Nehemiya 2:1-20
2 Mu mwezi wa Nisani,* mu mwaka uwalenga 20 uwa kuteeka kwa Mwene Alitakisesi, yapekanyizizye umwene waini. Nupya wakwe vino nacitanga lyonsi, natozile waini nu kupeela umwene lelo ntatazile injapo nu ulanda wakwe vino nali pa nsita yii.
2 Fwandi umwene wanguzizye ati: “U mulandu ci uno uyelile nu ulanda lino utalwile? Kufwile kuli ivikukucuzya umu mwenzo.” Lino umwene walanzile vivyo nuvwile sana intete.
3 Lyene nanenyile umwene inti: “Si kawala we mwene! U mulandu ci uno ningakanila ukuya nu ulanda lino umusumba ukwaziikwa ivikolwe vyane ononeka ni mpongolo zyapya?”
4 Umwene nawe wanguzizye ati: “I cani cino ukulonda?” Papo kwene sile napefile kuli Leza wa kwi yulu.
5 Lyene nanenyile umwene inti: “Ndi cakuti cili sile ningo uku mwene nupya ndi cakuti ne muomvi wako natemwikwa kuli wewe, ntume uku Yuda, umusumba umwaziikwa ivikolwe vyane pakuti nkaukuule cipya cipya.”
6 Lyene umwene wanguzizye ala na namwene wataikala umupiipi nawe ati: “Uzye ulwendo lwako lulasenda manda yanga, nupya ulawela lilaci?” Fwandi umwene watemilwe ukuti impite, nupya namunenyile manda yano nali nu kumala.
7 Lyene nanenyile umwene inti: “Ndi cakuti cili ningo uku mwene, leka makalata yalembwe nu kupeelwa kuli nene aakuyapeela alasi aku citungu ca ku mbalama ya Luzi Lwa Yufuleti, pakuti yakanzumilizye ukupita umutende mpaka nkafike uku Yuda,
8 na kalata uwa kuyapeela Asafu aakasunga Umutengo wa Mwene, pakuti akampeele imiti iya kulepulako imbao zya kuomvya ku mpongolo zya ciumba ici tempele, kuviumba vya musumba nu ku ng’anda ino ndaikalamo.” Fwandi umwene wampeezile makalata pano Leza wane wali nani.
9 Naile imfika uku yalasi ya ku citungu icayela uku mbalama ya Luzi Lwa Yufuleti nupya nayapeezile na makalata yano umwene wampeezile. Umwene wampeezile na akalamba ya yasilika na aonsi akwezile pa mfwalasi.
10 Lino Sanibalati Umwina Holoni na Tobya cilolo wa Ina Amoni yuvwile, yasosile sana pa kumanya ukuti umwi wataiza umu kucita icisuma uku Ina Izlaeli.
11 Lyene nafisile umu Yelusalemu, nupya nikazile manda yatatu.
12 Lyene nakatwike usiku, nali sile na aonsi anono, nupya ntaanenyile ali wensi vino Leza wane wanenyile ukucita uku musumba uwa Yelusalemu, nupya ntakweti iciteekwa icili consi suka sile punda wino nakwezilepo.
13 Napisile usiku inja uku Mpongolo ya Mukonko, alino impita uku nkoleelo ya Kafukoka ka Nzoka Ikalamba indungama uku Mpongolo ya Mutumba wa Vikona, nupya naceecesile iviumba vya musumba uwa Yelusalemu ivyaponyile alino ni mpongolo izyapiile.
14 Lyene napisile uku Mpongolo ya Kafukoka nu ku cifula ca mwene nupya kutaali incende kuno punda wino nakwezilepo angapita.
15 Lelo natwalilile ukupita umu mukonko usiku, nupya naceecetanga iviumba, pa cisila naswilile nu kuyaingilila pa Mpongolo ya Mukonko, lyene naswilile uku ng’anda ino nafikiilemo.
16 Alasi yatamanyile kuno naile na vino nacitanga, pano ala ntatala nalanda icili consi uku Yayuda, kuli ya simapepo, uku ntunguluzi, uku yalasi, nu ku yaomvi yonsi asyala.
17 Lyene nayanenyile inti: “Imulola intazi ino tulimo, vino umusumba uwa Yelusalemu ucili ononeka, na vino impongolo zicili zyapya. Lekini tukuule iviumba vya musumba uwa Yelusalemu cipya cipya pakuti umuzewanya uu utatwalilila.”
18 Lyene nayanenyile vino Leza wane wali nani na vino umwene wanenyile. Nayo yaswike iyati: “Lekini tutandike ukukuula.” Fwandi yakomelezyanyizye pakuti yatandike ukuomba umulimo uu usuma.
19 Lino Sanibalati Umwina Holoni na Tobya umulasi wa Ina Amoni alino na Gesyemu Umwina Alabya yuvwile vivyo, yatandike ukututumfya nu kutusaalula ala yakuti: “I vyani vino mukucita? Uzye mukulonda ukupondokela umwene?”
20 Lelo naswike inti; “Leza wa kwi yulu aliwe alatwazwa ukuomba umulimo uu, nupya swe yaomvi yakwe tumatandika ukukuula; lelo mwemo mutakweti insambu zya kupeelwa icili consi, ukulenga nanti ukukwata icili consi umu Yelusalemu.”
Mafutunoti
^ Lolini Ivyeo na Vyuze pa B15.
