Nehemiya 12:1-47
12 Ya simapepo na Ina Levi aapisile pamwi na Zelubabeli mwana Syeatieli na Yesyua aeya: Selaya, Yelemiya, Ezila,
2 Amaliya, Maluki, Hatusyi,
3 Syekaniya, Leumu, Melemoti,
4 Ido, Ginetoi, Abiya,
5 Miyamini, Maadiya, Biliga,
6 Syemaya, Yoyalibu, Yedaya,
7 Salu, Amoki, Hilikiya, na Yedaya, yakwene aali akalamba yakwe ya simapepo na ina yao aaliko umu manda yakwe Yesyua.
8 Aina Levi a Yesyua, Binui, Kadimiyeli, Syelebiya, Yuda, na Mataniya uwatungululanga umu nyimbo zya kutaizya kumwi na ina yakwe.
9 Na ina yao, kuli kuti Bakibukiya na Uni aalozyanyanga nayo pa nsita ino yakuomba ulinzi.
10 Yesyua wizile aya isi wakwe Yoiyakimu, Yoiyakimu nawe wizile aya isi wakwe Eliyasyibu, Eliyasyibu nawe wali a isi wakwe Yoiyada.
11 Yoiyada nawe wali a isi wakwe Yonatani, Yonatani nawe wali a isi wakwe Yadua.
12 Mu manda yakwe Yoiyakimu, ya simapepo, kuli kuti akalamba ya ndupwa yaali aeya: muli Selaya wali a Melaya, muli Yelemiya wali a Hananiya;
13 muli Ezila wali a Mesyulamu, muli Amaliya wali a Yeoanani;
14 muli Maluki wali a Yonatani, muli Syebaniya wali a Jozefu;
15 muli Halimu wali a Adina, muli Melaiyoti wali a Helikai;
16 muli Ido wali a Zekaliya, muli Ginetoni wali a Mesyulamu;
17 muli Abiya wali a Zikilai, muli Miniyamini, . . . ;* muli Moadiya wali a Pilitai;
18 muli Biliga wali a Syamua, muli Syemaya wali a Yeonatani;
19 muli Yoyalibu wali a Matenai, muli Yedaya wali a Uzi;
20 muli Salai wali a Kalai, muli Amoki wali a Ebeli
21 muli Hilikiya wali a Hasyabiya, na muli Yedaya wali a Netaneli.
22 Akalamba ya mu ndupwa zya Ina Levi umu manda yakwe Eliyasyibu, aalemvilwe a Yoiyada, Yoanani na Yadua, nupya yaali aa simapepo ukufika umu manda ya mwene Dalyusi uwa ku Pesya.
23 Aina Levi aali akalamba ya ndupwa yalemvilwe umwi buku muno yalembanga ivyacitikanga mpiti pa nsita iiya, ukufika umu manda yakwe Yoanani mwana Eliyasyibu.
24 Akalamba ya Ina Levi aeya, Hasyabiya, Syelebiya, na Yesyua mwana Kadimiyeli, nupya aina yao imilile ale iyalozyanya nayo ala ya kulumbanya nu kutaizya Leza kulingana na vino Devedi umuntu wakwe Leza wa cumi walanzile, maumba ya yalinzi iimililanga ala iyalozyanya na auze.
25 Mataniya, Bakibukiya, Obadiya, Mesyulamu, Talimoni, na Akubu yalindanga imiputule ya kusungilamo iviya iyayelile umupiipi ni mpongolo.
26 Yakwene aombanga umu manda yakwe Yoiyakimu mwana Yesyua mwana Yozadaki, nu mu manda yakwe Nehemiya umulasi na Ezila simapepo nupya kakopolola.*
27 Pa kuzevya kwa kupeela iviumba vya Yelusalemu, yalonzile Aina Levi nu kuyatwala uku Yelusalemu kufuma umu ncende zyonsi zino ikalangamo pakuti yakazevye ukuzevya kwa kupeela iviumba ala yali ni nsansa, nu kwimba inyimbo zya kutaizya, alino nu kulizya iviwaya,* ya banjo, na mazeeze.
28 Nupya ya kimba asambiliziwa* yakolongine ukufuma umu citungu,* nu kufuma umu Yelusalemu monsi, kufuma mu mizi ya Ina Netofa,
29 kufuma umu Beti-giligali, nu mu Geba, nu mu Azimaveti, pano ya kiimba yakuuzile imizi ukuzinguluka Yelusalemu yonsi.
30 Nupya ya simapepo na Ina Levi yaisangulwile, yasangulwile na antu, impongolo, ni ciumba.
31 Lyene natwazile ya cilolo ya Yayuda papela ya ciumba nupya nasonsile na maumba yakwe ya kimba yaili akalamba alino na maumba aakuti yayalondela, iumba lyonga lyapitilanga ukwi lunji pa ciumba ukulungama uku Mpongolo ya Mutumba wa Vikona.
