Milimo ya Atumwa 5:1-42
5 Lyene umuntu umwi uwi zina lyakuti Ananiya pamwi na Safila umuci wakwe, yakazizye impanga yao imwi.
2 Lelo wafisile impiya zimwi nu muci kwene wamanyile nupya izyasyala a zino watwazile uku yatumwa.
3 Nomba Petulo uzizye ati: “Ananiya, u mulandu ci uno walekela Satana ukukutunka ukuti ubepe umupasi wa muzilo nu kufisa impiya zimwi pali zino wakazizye impanga?
4 Uzye lino utali ukazye impanga, itaali iyako? Nupya pa cisila ca kukazya, uzye impiya zitaali mu maka yako? U mulandu ci uno welenganyizizye ukucita icintu cii iciipe? Utabefile antu lelo watubepa Leza.”
5 Lino Ananiya uvwile mazwi yayo, waponyile nu kufwa. Nupya yonsi auvwile icacitiike yatiinyile sana.
6 Lyene alumendo yamupomvile umu nsalu, iyamusenda nu kuyamuziika.
7 Lyene lino papisile umupiipi na maawazi yatatu, umuci wakwe wizile ala atamanyile icaticicitika.
8 Petulo wamuzizye ati: “Nene, uzye zikwene ali mpiya zino wemo nu wako mwakazizyepo impanga?” Nawe waswike ati: “Ee a zizyo kwene.”
9 Lyene Petulo wamuzizye ati: “U mulandu ci uno mweili mwazumilizyanyizye ukwezya umupasi wakwe Yeova? Lola! Yano yafuma umu kuziika uwako yali umupiipi nu mulyango nupya naawe kwene yamakusenda.”
10 Lilyo kwene waponiile pa nkoleelo yakwe Petulo nu kufwa, lino alumendo iingile yazanyile watafwa nupya yamusenzile nu kuyamuzika umupiipi na iya.
11 Fwandi yonsi amu cilongano yuvwile sana intete kumwi sile na yonsi auvwile ivyacitike.
12 Nupya atumwa yatwalilile ukucita ivimanyililo ni vizungusyo ivingi mu yantu; nupya yonsi yakolongananga umu ncende ino yamanga ukuti Lukungu Lwakwe Solomoni.
13 Cumi kutaali yauze aasifile ukuilunda kuli aliyo, lelo antu yalandanga sana ivisuma pali aliyo.
14 Nupya aonsi na anaci aingi atailanga Umwene yatwalilile ukuilundako.
15 Yatwalanga na alwale umu miseo ikalamba nu kuyalalika pa tumabedi na pa vitala pakuti lino Petulo akupita nanti sile icinzingwa cakwe cingapita pali yamwi.
16 Nupya antu aingi ukufuma umu misumba iyali umupiipi na Yelusalemu yayanga ala yasenzile alwale na yano yaculanga ku mipasi ikowele nupya yonsi kwene yapolanga.
17 Lelo simapepo mukalamba wakatwike kumwi na yano wali nayo, aali umwi umba lya mapepo lya Yasaduki nupya yali sana nu uzuwa.
18 Yalemile atumwa nu kuyayalila mu cifungo ca yantu yonsi.
19 Lelo usiku, malaika wakwe Yeova waile ayula imilyango ya pa cifungo ayafumya nu kuyanena ati:
20 “Yangini umwi tempele, mukanena antu pa mazwi yonsi aakalanda pa umi uu.”
21 Lino yuvwile vivyo, iingile umwi tempele katondotondo nu kutandika kusambilizya.
Lyene lino simapepo mukalamba na yano wali nayo yafisile, yakolonginye icilye ca Sanihedilini* kumwi ni ntunguluzi zyonsi zya yana yakwe Izlaeli nupya yatumile aakuyasenda atumwa umu cifungo nu kuyaleta kuli aliyo.
