Nehemiya 13:1-31
13 Pa wanda uuwa ibuku lyakwe Mose lyabelenzilwe ala na antu yakuvwako, nupya yazanyile ivyalemvilwemo ukuti, kusi Umwina Amoni nanti Umwina Moabu aalinzile ukuya pa yantu aakapepa Leza wa cumi,
2 pano yataapeezile Aina Izlaeli mukate na manzi lelo yalipiile Balamu kuti ayatiipe. Nomba Leza witu wasenwile icitiipu ukuya ipaalo.
3 Lino yuvwile sile isunde lii, yatandike ukupaatula antu yonsi amu nko ukufuma umu Ina Izlaeli.
4 Lino cii citatala cacitika, simapepo uwangalilanga imiputule ya kusungilamo ivintu* iya mu ng’anda yakwe Leza witu, wali a Eliyasyibu lupwa wakwe Tobya.
5 Eliyasyibu wapeezile Tobya umuputule ukalamba uwa kusungilamo ivintu* uno uku cisila waomviwanga ukusungilamo upe wa vyakulya, upe wa vinunkile, iviya, ni cikumi ca vyakulya, waini umupya, na mafuta, vino Aina Levi, ya kiimba, alino na alinzi ya pa mpongolo yaomvyanga, kumwi nu musangulo wakwe ya simapepo.
6 Pa nsita yii yonsi ntali umu Yelusalemu, pano naile uku mwene umu mwaka uwalenga 32 uwa kuteeka kwa Mwene Alitakisesi uwa ku Babiloni; nupya lino papisile insita, nalenzile umwene ukuti ntale imfumepo.
7 Lyene naile uku Yelusalemu nupya naile indola icintu icipisye cino Eliyasyibu wacisile, kuli kuti ukupeela Tobya umuputule wa kusungilamo ivintu mu musolo wa ng’anda yakwe Leza wa cumi.
8 Cii cansosizye sana, fwandi nasumvile iviya vyonsi vino Tobya wisile umu muputule wa kusungilamo ivintu.*
9 Pa cisila, napeezile isunde lyakuti yazifye imiputule ya kusungilamo ivintu;* nupya naswilizyemo iviya vya mu ng’anda yakwe Leza wa cumi kumwi nu upe wa vyakulya, alino nu upe wa vinunkile.
10 Nupya nazanyile ukuti yata ukupeela Aina Levi misangulo ino yapeelwanga, fwandi Aina Levi na ya kimba aombanga umulimo yapisile, cila muntu waile umu kulima icalo cakwe.
11 Nakalipile alasi nu kuyanena inti: “U mulandu ci uno ing’anda yakwe Leza wa cumi yatilekeleziwa?” Lyene nakolonganike aapisile nu kuyaswilizya uku milimo ino yaombanga.
12 Nupya Ayuda yonsi yatwazile icikumi ca vyakulya, waini umupya, na mafuta uku miputule iya kusungilamo ivintu.
13 Lyene nasonsile Syelemiya simapepo, Zadoki kakopolola,* na Pedaiya ukufuma umu Ina Levi, pakuti yaangalila imiputule ya kusungilamo ivintu, nupya Hanani mwana Zakuli mwana Mataniya wali a kaazwa wao, pano aonsi yaa yayalolanga ukuti yaali aatailwe. Wali umulimo wao uwa kwankanya imisangulo uku ina yao.
14 Si unjiusye we Leza wane pali cii, nupya utilila ukutemwa kwa cumi kuno nalanga uku ng’anda yako alino nu ku milimo iikaombwapo.
15 Mu manda yaya naweni antu umu Yuda yakufena imyangazi pa wanda wi Sabata, ala yakutuulika ingaano umu mitumba nu kuzisendela pali ya punda, nupya yatwalanga waini, imyangazi, masamvu, ni vintu vipusanepusane umu Yelusalemu pa wanda wi Sabata. Fwandi nayacelwile ukuti yatalinzile ukukazya ivintu vivyo pa wanda uuwa.
16 Nupya Aina Tuli aikalanga umu musumba uwa Yelusalemu yaletanga inswi ni vintu vyuze ivipusanepusane ivya kukazya, yavikazyanga uku yantu aikalanga umu Yuda nu mu Yelusalemu pa wanda wi Sabata.
