Mpendwa 23:1-30
23 Lyene Balamu wanenyile Balaki ati: “Kuula maulambo 7 pa ncende yii, nupya umpekanyizizye ya cipambasi 7 na ya suuku 7.”
2 Lilyo kwene sile Balaki wacisile vino Balamu walanzile. Nupya Balaki na Balamu yapeezile cipambasi na suuku pa ulambo onga na onga.
3 Lyene Balamu wanenyile Balaki ati: “Ikala pakwene umupiipi ni lambo lyako ilya koca, nemo nimapita. Limwi Yeova amalolekela kuli nene. Nimakunena vyonsi vino amanena.” Fwandi waile pa mwamba usenguke.
4 Lyene Leza walolekile kuli Balamu, Balamu nawe wamunenyile ati: “Impekanya maulambo 7, nupya impeela cipambasi na suuku pa ulambo onga na onga.”
5 Yeova wanenyile Balamu ivya kuyalanda, nupya wamunenyile ati: “Swilila kuli Balaki, nu kuyamunena vino nakunena.”
6 Fwandi waswilile nupya wazanyile Balaki ni ntunguluzi zyonsi izya ku Moabu ale iimilila mupiipi ni lambo lya koca.
7 Lyene Balamu walandiile umwi pinda ati:
Balaki umwene wa ku Moabu watandeta ukufuma ku Alamu,Kufuma uku myamba ya ku ufumondaka, watati:
‘Iza untiipile Yakobo.
Iza ukalipile Izlaeli.’
8 Ningatiipa uli antu yano Leza atatiifile?
Nupya ningakalipila uli antu yano Yeova atakalipile.
9 Nkuyalola ukufuma pa mawe papela,Nupya nkuyalola ukufuma pa tumyamba.
Antu yaa yakaikala yonga;Yasiipendela pamwi na antu ya mu nko.
10 A weni aangapenda ya mwana Yakobo aavula wa lukunguNanti ukupenda sile iciputulwa conga pa viputulwa 4 ivya Ina Izlaeli?
Lekini imfwe wa yalungami,Nupya lekini impela yane iye wa mpela yao.”
11 Lyene Balaki uzizye Balamu ati: “U mulandu ci uno wancitila vii? Nakuleesile pakuti uwize utiipwile alwani yane, nomba lyene utacisile vivyo, lelo watuyapaala.”
12 Balamu nawe waswike ati: “Uzye ntakunenyile ukuti nimalanda sile vino Yeova wataanena?”
13 Balaki walanzile ati: “Twapita uku ncende yuze kuno umaya ukimilile pakuti uyalole. Umaya ukalole sile yamwi; usikuya ukalole yonsi. Kuuku kwene akuno ukayantiipile.”
14 Fwandi wamutwazile uku ncende iya Zofimu, papela ya mwamba wa Pisiga, nupya wakuuzile maulambo 7 nu kupeela cipambasi na suuku pa ulambo onga na onga.
15 Balamu wanenyile Balaki ati: “Ikala pakwene umupiipi ni lambo lyako ilya koca, nemo nimaya umu kulanda na Leza.”
16 Yeova wanenyile Balamu ivya kuyalanda nupya wamunenyile ati: “Swilila kuli Balaki, nu kuyamunena vino nakunena.”
17 Balamu nawe waswilile kuli Balaki nupya wazanyile akumulolela mupiipi ni lambo lyakwe ilya koca, wali pamwi ni ntunguluzi zya ku Moabu. Balaki wamuzizye ati: “I vyani vino Yeova watalanda?”
18 Lyene walandiile umwi pinda ati:
“Balaki katuka, nupya uvwa kuno.
Uvwa vino nkulanda, we mwana Zipoli.
19 Leza ataaya wa muntu aakabepa,Nanti wa mwana wa muntu aakasenuka.
Nga walanda cimwi, uzye akafilwa ukucicita?
Nga walaya cimwi, uzye akafilwa ukufikilizya?
20 Lola! Niiza kuno umu kupaala;Nupya Leza watapaala, nupya ntanga nsenule ipaalo.
21 Asizumilizya ivya maleele ivili vyonsi ukwiza pali Yakobo,Nupya asizumilizya intazi ili yonsi ukwiza pali Izlaeli.
Yeova Leza wakwe ali nayo,Nupya yakalumbanya Leza umwene wao.
22 Leza aakuyafumya umu Ijipti.
Kuli aliyo waya wa mpembe zyakwe cipambasi wa mu mpanga.*
23 Pano kusi ivya ulozi ivingaomba pali Yakobo,Nanti ukusapoola ukuli konsi ukungaomba pali Izlaeli.
Pa nsita yii antu yangalanda pali Yakobo na Izlaeli ukuti:
‘Lolini vino Leza watacita!’
24 Antu yalakatuka wakwe cisama,Wakwe viivi kwene vino cisama akakatuka avino nayo kwene yalakatuka.
Yatalalaala wakwe viivi kwene vino cisama asilaala kufikila walya inyama ino watalemaNu kumwa wazi wa nyama zino watakoma.”
25 Lyene Balaki wanenyile Balamu ati: “Ndi cakuti utayatiipwizile ale utalinzile nu kuyapaala.”
26 Balamu waswike Balaki ati: “Uzye ntali nakunena ukuti, ‘Nimacita vyonsi vino Yeova walanda’?”
27 Balaki wanenyile Balamu ati: “Leka nkutwale uku ncende na yuze nupya kwene. Limwi kuuku kwene akuno Leza wa cumi angalola ukuti cili ningo ukuti untiipile Aina Izlaeli.”
28 Lyene Balaki wasenzile Balamu pa mwamba wa Peoli, uwalozyanya na Yesyimoni.*
29 Lyene Balamu wanenyile Balaki ati: “Kuula maulambo 7 pa ncende yii, nupya umpekanyizizye ya cipambasi 7 na ya suuku 7.”
30 Balaki wacisile viivi kwene vino Balamu walanzile, nupya wapeezile cipambasi na suuku pa ulambo onga na onga.
