Milimo ya Atumwa 8:1-40
8 Saulo wazumilizye ukuti Sitivini akomwe.
Pa wanda kwene uuwa, yatandike ukucuzya sana aali umu cilongano ca mu Yelusalemu; yonsi yasalanganiile umu mpanga ya Yudeya na Samaliya kufumyako sile atumwa.
2 Lelo antu atiinanga Leza, yasenzile Sitivini nu kuyamuziika nupya yamuloosizye sana.
3 Saulo watandike ukuzanza amu cilongano. Wingilanga umu ng’anda yonga na yonga ala akulema aonsi na anaci nu kuyatwala ku cifungo.
4 Nomba aasalangiine yafumile yakusimikila ilyasi lisuma pali Leza.
5 Lyene Filipi waile uku musumba wa Samaliya nupya watandike ukusimikila antu pali Klistu.
6 Antu yonsi iisileko sana mano kuli vino Filipi walandanga ala yakukutikisya nu kulola ivizungusyo vino wacitanga.
7 Pano aingi yali ni mipasi ikowele, nupya imipasi iiyo yapundanga ni izwi ilikalamba nu kufuma. Nupya aingi ali ivite na alemale yapolanga.
8 Acino antu yasansamwike sana umu musumba uuwa.
9 Lyene umu musumba mwali umuntu umwi uwi zina lyakuti Simoni, wino ku cisila wacitanga ivya maleele nu kuzungusya aina Samaliya, wailolanga ukuti wali umucindame sana.
10 Antu yonsi kutandikila pa munono kufika pa mukalamba, iisile sana mano kuli aliwe nupya yalandanga yakuti: “Umuntu wii Leza wamupeela sana maka.”
11 Fwandi iisileko sana mano kuli aliwe pa mulandu wakuti wayazungwisye pa nsita itali ku maleele yakwe.
12 Lelo aonsi na anaci yabatiziwanga lino yataile Filipi uwasimikilanga ilyasi lisuma pa Wene wakwe Leza na pi zina lyakwe Yesu Klistu.
13 Simoni nawe kwene wataile, nupya pa cisila ca kubatiziwa, watwalilile ukuya pamwi na Filipi; nupya wazungwike pa vizungusyo vino walolanga ni milimo ya maka iyacitikanga.
14 Lino atumwa aali umu Yelusalemu yuvwile ukuti aina Samaliya iyataila izwi lyakwe Leza, yatumileko Petulo na Yoani;
15 nayo yaileko nu kuyayapepela pakuti yapokelele umupasi wa muzilo.
16 Pano alanga utatala wiza pali ali wensi, lelo ala yabatiziwa sile umwi zina lya Mwene Yesu.
17 Lyene iisile makasa pali aliyo, nayo yapokelile umupasi wa muzilo.
18 Lyene lino Simoni waweni ukuti antu yakupokelela umupasi wa muzilo ndi cakuti atumwa yaikapo makasa, walavile atumwa ukuti amayapeela impiya,
19 wayanenyile ati: “Nani kwene mpeelini maka yayo, pakuti wensi wino nikapo makasa angapokelela umupasi wa muzilo.”
20 Lelo Petulo wamunenyile ati: “Kafwile kuko pamwi ni mpiya zyako, pano ukwelenganya ukuti ungakala upe wakwe Leza ukuomvya impiya.
21 Utalinzile ukuombako umulimo uu, pano umwenzo wako usi wa cisinka kuli Leza.
22 Fwandi lapila pali cino wacita nu kupaapata kuli Yeova pakuti limwi ungelelwa uku viipe ivili umu mwenzo wako;
23 pano indola ukuti uli wakwe poizoni ikalipisye nupya wateekwa uzya uku viipe.”
24 Lyene Simoni wayanenyile ati: “Mpaapatiliniko kuli Yeova pakuti vyonsi vino imulanda vitancitikila.”
25 Pa cisila ca kusimikila sana nu kulanda pi zwi lyakwe Yeova, yaswilile uku Yelusalemu, nupya yafumile yakusimikila ilyasi lisuma umu mizi iingi iya ina Samaliya.
26 Lelo malaika wakwe Yeova wanenyile Filipi ati: “Katuka yanga uku kaeya umu museo uwafumilila uku Yelusalemu ukuya uku Gaza.” (umuseo wa mulwanga.)
27 Lino uvwile vivyo, wapisile. Nupya kwali mutungwi* umwina Etiopia wino namwene Kandake uwa ku Etiopia wapeezile amaka, nupya u wangalilanga ivyuma vyakwe namwene vyonsi. Umuntu wii waile uku Yelusalemu mu kupepa,
28 lino wawelanga, wali umwi celeta lyakwe ala akubelenga ivyalembwa vyakwe kasesema Ezaya ni izwi ilyuvwike.
29 Lyene umupasi wanenyile Filipi iuti: “Yanga ukazane iceleta liili.”
30 Filipi wasimwile aya azana iceleta nupya uvwile mutungwi akubelenga ivyalembwa vyakwe kasesema Ezaya, lyene wamuzizye ati: “Uzye ukuvwa vino ukubelenga?”
31 Nawe waswike ati: “Ninguvwa uli ukwaula uwa kungavwa?” Lyene wapaapasile Filipi ukuti akwele umwi celeta nu kwikala nawe.
32 Ciputulwa ca Malembo cino wabelenganga cikati: “Yamusenzile wa mfwele umu kumukoma, nupya ataalanzile icili consi, wali wa kana ka mfwele akasikulila lino yakukapela mavumbu.
33 Yamucuzizye nu kumufyenga. A weni alalondolola vyonsi pa nkulo yakwe? Pano wakomilwe pano nsi.”
34 Mutungwi wanenyile Filipi ati: “Ndondolweleko, uzye kasesema walandanga pali weni? Uzye wailandanga umwineco nanti walandanga pa muntu muze?”
35 Lyene Filipi watandike ukulanda, nupya kutandikila ni lembo kwene lii, wamusimikile ilyasi lisuma pali Yesu.
36 Lino yapitanga umu museo, yafisile apaali amanzi, nupya mutungwi walanzile ati: “Lola! Manzi aeya; i cani icikundesya ukubatiziwa?”
37 *——
38 Lyene walanzile ukuti iceleta limilile, nupya Filipi na mutungwi ingiile umu manzi, na Filipi abatizya mutungwi.
39 Lino yafumile umu manzi, umupasi wakwe Yeova wasenzile Filipi lilyo kwene, nupya mutungwi atatazile amulolepo, nomba wapisile ala ali ni nsansa.
40 Lelo Filipi waizanyile ali uku Asidodi, nupya wapisile umu ncende iiya ala akusimikila ilyasi lisuma umu misumba yonsi suka ayafika ku Kesaliya.
