Milimo ya Atumwa 16:1-40
16 Lyene Paulo wafisile ku Debe alino aya nu ku Lisitila. Nupya kwali nu musambi uwi zina lyakuti Timoti, wino nyina wali u Muyuda umutaile lelo isi wali u Mugiliki,
2 nupya aina amu Lisitila nu mu Ikoniya yalandanga ivisuma pali aliwe.
3 Paulo walondesyanga ukuti Timoti amusukilile, nupya wamuzembulwile pa mulandu wa Yayuda aikalanga umu ncende ziizi, pano yonsi yamanyile ukuti isi wali u Mugiliki.
4 Lino yapitanga umu misumba, yanenanga antu kuti yalondela vino atumwa na ya eluda aali umu Yelusalemu yapingwile.
5 Lyene ivilongano vyatwalilile ukukomeleka umu utailo nupya antu yavulilangako sile cila wanda.
6 Nupya yapisile umu Fulugiya nu mu Galatiya, pano umupasi wa muzilo wayakanyizye ukusimikila mu citungu ca Asia.
7 Lino yafisile uku Misiya yezizye ukuya umu Bitiniya, lelo umupasi wakwe Yesu utayazumilizye.
8 Fwandi yapisile umu Misiya nu kuya uku Tuloa.
9 Nupya usiku Paulo waweni icilolwa umwali umonsi umwi umwina Makedoniya ala aimi akumupaapata ati: “Iza uku Makedoniya uwize utwazwe.”
10 Lino waweni sile icilolwa, twatandike ukuya uku Makedoniya, pano twasondwelile ukuti Leza watatunena ukuti tukayasimikile ilyasi lisuma.
11 Lyene twakwezile uwato itufuma mu Tuloa nu kuya uku Samatilake, lelo uwanda uwalondelilepo twaile uku Neapoli;
12 nupya kufuma kuuku, twaile ku Filipi,* umusumba wa ina Loma, uwali ucindame sana umu citungu ca Makedoniya, twikazile manda yamwi umu musumba uu.
13 Pa wanda wi Sabata, twaile ukunzi ya mpongolo umupiipi nu luzi, pano twelenganyanga ukuti u kwali cifulo ca kupepelapo, nupya twikazile nu kutandika ukulanda na anaci aakolongiine.
14 Nupya umwanaci umwi uwi zina lyakuti Lidya, kakazya wa nsalu iziyenzulukile uwa mu musumba wa Tiyatila nupya kapepa wakwe Leza, wakutikanga, nupya Yeova wayuzile sana umwenzo wakwe pakuti aike mano kuli vino Paulo walandanga.
15 Lyene lino wene na amu ng’anda yakwe yabatiziwe, watupaapasile ati: “Nga mukulola ukuti nataila Yeova, twapiteni mukikale uku ng’anda ukwane.” Nupya pa mulandu wakuti wakomilepo sile ukutupaapata, twapisile nawe.
16 Lyene lino twayanga ku cifulo ca kupepelapo, twakomenkiine nu muomvi umwi umukazyana uwali nu mupasi uwamulenganga ukusaapola. Walenganga asambazi yakwe ukukwata ivyuma ivingi pa mulandu nu kusowela.
17 Mukazyana wii watwalilile ukulondela Paulo naswe nupya wapundanga akuti: “Aonsi yaa, aaomvi yakwe Leza wa Papelapela nupya yakumusimikila pali vino mulapusuka.”
18 Watwalilile ukucita vikwene pa manda aingi. Lyene Paulo wasusile atonta nupya wapiliwike nu kunena umupasi ati: “Nkukunena umwi zina lyakwe Yesu Klistu nkuti fuma muli aliwe.” Nao wafumile pa nsita kwene iiya.
19 Lyene lino asambazi ya mukazyana yaweni ukuti yamaata ukukwata ivyuma, yalemile Paulo na Sailasi nu kuyatwala uku maliketi uku ntunguluzi.
