Milimo ya Atumwa 19:1-41
19 Lino Apolo wali umu Kolinto, Paulo wapisile umu museo uwatalwike kuli yemba nu kuya uku Efeso. Lino wafisile kuuku wazanyile asambi yamwi
2 nupya wayuzizye ati: “Uzye mwapokelile umupasi wa muzilo lino mwataile?” Nayo yamwaswike iyati: “Awe, tutatala tuvwapo ukuti kwaya nu mupasi wa muzilo.”
3 Nawe wayuzizye ati: “Nga fwandi u lubatizyo lwa musango ci luno mwabatiziwe?” Nayo yatiile: “U lubatizyo lwakwe Yoani.”
4 Paulo walanzile ati: “Yoani wabatizyanga ulubatizyo lwa kulanga ukulapila, ala akunena antu ukuti yataile muli wino wali nu kwiza pa cisila cakwe, kuli kuti muli Yesu.”
5 Lino yuvwile vivyo, yabatiziwe umwi zina lya Mwene Yesu.
6 Nupya lino Paulo wisile makasa yakwe pali aliyo, umupasi wa muzilo wizile pali aliyo, yatandike nu kulandila umu ndimi zyuze nu kusesema.
7 Yonsi pamwi yali aonsi apiipi na 12.
8 Pa myezi itatu wingilanga umwi sunagogi ala akulanda nu kusipa, walandanga malyasi nupya wezyanga ukuyasinila pa Wene wakwe Leza.
9 Lelo yamwi yakomile imyenzo nupya yatalondanga ukutaila, yalandanga iviipe pa nzila ya Mwene pa manso ya yantu, acino wafumilepo nu kufumyapo asambi nupya watandike ukulanda malyasi cila wanda umu cikuulwa ca pi sukulu lyakwe Tilano.
10 Wacitanga vikwene pa myaka iili, cakuti antu yonsi aali umu citungu ca Asia yuvwile izwi lya Mwene, kuli kuti Ayuda na Agiliki.
11 Nupya Leza watwalilile ukucita ivizungusyo ivikalamba ukupitila muli Paulo,
12 cakuti ni vitambala ni vyakuzwala ivyakumyanga kuli Paulo yavitwalanga uku yalwale, nayo yapolanga, ni mipasi iipe yafumanga.
13 Lelo Ayuda yamwi aapitananga ala yakufumya iviwa nayo kwene yezizye ukuomvya izina lya Mwene Yesu pa yantu aali ni mipasi iipe; yalandanga yakuti: “Nkumunena umwi zina lyakwe Yesu wino Paulo akasimikilapo nkuti fumini.”
14 Lyene kwali ana aonsi 7 yamwana simapepo umwi umukalamba Umuyuda uwi zina lyakuti Sikeva aacitanga vikwene.
15 Lelo umupasi uwipe wayaswike iuti: “Namanya Yesu na Paulo kwene namumanya; nga mwemo mwemwe yaweni?”
16 Lyene muntu uwali nu mupasi uwipe wayalwisizye yonsi nu kuyacimvya nupya yutwike iyafuma umu ng’anda tupu ala iyacisika.
17 Cintu cii camanyikwe uku Yayuda yonsi na Agiliki aikalanga umu Efeso; nupya yonsi yuvwile intete, ni zina lya Mwene Yesu lyatwalilile ukucindikwa.
18 Nupya antu aingi ataile, yayanga yakuisokolwela apaswe iviipe vino yacitanga.
19 Antu aingi aacitanga ivya maleele yakolonganiike mabuku yao nu kuyoca pa manso ya yantu. Nupya yapenzile umutengo wa mabuku yayo nu kuzana ukuti wafisile pa mpiya zyakwe siuva 50,000.
20 Fwandi pa mulandu na maka yakwe Leza, izwi lyakwe Yeova lyatwalilile ukusalangana nu kukomelako.
21 Pa cisila cakuti ivintu vii vyacitika, Paulo wapingwilepo ukuti nga waya uku Makedoniya nu ku Akaya, alaya nu ku Yelusalemu. Walanzile ati: “Nga naya kuuku, mfwile nu kuya uku Loma.”