22 Nomba lino aakalamba ya yalinzi yafisile yatayazanyile umu cifungo. Fwandi yaswilile nu kuyalanda vino yazanyile,
23 yatiile: “Ituzana icifungo icifunge ningo nupya na alinzi ala yaimi pa milyango, nomba lino ituyula, tutazanyilemo ali wensi.”
24 Lino kapitao wa pi tempele na ya simapepo akalamba yuvwile vivyo, cayapezizye mano pano yatamanyile ivyali nu kucitika.
25 Lelo umwi waile ayanena ati: “Lolini! Aonsi yano mwayalile umu cifungo yali umwi tempele yakusambilizya antu.”
26 Lyene kapitao kumwi na akalamba ya yalinzi yapisile iyaya iyayasenda, lelo yatayasenzile umu unkalwe, pano yatiinanga ukuti antu yamayatama na mawe.
27 Fwandi yayaleesile nu kuimika pa nkoleelo ya cilye ca Sanihedilini. Lyene simapepo umukalamba
28 wayanenyile ati: “Twamukonkomizye ukuti mute ukusambilizizya umwi zina lii, nomba lolini! imusalanganya ivisambilizyo vinu mu Yelusalemu monsi, nupya mukulonda ukuleta uwazi wa muntu wii pali sweswe.”
29 Lyene Petulo na atumwa yauze yalanzile iyati: “Tufwile ukuvwila Leza ukucila ukuvwila antu.
30 Leza wa vikolwe vitu, watuutulwile Yesu wino mwakomile lino mwamupoopiile pa cimuti.
31 Leza wamucindamike ukuya Umwimilizi Mukalamba nupya Kapususya nu kumwika kwi kasa lyakwe ili lunji, pakuti alenge aina Izlaeli ukulapila nu kwelelwa imembu.
32 Nupya sweswe ya kambone pa vintu vii, pamwi nu mupasi wa muzilo uno Leza wapeela kuli yano yakamuvwila.”
33 Lino yuvwile vivyo, yasosile sana nupya yalondanga nu kuyakoma.
34 Lelo Umufaliseo umwi uwi zina lyakuti Gamalieli, uwali kasambilizya wa masunde umucindikwe sana na antu yonsi, wakatwike mu cilye ca Sanihedilini nu kulanda ukuti yatale yafumizye antu yayo panzi pa nsita inono.
35 Lyene walanzile ati: “Mwe ina Izlaeli, cenjelini pali vino mukulonda ukucita ku yantu yaa.
36 Ku cisila, Teudasi wakatwike, uwailolanga ukuti wali umucindame sana, nupya antu umupiipi na 400 yailunzile kuli aliwe. Lelo wakomilwe, na yonsi aamulondelanga yaapasike nupya mapange yao yataomvile.
37 Lyene palondeliile Yuda umwina Galili, nawe wakatwike umu manda yano yapendanga antu, nupya wakweti aamulondelanga. Umuntu wii nawe kwene wafwile, na yonsi aamulondelanga yasalangiine.
38 Fwandi ukulingana ni vikucitika, nkumunena ukuti mutalesya antu yaa, lelo yatiini. Pano ndi cakuti ipange lii nanti umulimo uu vyafuma uku yantu, vitalatwalilila;
39 lelo ndi cakuti vyafuma kuli Leza, mutalayacimvya. Lelo mulazana ukuti mukulwisya Leza.”
40 Lyene yuvwile vino walanzile, nupya yamile atumwa, iyayuma ivikoti nu kuyakonkomezya ukuti yate ukulandila umwi zina lyakwe Yesu, lyene yayanenyile ukuti yaapita.
41 Fwandi yafumile umu cilye ca Sanihedilini ala yali ni nsansa pano yazumiliziwe ukusaalulwa pa mulandu ni zina lyakwe.
42 Nupya cila wanda yasambilizyanga nu kusimikila ilyasi lisuma pali Klistu Yesu umwi tempele nu ku ng’anda ni ng’anda ukwaula ukuta.
Mafutunoti
^ Sanihedilini cali i cilye icikalamba ica Yayuda.
