Milimo ya Atumwa 25:1-27
25 Lino Fesitasi wafisile umu citungu ca Yudeya nu kutandika ukuteeka, wafumile uku Kesaliya pa cisila ca manda yatatu nu kuya uku Yelusalemu.
2 Nupya ya simapepo akalamba pamwi ni ntunguluzi zya Yayuda yamunenyile imilandu ino yapeelanga Paulo. Acino yatandike ukupaapata Fesitasi
3 ukuti atume Paulo uku Yelusalemu. Lelo yakweti ipange ilya kufisamila Paulo umu nzila pakuti yamukome.
4 Nomba Fesitasi waswike ati: “Paulo alinzile ukutwalilila ukusungwa umu Kesaliya nupya nene kwene nasya ince injeko.”
5 Nupya walanzile ati: “Fwandi lekini tupitile pamwi ni ntunguluzi zinu pakuti zikalande ndi cakuti ica cumi wacita cimwi iciipe.”
6 Lino wikazile nayo amanda umupiipi na 8 nanti 10, waile uku Kesaliya, lyene uwanda uwalondelilepo wikazile pa cilimba ca upinguzi nupya wanenyile antu ukuti ingizye Paulo umukasi.
7 Lino yamwingizye, Ayuda afumile uku Yelusalemu iimilile iyamuzinguluka, ala yakumupeela imilandu iipisye iingi ino yataasininkizye.
8 Lelo Paulo waipokolwile ati: “Ntayembukila Masunde ya Yayuda nanti ukuyembukila itempele nanti ukuyembukila Kaisale.”
9 Lyene vino Fesitasi walondanga ukutemwikwa uku Yayuda, uzizye Paulo ati: “Uzye ukulonda ukuya uku Yelusalemu akuno nkakupingwile pa milandu yii?”
10 Lelo Paulo walanzile ati: “Inimilila pa cilimba ca upinguzi cakwe Kaisale pano ndinzile ukupingwilwa. Ntacita iciipe icili consi uku Yayuda wakwe vino nawe kwene wamanya.
11 Ndi cakuti umu cumi nene kacita wa viipe nupya nacita umulandu wa kufwilapo, ntakukana ukufwa; lelo ndi cakuti umu milandu ino antu yaa iyampeela musi ivisinka, kusi umuntu aakweti insambu izya kuntwala kuli aliyo. Namatwala umulandu kuli Kaisale!”
12 Lyene pa cisila cakuti Fesitasi walanzyanya ni mpandamano izyakolongine, walanzile ati: “Watulenga kuti utwale umulandu kuli Kaisale, fwandi kuli Kaisale kwene akuno ulaya.”
13 Pa cisila ca manda yamwi, Umwene Agilipa na Benise yafisile umu Kesaliya uku kulamuka Fesitasi.
14 Vino ikazileko amanda iingi, Fesitasi walondolwelile Umwene Agilipa umulandu wakwe Paulo ati:
“Kuli umuntu umwi wino Felikisi wasiile umu cifungo,
15 nupya lino nali umu Yelusalemu, ya simapepo akalamba ni ntunguluzi zya Yayuda yamupeezile umulandu nupya yaalenzile ukuti afululwe.
16 Lelo nayanenyile ukuti isunde lya ina Loma litazumilizya ukupeela umuntu ali wensi kuli yano yakumupeela umulandu lino atatala walolana nayo pakuti aipokolole ku mulandu uno apeezilwe.
17 Fwandi lino yafisile kuno, ntasumvile insita, uwanda uwalondelilepo nikazile pa cilimba ca upinguzi nu kunena antu ukuti ingizye Paulo umukasi.
18 Lino aamupeelanga umulandu imiliile, yatalanzile iviipe ivili vyonsi vino nenekelanga pali aliwe.
19 Yapaazyanyanga sile nawe pa mipepele yao na pa muntu uwi zina lyakuti Yesu, uwafwile lelo wino Paulo watangi ali nu umi.
20 Vino ntamanyile ivya kumala ivikanza vii, nuzizye Paulo ndi cakuti angatemwa ukuya uku Yelusalemu akuno akapingwilwe pa milandu iiyo.
21 Lelo lino Paulo walenzile ukuti asungwe umu cifungo pakuti Ogasitasi* akamupingule, nalanzile ukuti asungwe ukufikila nkamutume kuli Kaisale.”
22 Lyene Agilipa wanenyile Fesitasi ati: “Ningatemwa ukuyuvwila uku muntu wiyo.” Nawe wamunenyile ati: “Ulamuvwa mutondo.”
23 Fwandi pa wanda uwalondelilepo, Agilipa na Benise ingiile umu cilye ala yakupita cilumba cilumba pamwi na akalamba ya yasilika na aonsi acindikwe amu musumba; nupya lino Fesitasi walanzile ukuti yalete Paulo umukasi, yamutwazile.
24 Lyene Fesitasi walanzile ati: “We Mwene Agilipa na mwensi mwemuno muli pano, lolini umuntu wino Ayuda yonsi akuno na aku Yelusalemu yandenzile ala yakupunda yakuti alinzile ukukomwa.
25 Lelo naweni ukuti atakweti umulandu wa kufwilapo. Acino lino walenzile ukuti atwale umulandu wakwe kuli Ogasitasi, napingwilepo kumutuma.
26 Lelo ntakweti visinka vino ningalembela Umwene wane pa muntu wii. Acino namuleta kuli mwemwe mwensi, sana sana kuli wewe kwene Mwene Agilipa, pakuti umulandu wakwe nga wapitulukwamo, alino nkwate ivyakulemba.
27 Pano nemo nkulola ukuti cisi ningo ukutuma umufungwa ukwaula ukulanda umulandu uno acisile.”
Mafutunoti
^ Lii i lumbo lyakwe kateeka wa mu Loma, asi zina lya muntu
