Milimo ya Atumwa 6:1-15
6 Lyene umu manda yaaya lino asambi yavulilangako, Ayuda avwanganga Icigiliki yatandike ukuilizyanya pa Yayuda avwanganga Iciebele, pano ya mukamfwilwa yao yatapeelwanga vino yalinzile ukupeelwa cila wanda.
2 Fwandi atumwa 12 yamile asambi yonsi nu kulanda iyati: “Citanga cizipe tusye twata umulimo wa kusambilizya izwi lyakwe Leza nu kutandika ukwankanya ivyakulya pa matebulo.
3 Acino ina itu soololini aonsi 7 atailwe* ukufuma muli mwemwe, aaya sana nu mupasi na mano pakuti tuyasonte ukuomba umulimo uu ucindame;
4 lelo swemo tumaika mano uku kupepa nu kusambilizya izwi lyakwe Leza.”
5 Asambi yonsi yatemilwe vino atumwa yalanzile, nupya yasoolwile Sitivini umonsi uwali sana nu utailo nu mupasi wa muzilo, alino na Filipi, Polokolasi, Nikana, Timoni, Pamenasi na Nikolasi uwa ku Antioki uwizile aya umu mipepele ya Yayuda.
6 Yayatwazile uku yatumwa, nupya pa cisila ca kupepa, yaisilepo makasa.
7 Fwandi izwi lyakwe Leza lyatwalilile ukusalangana, na asambi yavulilangako sile umu Yelusalemu; nupya ya simapepo aingi yataile.
8 Lyene Sitivini wino Leza watemilwe sana nupya wino wapeezile maka, wacitanga ivizungusyo ivikalamba ni vimanyililo umu yantu.
9 Lelo antu yamwi aafumile umwi umba lino yamanga ukuti Isunagogi* Lya Yakululwe pamwi na ina Kuleni yamwi na ina Alekizandilya, alino na ina Kilikiya yamwi na aku Asia, iizile uku kupaazyanya na Sitivini.
10 Lelo yafizilwe ukupaazyanya nawe pano walandanga na mano nupya umupasi wa muzilo wamwazwanga.
11 Lyene yuvwanyile na antu mu nkama akuti yakalande yati: “Twamuvwile akulanda amazwi ya miponto pali Mose na pali Leza.”
12 Nupya yalenzile antu ukusoka kumwi ni ntunguluzi zya Yayuda na ya kalemba, nayo yaile kuli aliwe lilyo kwene, iyamulema uku maka nu kumutwala uku cilye ca Sanihedilini.*
13 Nupya yaleesile ya kambone ya ufi, aalanzile iyati: “Umuntu wi asita ukulanda mazwi ya miponto pa cifulo cii ca muzilo na pa Masunde.
14 Twamuvwile akulanda akuti wii Yesu uwa ku Nazaleti alawisya icifulo cii nu kusenula intambi zino twapokelile ukufuma kuli Mose.”
15 Nupya lino yonsi aatenzi umu cilye ca Sanihedilini yamulolekisye, yaweni ukuti icinso cakwe calolekanga wa cinso cakwe malaika.
Mafutunoti
^ Nanti “aonsi 7 aakasimikwa ningo.”
^ I cikuulwa muno Ayuda yapepelanga nu kubelengela Malembo.
^ Sanihedilini cali i cilye icikalamba ica Yayuda.
