Nehemiya 1:1-11
1 Yaa ali mazwi yano Nehemiya* mwana Hakaliya walanzile: Umu mwezi wa Kisilevi* umu mwaka uwalenga 20, nali umwi sano umu Syusyani.*
2 Pa nsita iiya, Hanani umwinane wafisile ala ali na aonsi aafumile uku Yuda, nayuzizye pa Yayuda aapuswike umu uzya alino na pa musumba wa Yelusalemu.
3 Nayo yaswike iyati: “Aasyala umu citungu aapuswike umu uzya yali umu ntazi iipisye nupya azewane. Viumba vya musumba wa Yelusalemu vicili vyapona ni mpongolo zicili zyapya.”
4 Lino nuvwile sile mazwi yayo, nafukime nu kutandika ukuloosya nu kulila pa manda yamwi, natwalilile ukwikala ukwaula ukulya ala nkupepa kuli Leza wa kwi yulu.
5 Napefile inti: “We Yeova, Leza wa kwi yulu wemuno wakulisya nupya uwa kuzungusya, wemuno ukasunga upangano wako nu kulanga ukutemwa kwa cumi kuli yano yakutemwa nupya aakalondela masunde yako,
6 si yula manso yako nupya si leka matwi yako yuvwe ukwi ipepo lino ne muomvi wako nkupepa kuli wewe ilelo, umusanya nu usiku ukulozya uku Ina Izlaeli aomvi yako, nkusokolola imembu zyonsi zino Aina Izlaeli yacita kuli wewe. Nemo na amu ng’anda yakwe tata twayembuka.
7 Itucita icintu cipisye pa kukana ukulondela masunde yako yano wapeezile Mose umuomvi wako.
8 “Si iusya mazwi yano wanenyile umuomvi wako Mose aakuti: ‘Ndi cakuti mwakana ukuya aacisinka Ndamusalanganyizizya umu yantu ya mu nko.
9 Lelo ndi cakuti mwawela kuli nene nu kukonka masunde yane nu kuyuvwila, nanti cakuti mulasalangana ukufika ukwapelela iyulu, ndamukolonganika nu kumuleta uku ncende ino nasoolola ukwikako izina lyane.’
10 Mwene, aaomvi yako nupya aantu yano wakulwile ukuomvya maka yako akalamba.
11 We Yeova si kutika ukwi ipepo lya muomvi wako nu kwi ipepo lya yaomvi yako aakatiina izina lyako, nupya si leka umwene aye ni cikuuku kuli nene nu kunzumilizya ukucita vino namamulenga ilelo.”
Nene napeelanga umwene ivyakumwa.