17 Lyene nakalipile Ayuda acindikwe nu kuyanena inti: “U mulandu ci uno mukucitila icintu cii iciipe nu kukowezya uwanda wi Sabata?
18 Uzye vikwene asi ali vino ni vikolwe vinu vyacisile, i calenzile nu kuti Leza witu alete intazi zii zyonsi pali sweswe na pa musumba kwene uu? Lyene mukulundako ukali kuli Leza pakuti asokele sana Aina Izlaeli pa mulandu wa kukowezya Isabata.”
19 Lino uku mpongolo zya Yelusalemu ikwatandika sile ukufita ale Isabata litatala lyatandika, nisile isunde ilyakuti ivisaasa vyayalwa. Nupya nalanzile ukuti yatalinzile ukuyula ivisaasa ukufikila lino Isabata lyasila, nisile na aomvi yane yamwi pa mpongolo pakuti kutaaya uwa kwingizya ivili vyonsi pa wanda wi Sabata.
20 Fwandi ya kakala na ya kakazya ya vintu vya misango ipusanepusane yaizi ukunzi ya musumba wa Yelusalemu umuku onga nanti imiku iili.
21 Lyene nayakalipiile inti: “U mulandu ci uno mukulaalila ukunzi ya musumba usiku uu? Ndi cakuti mwaca mwacita vii nupya, ndamuzinga uku maka.” Ukufuma pa nsita kwene iiya yatiile ukwiza pa wanda wi Sabata.
22 Nupya nanenyile Aina Levi ukuti yalinzile yaisangulula lyonsi nu kwiza umu kulinda impongolo pakuti uwanda wi Sabata utwalilile ukuya uwa muzilo. Na pali cikwene we Leza wane, si unjiusye nu kundanga icikuuku pa mulandu nu kutemwa kwako ukwa cumi ukukalamba.
23 Umu manda yaya naweni na Ayuda aatwazile anaci Aina Asyidodi, Aina Amoni, na Ina Moabu.
24 Afu wa yana yao yalandanga Ciasyidodi alino na afu muze yalandanga indimi zipusanepusane izya yantu yauze, nomba pali aliyo patali nanti awenga uwamanyile ukulanda ululimi lwa Yayuda.
25 Fwandi nayakalipile nu kuyatiipa nupya numile aonsi yamwi, nipwile ni inyele zyao nupya nayanenyile inti: “Lapini umwi zina lyakwe Leza ukuti mutalatwalizya ana inu akazyana uku yana yao aonsi nupya mutaleka ana inu aonsi ukutwala ana yao akazyana nanti mwemwe ukuyatwala.
26 Uzye cikwene asi icalenzile Solomoni Umwene uwa Ina Izlaeli ukuyembuka? Umu nko izingi kutaali umwene uwali wakwe aliwe; nupya Leza wakwe wamutemilwe, icakuti wamulenzile ukuya umwene wa Ina Izlaeli yonsi. Nomba aci yano watwazile ukufuma umu nko zyuze yalenzile ukuti ayembuke.
27 Uzye asi ca kuzungusya ukuvwa ukuti imucita icintu ci iciipisye kuli Leza witu pa kutwala anaci ya mu nko zyuze?”
28 Umwana wenga pa yana yakwe Yoiyada mwana Eliyasyibu simapepo mukalamba wizile aya isivyala wakwe Sanibalati Umwina Holoni. Fwandi namuzinzile.
29 Si uwiusye antu yaa we Leza wane, pano yakowezya umulimo wakwe ya simapepo nu upangano wakwe ya simapepo na Ina Levi.
30 Nupya nayasangulwile uku viipe vyonsi vino antu ya mu nko zyuze yalenzile ukuti yaacita, nupya napeezile ya simapepo na Ina Levi imilimo, cila muntu ukulingana nu mulimo uno waombanga,
31 napekinye na aakuti yatwala inkwi pa nsita isoololwe ni vyakulya ivyatandikilapo ukuca.
Si unjiusye, we Leza wane.
Mafutunoti
^ Nanti “imiputule ya kuliilamo.”
^ Nanti “umuputule wa kuliilamo.”
^ Nanti “umuputule wa kuliilamo.”
^ Nanti “imiputule ya kuliilamo.”
^ Nanti “kalemba.”
