Milimo ya Atumwa 20:1-38
20 Lino icongo casizile, Paulo wamile asambi, nupya pa cisila ca kuyakomelezya nu kuyapakasya, watandike ulwendo lwa kuya uku Makedoniya.
2 Nupya lino wapisile umu ncende ziizi nu kukomelezya sana asambi aikalangamo, wafisile umu Gilisi.
3 Wikazilemo imyezi itatu, nomba pa mulandu wakuti Ayuda yakweti ipange lya kumukoma lino walondanga ukukwela uwato nu kuya uku Silya, wapingwilepo ukuswilila ukupita umu Makedoniya.
4 Yamusukilile kuli Sopata mwana Pilusi uwa ku Beleya, Alisitaka na Sekundo aaku Tesalonika, Gayusi uwa ku Debe, Timoti, alino na Tikikasi na Tulofimo aafumile uku citungu ca Asia.
5 Antu yaa yatukoleelile nupya yaile umu kutulolela umu Tuloa;
6 lelo twakwezile uwato pa kufuma umu Filipi pa cisila ca kuzevya Umukate Uwaula Icitutumusi, nupya umu manda 5 twafisile kuli aliyo umu Tuloa nu kwikalamo manda 7.
7 Pa wanda wa kutandikilako umu mulungu, lino twakolongine pa cakulya, Paulo watandike ukulanda kuli yano yakolongine pano wali nu kupita uwanda uwalondelilepo; nupya watwalilile ukulanda ukufikila usiku pakasi.
8 Nupya umu muputule wa papela muno twakolongine mwali ya lampi aingi.
9 Lyene umulumendo uwi zina lyakuti Yutuko watenzi api windo, wakaswile lino Paulo walandanga, nupya vino wali sana nu tulo waponyile ukufuma pa ntunti yakwe citatu, nupya yaile iyamukatusya ala watafwa.
10 Lelo Paulo waileko aya ainama nu kumukumbatila, alanda ati: “Tiini ukupanga icongo, pano ali nu umi.”
11 Lyene waswilile mu muputule wa papela nu kutandika ukulya icakulya. Watwalilile ukulanda pa nsita itali ukufika katondo alino apita.
12 Fwandi yasenzile umulumendo ala ali nu umi nupya yateekeziwe sana.
13 Lyene twaile itukwela uwato nu kuya uku Asosi kuno twalondanga ukuyasenda Paulo mu wato, watunenyile ukuti akuno tulamuzana, pano walondanga ukupita ulwa pansi.
14 Lyene lino watuzanyile umu Asosi, twamusenzile umu wato ituya uku Mitulene.
15 Nupya pa wanda uwalondelilepo twaile itufika uku Kiosi, lelo uwanda uwakonsilepo twafisile pa Samosi, nupya pa wanda uze uwalondelilepo twaile itufika uku Milete.
16 Paulo wapingwilepo ukupitilila umu Efeso pakuti atasumba insita mu citungu ca Asia, pano walondanga ukufika zuwa uku Yelusalemu pa wanda wa Pentekosti nga cingacitika.
17 Lelo lino wali uku Milete watumile mazwi uku Efeso nu kwama ya eluda amu cilongano.
18 Lino izile kuli aliwe, wayanenyile ati: “Mwamanya ningo vino nacisile kuli mwemwe ukufuma pa wanda wa kutandikilako lino nafisile umu citungu ca Asia,
19 naicefizye sana lino naombelanga Umwene nupya nalilanga nu kucula pa mulandu na vino Ayuda yalondanga ukunkoma,
20 lelo ntatile ukumunena ivingamuzipila nanti ukumusambilizya apaswe nu ku ng’anda ni ng’anda.
21 Lelo nasimikile sana ku Yayuda nu ku Yagiliki pakuti yalapile kuli Leza nu kutaila Umwene witu Yesu.
22 Nupya lolini! umupasi wa muzilo ukuntungulula uku Yelusalemu, nanti cakuti ntamanyile ivilancitikila kuuku,
23 cino manyile sile icakuti mu misumba yonsi ino nkapitamo umupasi wa muzilo ukanena ukuti indi nu kunyepwa umu cifungo alino nu kupita umu macuzi.
24 Lelo nsilola ukuti umi wane wacindama, cino nkalonda u kufikilizya vino ndinzile ukucita nu kumalilila umulimo uno napokelile ukufuma uku Mwene Yesu, kuli kuti kusimikila sana ilyasi lisuma pa cikuuku cikulu cakwe Leza.
25 “Nupya lolini! Manyile ukuti kusi nanti aumwi pali mwemwe wino nasimikile pa Wene alandolapo nupya.
26 Acino nkulonda muye ya kambone pa wanda wi lelo ukuti ntakweti umulandu pa wazi wa yantu yonsi,
27 pano ntafizilwe ukumunena ukulonda kwakwe Leza konsi.
28 Mwaisakamala mweineco nu kusakamala imfwele zyonsi zino umupasi wa muzilo wamusonta ukuti mwaangalila, nupya mwacema icilongano cakwe Leza cino wakazile nu wazi wa Mwanakwe.
29 Manyile ukuti nga nafumapo imimbulu iliza muli mwemwe nupya italasakamala ningo imfwele,
30 nupya antu yamwi muli mwemwe yalakatuka nu kutandika ukusambilizya ivya ufi pakuti yaponzye asambi nu kuti yayalondela.
31 “Acino muye aiteyanye, nu kwiusya ukuti pa myaka itatu kasanya nu usiku, ntatile ukumukomelezya ala nkuponya na minsozi.
32 Lyene nkumupeela kuli Leza nu kwi zwi ilikalanda pa cikuuku cakwe icikulu, ililamukomya nu kumupeela cino Leza akapeela kuli yano yasoololwa ukuya amuzilo.
33 Ntakumvilwe siuva wa muntu nanti goldi nanti ivyakuzwala.
34 Mwamanya ukuti naiombelanga pakuti naisakamala nu kusakamala yano nali nayo.
35 Namulanga muli vino nkaomba ukuti mulinzile ukwavwa atonte. Nupya mulinzile ukwiusya vino Umwene Yesu walanzile ati: ‘Mu kupeela mwaya insansa izingi ukucila izyaya umu kupokelela.’”
36 Nupya lino walanzile ivintu vii, wafukime pamwi na yonsi nu kupepa.
37 Lyene yonsi kwene yatandike ukulila nupya yakumbatile Paulo nu kumutonsola,
38 pano yuvwile sana uyi pali vino wayanenyile ukuti yataali nu kumulolapo nupya. Lyene yamusukilile ukuya mu kukwela uwato.
