Milimo ya Atumwa 26:1-32
26 Agilipa wanenyile Paulo ati: “Watuzumiliziwa ukuivwangila wemwineco.” Lyene Paulo watambaliike ikasa nu kutandika ukuivwangila ati:
2 “Mwene Agilipa, indi ni nsansa pa kuivwangila kuli wewe pa wanda wi lelo pa milandu yonsi ino Ayuda yampeela,
3 pano wemo wamanya ningo intambi zyonsi izya Yayuda ni vikanza vyao. Acino nkukupaapata ukuti unteekelele lino ukuvwa kuli vino nkulanda.
4 “Ukufuma lino nali umwance ala nkwikala na amu luko lwane alino nu mu Yelusalemu, umi wane wamanyikwa ningo uku Yayuda yonsi
5 yano yamanyile ukufuma mpiti, nupya nga yakulonda yangamunena ukuti nali umwi umba lya Yafaliseo, yene yakomya sana masunde ukucila Ayuda yauze asyala.
6 Nomba lyene nkupingulwa pa mulandu wakuti nataila ulayo uno Leza walavile ivikolwe vitu;
7 ulayo kwene uu auno amu mitundu itu 12 yakalolela ukuti ukafikiliziwe lino yakuombela Leza lyonsi umusanya nu usiku. Mwene, pa upaalilo kwene uu apano Ayuda yakumpeelela umulandu.
8 “U mulandu ci uno mukaelenganyizizya ukuti Leza atanga atuutulule afwe?
9 Nemo namanyile ukuti ndinzile ukucita ivili vyonsi pakuti ndwisye izina lyakwe Yesu uwa ku Nazaleti.
10 Vikwene avino nacisile umu Yelusalemu, nayalile amuzilo aingi umu vifungo, pano ya simapepo akalamba yampeezile amaka; nupya lino amuzilo yayanga apiipi nu kukomwa, nazumilizyangako.
11 Nayacuzyanga umu masunagogi yonsi nu kuyapatikizya ukuti yate ukuya nu utailo; nupya vino nayasokiile sana, nayakonkelanga nu mu misumba yuze iya kutali uku kuyacuzya.
12 “Lyene lino nayanga uku Damasika ala ya simapepo akalamba iyampeela amaka ni nsambu,
13 musanya pakasi naweni uluswepo Mwene, lwaengesanga ukucila uluswepo lwa musanya nupya lwanzingulwike pamwi na yano nali nayo.
14 Nupya lino swensi twaponyile pansi, nuvwile izwi likunena umu Ciebele likuti: ‘Saulo, Saulo, u mulandu ci uno ukuncuzizya? Ukuicisa wemwineco vino ukuipantola wa ng’ombe ino ikupantola uku citunkwilo.’*
15 Lelo nuzizye inti: ‘Wewe weni Mwene?’ Nawe Umwene wangaswike ati: ‘Nene Yesu, wino ukucuzya.
16 Lelo katuka uwimilile. Indolekela kuli wewe pakuti nkusoolole uye umuomvi wane nupya ulaya inte pa vintu vino walola na pali vino ndalenga ukuti ukalole.
17 Nupya ndakupususya uku yantu yaa nu ku yantu ya mu nko kuno nkukutuma
18 kuti ukayule amanso yao, ukuyafumya umu mfinzi nu kuyatwala umu luswepo nu kuyafumya kuli Satana pakuti yaye kuli Leza, pakuti yangelelwa imembu zyao nu kupokelela upyanyi pamwi na asangululwa pa mulandu nu kuntaila.’
19 “Fwandi Mwene Agilipa, ntaasuuzileko sile uku cilolwa cino naweni ukufuma ukwi yulu,
20 lelo natandikilepo ukusimikila umu Damasika alino inja uku Yelusalemu, ni ncende zyonsi izya mu Yudeya, alino nu ku yantu ya mu nko, nayanenanga ukuti yafwile ukulapila nu kuwela kuli Leza ukupitila umu kuomba imilimo ikalangilila ukulapila.
21 Ukwene uli mulandu uno Ayuda yandemiile umwi tempele nupya yalondanga ukunkoma.
22 Lelo pa mulandu wakuti Leza wangavwanga, natwalilila ukufika na ndakai ukusimikila uku yapiina na akankala, pa vintu vino ya Kasesema kumwi na Mose yalanzile ukuti vili nu kucitika—
23 ukuti Klistu wali nu kucula nupya vino u wali nu kutandikilapo ukutuutululwa ukufuma uku yafwe, wali nu kusimikila nu kuleta uluswepo uku yantu yaa nu ku yantu ya mu nko.”
24 Lyene lino Paulo acili akuvwanga, Fesitasi wapunzile ati: “Paulo watupena! Kusambilila sana iikukupenya!”
25 Lelo Paulo waswike ati: “Ntapenyile, musambazi Fesitasi, vino nkulanda i vya cumi nupya i vya mano.
26 Pano umwene wino nkulandako ukwaula intete wamanya ningo ivintu vii vyonsi; nupya nasininkizya ukuti kusi nanti acimwi pa vintu vii cino atamanya, pano kusi icacitikila umu nkama.
27 Mwene Agilipa, uzye wazumila muli vino ya Kasesema yalemvile? Manyile ukuti wazumila.”
28 Lelo Agilipa wanenyile Paulo ati: “Umu nsita sile inono nga wandenga ukuya umwina Klistu.”
29 Paulo nawe walanzile ati: “Nkupepa kuli Leza ukuti nanti sile umu nsita inono nanti ikalamba, wewe kwene pamwi na yonsi akuvwa kuli nene pa wanda wi lelo cingazipa nga mwali wakwe nene, lelo nsikulonda kuti namwe munyepwe umu maceni wakwe nene.”
30 Lyene umwene Agilipa wakatwike kumwi na kateeka alino na Benise na onsi aali pamwi nayo.
31 Lelo lino yafumanga, yatandike ukulanzyanya iyati: “Umuntu wii pasi cino akucita cino angafwilapo nanti ukunyepelwapo umu maceni.”
32 Lyene Agilipa wanenyile Fesitasi ati: “Umuntu wii akana ukutwala umulandu kuli Kaisale nga wasapulwa.”
Mafutunoti
^ Icitunkwilo a kamuti akasongole akakaomviwa uku kucincizya masae.
