona; ndazifya ni viumba ivyapona nu kuikuula cipya cipya,
17 pakuti antu asyala yalonde Yeova kumwi na amu nko zyonsi ali kuti antu akaamilwa pi zina lyane, Yeova aliwe wavwanga, aakucita ivintu vii,
18 ivyamanyikwa ukufuma mpiti.’
19 Fwandi nemo nkulola ukuti citanga cizipe ukucuzya antu amu nko akulonda ukuombela Leza,
20 lelo tulinzile ukuyalembela ukuti yaataluka uku vintu ivyakoweziwa ni vilubi, ku uzelele,* ku vintu ivititilwe nu ku wazi.
21 Pano ukufuma na mpiti, umu misumba yonsi mwayanga antu asambilizyanga umu vyalembwa vyakwe Mose, pano lyonsi pa wanda wi sabata yabelenganga ivyalembwa vivyo umu masunagogi.
22 Lyene atumwa na ya eluda pamwi ni cilongano consi, yapingwilepo ukutuma aonsi ku Antioki asoolwilwe ukufuma pali aliyo, pamwi na Paulo na Banaba; yatumile Yuda wino yamanga yakuti Basabasi alino na Sailasi, aonsi aatungululanga aina.
23 Yayapeezile kalata iyatangi:
“Swe yatumwa na ya eluda, swe ina inu, twamulembela kalata mwe ina itu aikala umu Antioki, mu Silya nu mu Kilikiya aafuma umu yantu amu nko: Twamulamuka!
24 Tuuvwa ukuti yamwi ukufuma muli sweswe iiza uku kumucuzya pa mulandu na vino yalanzile pakuti yamuvulunganye. Tutayanenyile kuti yacite vivyo,
25 iituzumilizyanya ukusoolola aonsi aakuti tutume kuli mwemwe pamwi na Banaba na Paulo aina yano twatemwa,
26 aonsi aapeela umi wao pa mulandu ni zina lya Mwene witu Yesu Klistu.
27 Acino tukutuma Yuda na Sailasi pakuti nayo kwene yace ize yamunene mazwi ali yamwi kwene.
28 Pano umupasi wa muzilo kumwi naswe itupingulapo ukukanamutwika icisendo na cuze ukucila sile pa kumunena ivintu vii vicindame:
29 mwataluka ku vintu ivyapeelwa ku vilubi, ku wazi, ku vintu vino vyatitilwa nu ku uzelele.* Ndi cakuti mukutaluka uku vintu vii, ivintu vilamuzipila. Umutende uye namwe!”
30 Lino aonsi yaa yapisile, yaile uku Antioki, nupya yaile iyakolonganika aina yonsi nu kuyapeela kalata.
31 Lino yabelenzile kalata, yatemilwe sana pa mazwi ya kukomelezya.
32 Nupya vino Yuda na Sailasi nayo kwene yaali aakasesema, yalanzile malyasi aingi aavwile aina nu kuyakomelezya.
33 Pa cisila ca kwikala kuuku pa nsita imwi, aina yayapakisye nupya yaswilile kuli yano yayatumile.
34 *——
35 Lelo Paulo na Banaba ikazile umu Antioki, ala yakusambilizya nu kusimikila pamwi na yauze aingi ilyasi lisuma pali Yeova.
36 Lino papisile manda yamwi, Paulo wanenyile Banaba ati: “Leka lyene tuswilile nu kutandalila aina mu misumba yonsi ino twasimikilemo ilyasi lisuma pali Yeova, pakuti tukalole vino yali.”
37 Banaba walondesyanga ukusenda Yoani, wino yamanga ukuti Mako.
38 Lelo Paulo wene atalondanga ukuti yapite nawe, pano wayasiile umu Pamfuliya nupya atapisile nayo umu mulimo wa kusimikila.
39 Lyene yapaazyanyizye sana suka iyapaalukana; nupya Banaba wasenzile Mako nu kukwela uwato iyaya uku Kupulo.
40 Paulo wasoolwile Sailasi nupya pa cisila cakuti aina yamupeela kuli Yeova pakuti amulanga icikuuku cakwe cikulu, Paulo wapisile.
41 Wapisile umu Silya nu mu Kilikiya ale akukomelezya ivilongano.
Mafutunoti
^ Nanti “kupaazyanya.”
^ Mu Cigiliki: “Por·nei′a.” Lolini Ulondolozi wa Mazwi.
^ Mu Cigiliki: “Por·nei′a.” Lolini Ulondolozi wa Mazwi.