22 Lyene pali yano yamwavwanga, watumilepo yaili ku Makedoniya, Timoti na Elasita, lelo wene wikazile umu citungu ca Asia apa nsita imwi.
23 Pa nsita iiya kwakatwike icimvulunganya icikalamba pa mulandu wa Nzila ya Mwene.
24 Pano umuntu uwi zina lyakuti Demetiliyo, uwasulanga siuva nu kupanga utumatempele twakwe Atemi, walenganga antu aombanga umulimo uu ukukwata sana impiya.
25 Wakolonganike yano waombanga nayo alino na yauze aombanga umulimo kwene uwo nu kuyanena ati: “Mwe yantu mwe, mwamanya ningo ukuti umu mulimo kwene uu amuno tukakwatila impiya.
26 Lyene mukuyuvwila nu kuilolela vino Paulo akucita umu Efeso nu mu citungu consi ca Asia, watatunka antu aingi nupya watalenga yazumile ukuti ya leza apangwa na antu asi ya leza ya cumi cumi.
27 Nupya icaticipako i cakuti antu yatalasuula sile uculuzi witu lelo yalasuula ni tempele lyakwe Atemi leza mwanaci umukalamba, nupya antu amu citungu ca Asia na antu umu nsi aakapepa leza wii yalata ukumucindika.”
28 Lino antu yuvwile vivyo yasosile sana, nupya yatandike ukupunda iyati: “Atemi uwa ina Efeso ali mukalamba!”
29 Acino umu musumba mwali sana icimvulunganya, nupya yonsi yasimwile nu kuya mu cibansa ca vyangalo, yasenzile Gayusi na Alisitaka aina Makedoniya aapitanga na Paulo.
30 Paulo wene walondanga ukwingila umwi umba, lelo asambi yatamuzumilizye.
31 Nanti sile aakalamba yamwi amitebeto na avyangalo aali ya cuza yakwe yatumile mazwi akumupaapata ukuti atingila umu cibansa ca vyangalo pakuti atiika umi wakwe umu uzanzo.
32 Antu yapundanga ivipusanepusane pano kwali icimvulunganya, nupya aingi yatamanyile umulandu uno yakolonganiile.
33 Lyene yafumizye Alekizanda umwi umba, ala Ayuda yakumusunkilizya pa nkoleelo, nupya Alekizanda walesizye antu icongo ukuomvya ikasa pano walondanga ukuipokolola uku yantu.
34 Nomba lino yamanyile ukuti wali u Muyuda, yonsi yatandike ukupundila pamwi umupiipi na maawazi yaili ala yakuti: “Atemi uwa ina Efeso ali mukalamba!”
35 Lino kalemba wa mu musumba walesizye iumba ukupanga icongo walanzile ati: “Mwe yantu ya mu Efeso, uzye a weni atamanya ukuti umu musumba uwa Efeso umwaya itempele lyakwe Atemi umukalamba ni cikope icaponyile ukufuma ukwi yulu?
36 Vino kusi angakana ivintu vii, mulinzile ukuta ukupanga icongo nu kuteeka imyenzo.
37 Pano antu yaa yano imuleta kuno asi vipondo vya matempele nupya yasipontela leza witu umwanaci.
38 Fwandi ndi cakuti Demetiliyo na aomvi yauze yakupeela umwi umulandu, lekini yatwale umulandu uku cilye nu ku yalasi* pakuti ayano yakaombelepo.
39 Lelo ndi cakuti mukulonda icicizile pali cii, cilinzile ukupingulwa umu cilye ca yantu amu musumba
40 Pano tungapeelwa umulandu wa kukatukila uteeko pali vino ivicitika ilelo, pa mulandu wakuti tutakweti ivisinka vino tungalanda pa cimvulunganya cii.
41 Pa cisila ca kulanda vivyo, wanenyile antu akolongine ukuti yaapita.
Mafutunoti
^ Mulasi wali a kateeka wa citungu ca mu mpanga ya Loma. Lolini Ulondolozi wa Mazwi.