20 Lino yayatwazile kuli ya kapingula ya milandu, yalanzile iyati: “Antu yaa Ayuda yakuleta sana icimvulunganya umu musumba witu,
21 nupya yakusambilizya intambi zino masunde yatatuzumilizya ukulondela nanti ukucita, pano sweswe ina Loma.”
22 Iumba lyonsi lyayakatukiile, nupya lino ya kapingula ya milandu yayalepwilile ivyakuzwala yalanzile ukuti yayume ivikoti.
23 Pa cisila ca kuyuma ivikoti ivingi, yayatwazile umu cifungo nu kunena kalinda wa cifungo ukuti yayalilwe ningo.
24 Pa mulandu wakuti yamunenyile vivyo, waingizye umu cifungo ca mukasi sana nu kuyanyepa makulu umu makoli.
25 Lelo lwa pakasi ka usiku, Paulo na Sailasi yapepanga nu kwimba inyimbo zya kulumbanya Leza, nupya afungwa yakutikanga.
26 Lilyo kwene kwacitiike icilundumusi cikalamba icatensizye nu mufula wa cifungo. Nupya ivisaasa vyonsi vyayulike papo kwene, na maceni yakwe yonsi anyefilwe yasapwike.
27 Lino kalinda wa cifungo wazyusile nu kulola ukuti milyango ya cifungo yatiyulika, wafumizye ulupanga lwakwe nupya wakasi aikome pano welenginye ukuti afungwa iyapuuka.
28 Lelo Paulo wapunzile ni izwi likalamba ati: “Utaikoma, pano swensi amuno tuli!”
29 Lyene walenzile ya lampi nu kwingilamo zuwa zuwa, nupya uvwile sana intete, waile afukama apiipi na Paulo na Sailasi.
30 Wayafumizye panzi alino ayuzya ati: “Uzye i vyani vino ndinzile ukucita pakuti nkapusuke?”
31 Nayo yamunenyile iyati: “Taila umu Mwene Yesu, alino wemo na amu ng’anda yako mulapusuka.”
32 Lyene yamusimikiile api zwi lyakwe Yeova pamwi na amu ng’anda yakwe yonsi.
33 Nawe wayasenzile pa nsita kwene iiya ya usiku, nu kuyayafulila ivilonda. Lyene wene na amu ng’anda yakwe yonsi yabatiziwe ukwaula nu kusumba insita.
34 Waingizye umu ng’anda yakwe nu kuyapekanyizizya ivyakulya, nupya wasansamwike sana pamwi na yonsi amu ng’anda yakwe pano lyene wataile Leza.
35 Lyene lino waciile, ya kapingula ya milandu yatumiile ya kapaso pakuti yakalande yati: “Fumini aonsi yayo.”
36 Kalinda wa cifungo waile anena Paulo ati: “Ya kapingula ya milandu iyatuma aonsi akwizalanda ukuti mwemwe mweili mufume. Fwandi fumini likwene nupya mupite umutende.”
37 Lelo Paulo wanenyile ya kapaso ati: “Yaatumile ivikoti apaswe ukwaula umulandu, nanti cakuti sweswe ina Loma, nupya yatwingizye umu cifungo. Uzye lyene yakulonda yatufumye umu nkama? Awe! Lekini ize yatufumye aineco.”
38 Ya kapaso yaile iyanena ya kapingula ya milandu amazwi yaa. Nayo yatiinyile sana lino yuvwile ukuti aonsi yaya yali aina Loma.
39 Lyene yaile iyalenga uwelelo, nupya lino yayafumizye yayalenzile ukuti yafume umu musumba.
40 Lelo yafumile umu cifungo nu kuya uku ng’anda yakwe Lidya; nupya lino yaweni aina, yayakomelizye alino iyapita.
Mafutunoti
^ Umusumba uwali ukunzi yakwe Itali kuno aikazi yakweti insambu izili zimwi na aikazi ya ku Itali.