32 Hosyaya na afu wakwe ya cilolo ya Yayuda yayalondelanga,
33 kumwi na Azaliya, Ezila, Mesyulamu,
34 Yuda, Benjamini, Syemaya, na Yelemiya.
35 Ya mwana ya simapepo yamwi aali pamwi nayo ala yali na mapenga aeya: Zekaliya mwana Yonatani mwana Syemaya mwana Mataniya mwana Mikaya mwana Zakuli mwana Asafu,
36 na ina yakwe, kuli kuti Syemaya, Azaleli, Milalai, Gilalai, Maai, Netaneli, Yuda, na Hanani, nupya yaali ni vilimba vya kulizizyako inyimbo vyakwe Devedi umuntu wakwe Leza wa cumi; na Ezila kakopolola* wayakolelile.
37 Lino yafisile pa Mpongolo ya Kafukoka yalungime uku masitepu ya musumba wakwe Devedi umupiipi na pa kukwelela iciumba icayelile papela ya ng’anda yakwe Devedi nupya yafisile uku Mpongolo ya Manzi ku ufumondaka.
38 Iumba lyuze lyakwe ya kiimba ya nyimbo zya kutaizya yalungime uku ntunga yuze,* nupya nemo pamwi na afu wa yantu yonsi asyala twalilondile, lyapisile nu kuyapuzya iciumba icali papela ya Lupungu Lwa Vitofu nupya lyapisile uku Ciumba Icisaalale
39 Lyapisile papela ya Mpongolo yakwe Efulemu na pa Mpongolo ya Musumba wa Mpiti na pa Mpongolo ya Nswi, pa Lupungu Lwakwe Hananeli, nu Lupungu Lwakwe Meya, alino na pa Mpongolo ya Mfwele, lyene lyaile ilimilila pa Mpongolo Yakwe ya Kalinda.
40 Lyene maumba yaili yakwe ya kiimba aimbanga inyimbo zya kutaizya imilile pa nkoleelo ya ng’anda yakwe Leza wa cumi; nani kwene na afu wa yalasi yano twali nayo twacisile vivyo kwene,
41 pamwi na ya simapepo, kuli kuti Eliyakimu, Maaseya, Miniyamini, Mikaya, Elioenai, Zekaliya, na Hananiya, ale yalemile na mapenga,
42 paali na Maaseya, Syemaya, Elieza, Uzi, Yeoanani, Malikiya, Elamu, na Ezeli, nupya ya kimba imbanga ni izwi ilikalamba ala yakutungululwa na Izilaya.
43 Pa wanda uuwa yapeezile malambo aingi sana nupya yasansamwike, pano Leza wa cumi walenzile ukuti yasansamuke sana. Anaci na ana nayo kwene yasansamwike icakuti ukusansamuka ukwali umu Yelusalemu kuvwikanga ukufika nu kutali.
44 Pa wanda uuwa aonsi yasonsilwe aakwangalila mang’anda umwa kusungila imisangulo, ivyakulya ivyatandikilapo ukuzombolwa, alino ni vikumi. Nupya amuno yasungilanga ni vyakulya vino yazombola umu misumba ino yalimangamo ivya kupeela ya simapepo na Ina Levi wakwe vino masunde yalanzile, pano kwali ukusansamuka umu Yuda pa mulandu wakuti ya simapepo na Ina Levi yaombanga.
45 Nupya ya simapepo na Ina Levi yatandike ukuomba imilimo yakwe Leza wao alino ni milimo ya kusangulula ino yapeezilwe, ukulingana na vino Devedi nu mwanakwe Solomoni yalanzile, vikwene avino ya kimba na alinzi ya pa mpongolo nayo kwene yacitanga lino yakuomba imilimo yao.
46 Mpiti umu manda yakwe Devedi na Asafu kwayanga aatungululanga ya kimba alino na aatungululanga umu nyimbo zya kulumbanya nu kutaizya Leza.
47 Mu manda yakwe Zelubabeli nu mu manda yakwe Nehemiya, Aina Izlaeli yonsi yapeelanga ya kimba umusangulo na alinzi ya pa mpongolo ukulingana na vino yalondekwanga cila wanda. Nupya yapaatulangapo umusangulo umwi uwa kupeela Aina Levi, Aina Levi nayo yapaatulanga umusangulo uwa kupeela amu lupwa lwakwe Aloni.
Mafutunoti
^ Cikaloleka kwati umu mazwi ya Ciebele yafumyapo izina paa.
^ Nanti “kalemba.”
^ Ivyela vino yakapumanya pa kulizya.
^ Mu Ciebele: “Ya mwana ya kiimba.”
^ Kuli kuti citungu icazingulwike Yodani.
^ Nanti “kalemba.”
^ Nanti “uku nkoleelo.”
