Milimo ya Atumwa 17:1-34
17 Lyene yapisile umu Amfipolisi nu mu Apoloniya nu kuya uku Tesalonika, ukwali isunagogi* lya Yayuda.
2 Fwandi wakwe vino Paulo wacitanga lyonsi, wingile umukasi muno yaali, nupya pa masabata yatatu walanzyanyanga nayo umu Malembo,
3 walondololanga nu kupeela usininkizyo wa mu Malembo ukuti cali sile ningo Klistu ukucula nu kutuutuluka ukufuma uku yafwe, ala akuti: “Yesu kwene wii ali Klistu, wino nkusimikilapo kuli mwemwe.”
4 Nupya yamwi yataile nu kuilunda kuli Paulo na Sailasi, vikwene avino na Agiliki aingi apepanga Leza yacisile, kumwi na anaci aingi acindiikwe.
5 Nomba Ayuda yuvwile uzuwa, acino yakolonganike aonsi aipe aapitananga apa maliketi nu kupanga iumba lya unkalwe nupya yaleesile icimvulunganya umu musumba. Yazanzile ing’anda yakwe Yasoni nupya yalondanga ukufumizya Paulo na Sailasi ukwi umba lya unkalwe.
6 Lino yafizilwe ukuyazana, yasenzile Yasoni na ina yamwi iyayatwala uku ntunguluzi zya mu musumba ala yakupunda iyati: “Antu aakaleta icimvulunganya umu nsi iyafika na kukwene,
7 nupya Yasoni watayapokelela uku ng’anda ukwakwe. Antu yaa yonsi yasilondela masunde yakwe Kaisale, pano yakati kwaya umwene muze, Yesu.”
8 Lino iumba ni ntunguluzi zya mu musumba yuvwile vivyo, yasakamile sana;
9 nupya lino yalipilisizye Yasoni na auze impiya, yayalesile ukuti yapita.
10 Lino kwafiisile sile, aina yatumile Paulo na Sailasi uku Beleya. Lino yafisile kuuku, ingiile umwi sunagogi lya Yayuda.
11 Antu yaa yaitemiilwe ukusambilila ukucila amu Tesalonika, pano yapokelile izwi lyakwe Leza nu mwenzo onsi, yalondelezyanga sana umu Malembo cila wanda pakuti yalole ndi cakuti vino yuvwile vyali ivya cumi.
12 Fwandi aingi pali yayo yataile, kumwi na anaci aingi Agiliki acindiikwe alino na onsi yamwi.
13 Nomba lino Ayuda aku Tesalonika yuvwile ukuti Paulo akusimikila izwi lyakwe Leza nu mu Beleya kwene, yaile uku kutunka maumba nu kuleta icimvulunganya.
14 Lyene papo kwene aina yatumile Paulo kuli yemba, nomba Sailasi na Timoti yene yasyazile kuuku kwene.
15 Lelo aasukilile Paulo yamufisizye ku Atena, nupya yawezile lino Paulo wayanenyile ukuti Sailasi na Timoti yalinzile ukuya zuwa kuli aliwe.
16 Lyene lino Paulo wayaloleelanga umu Atena, wasosile sana pa kulola ukuti umu musumba mwaziile ivilubi.
17 Fwandi watandike ukulanzyanya na Ayuda umwi sunagogi alino na antu yauze apepanga Leza nupya cila wanda walanzyanyanga na yano yazanwanga pa maliketi.
18 Nomba antu asambilizyanga ivisambilizyo vyakwe Epikuli* na Sitoiki* yatandike ukupaazyanya nawe, yamwi yatangi: “Uzye civwangevwange wii angatunena vyani?” Yauze nayo yatangi: “Akuloleka kwati akusimikila pali ya leza aatamanyikwa.” Yalandanga vivyo pano wasimikilanga ilyasi lisuma pali Yesu na pa kutuutuluka.
19 Lyene yamulemile nu kumutwala uku Aleopago,* ala yakuti: “Uzye ungatunena pa cisambilizyo cii icipya cino ukulandapo?
20 Pano ukulanda ivintu vino tutamanya, nupya tukulonda ukumanya upiliulo wa vintu vivyo.”
21 Nupya aina Atena yonsi na aenyi yatacitanga ivintu vyuze pa nsita ino yasikuomba suka sile kusimika nanti ukukutika uku vintu ivipya.
22 Lyene Paulo wimilile pa nkoleelo ya Aleopago nu kulanda ati:
“Mwe yantu ya mu Atena, nalola ukuti umu vintu vyonsi mwemo mukatiina ya leza* ukucila antu yonsi asyala.
23 Pano lino napitanga nu kulolekesya ivintu vino mukapepa, nazanyile ulambo apalembwa ukuti ‘Kuli Leza Aatamanyikwa.’ Fwandi Leza kwene wii aatamanyikwa wino mukapepa, a wino nkumusimikilapo.
24 Leza uwapanzile insi na vyonsi ivyayamo, nupya Umwene wi yulu ni nsi asyaikala umu matempele aapangwa na antu;
25 nupya asienekela ukuti antu yamwavwa pano aliwe akapeela antu yonsi umi nu muza alino ni vintu vyonsi.
26 Nupya umu muntu wenga amuno wapangiile antu amu nko zyonsi ukuti ikale umu nsi yonsi, wisile ni nsita ino ivintu vimwi vilinzile ukucitika alino na muno antu yalinzile ukwikala,
27 pakuti yangalonda Leza, nupya nga yezya na maka ukumulonda yangamuzana, pano ataaya ukutali kuli swensi wenga na wenga.
28 Pano aliwe walenga kuti tuye nu umi, kuti twapita nu kuti tuyeko, wakwe vino ya kalemba inu yamwi yalanzile ukuti, ‘Pano naswe kwene sweswe yana yakwe.’
29 “Fwandi vino sweswe yana yakwe Leza, tutafwile twaelenganya ukuti Leza waya wakwe goldi nanti siuva nanti iwe, nanti wa vintu ivyapangwa na antu.
30 I cacumi, pa nsita imwi antu yacitanga ivintu ukwaula ukumanya; lelo Leza wasuulako uku vintu vivyo; nomba ndakai akunena antu yonsi ukuti yafwile ukulapila.
31 Pano wika uwanda uno alapingula antu amu nsi umu ulungami ukuomvya umuntu wino wasonta, nupya wapeela usininkizyo uku yantu yonsi pa kutuutulula umuntu wiyo ukufuma uku yafwe.”
32 Lyene lino yuvwile pa kutuutuluka kwa yafwe, yamwi yatandike ukumutumfya, yauze nayo yalanzile iyati: “Tuluvwa nupya kwene kuli wewe api lyasi lii umuku na uze.”
33 Lyene Paulo wafumilepo ayasya,
34 nomba antu yamwi yailunzile kuli aliwe nupya yataile. Pali yayo pali na Dionisasi uwali kapingula umu cilye ca Aleopago alino nu mwanaci uwi zina lyakuti Damalisi.
Mafutunoti
^ I cikuulwa muno Ayuda yapepelanga nu kubelengela Malembo.
^ Lolini Ulondolozi wa Mazwi.
^ Lolini Ulondolozi wa Mazwi.
^ Lolini Ulondolozi wa Mazwi.
^ Nanti “apefi sana.”
