Nehemiya 3:1-32
-
Kukuula cipya cipya iviumba (1-32)
3 Eliyasyibu simapepo mukalamba na ina yakwe, kuli kuti ya simapepo yauze yatandike ukukuula Impongolo ya Mfwele. Yaisangulwile nupya isileko ni visaasa; Yaisangulwile suka ukufika uku Lupungu Lwa Meya alino nu ku Lupungu Lwa Hananeli.
2 Lyene antu amu Yeliko yatandike ukukuula ukufumilila pano ya simapepo yafisile nupya palondelile Zakuli mwana Imuli.
3 Ya mwana Hasena yakuuzile Impongolo ya Nswi; yakuzile ukuomvya imbao nupya isileko ni visaasa, maloko, ni vyakufikililako.
4 Lyene pali aliyo palondelile Melemoti mwana Uliya umwana wakwe Hakozi, wazifizye iciumba, nupya palondelile Mesyulamu umwana wakwe Belekiya mwana Mesyezabeli, nawe kwene wazifizye iciumba, uwalondelilepo a Zadoki mwana Baana, nawe kwene wazifizye iciumba.
5 Lyene palondelile Aina Tekoa nayo kwene yazifizye iciumba, lelo ya cilolo yao yakanyile ukuomba nupya yatuvwilile asambazi yao.
6 Yoiyada mwana Paseya na Mesyulamu mwana Besodeya yazifizye Impongolo ya Musumba wa Mpiti; isileko imbao, visaasa, maloko, ni vyakufikililako.
7 Lyene palondelile Melatiya Umwina Gibyoni na Yadoni Umwina Melonoti, yazifizye iviumba, kuli kuti Aina Gibyoni na Ina Mizipa aatungululwanga nu mulasi uwa ku citungu icayela uku Mbalama ya Luzi Lwa Yufuleti.
8 Lyene palondelile Uzieli mwana Haliaya uwali pali ya kengulula yakwe goldi, wazifizye iciumba; nupya palondelile Hananiya uwali pali ya kapanga ya mafuta anunkile, nawe kwene wazifizye iciumba; nupya isile mawe apapatane mu musolo wa musumba umu Yelusalemu kufika uku Ciumba Icisalale.
9 Lyene palondelile Lefaya mwana Huli, cilolo uwangalilanga afu wa citungu ca Yelusalemu, nawe kwene wazifizye iciumba.
10 Lyene palondelile Yedaya mwana Halumafu nawe kwene wazifizye iciumba icalozyanyizye ni ng’anda yakwe, lyene palondelile Hatusyi mwana Hasyabineya nawe kwene wazifizye iciumba.
11 Malikiya mwana Halimu na Hasyubu mwana Pahati-moabu yazifizye iciputulwa na cuze ica ciumba kumwi nu Lupungu Lwa Vitofu.
12 Lyene palondelile Syalumu mwana Haloesyi wino wali a cilolo wa citungu icaputwilwe pakasi ca mu Yelusalemu, nawe kwene wazifizye iciumba, waombiile pamwi na anakwe akazyana.
13 Hanuni na antu aikalanga umu Zanowa yazifizye Impongolo ya Mukonko; yaikuuzile nupya isileko ivisaasa, maloko, ni vyakufikililako, nupya yazifizye iciumba ukuyafika uku Mpongolo ya Mutumba wa Vikona apali mamita umupiipi na 445.*
14 Malikiya mwana Lekabu, wino wali a cilolo wa citungu ca Beti-hakelemu, wazifizye Impongolo ya Mutumba wa Vikona, waikuuzile nu kwikako ivisaasa, maloko, ni vyakufikililako.
15 Syaluni mwana Kolioze cilolo wa citungu ca Mizipa, wazifizye Impongolo ya Kafukoka; waikuuzile nu kwikako ipaala, ivisaasa, maloko, ni vyakufikililako, nupya wazifizye iciumba ca Mufolo wa Cifula umupiipi ni Ncende ya Mwene Iya Kwizizyapo nu kuyafika uku Masitepu aakutentemukila umu Musumba Wakwe Devedi.
16 Lyene palondelile Nehemiya mwana Azibuki, cilolo uwangalilanga afu wa citungu ca Beti-zuli, wazifizye iciumba ukutandikila uku Ncende Zyakwe Devedi Izya Kuziikako kufika uku cifula icakuuzilwe alino nu kufika uku Ng’anda ya Yantu ya Maka.
17 Lyene palondelile Aina Levi, kuli kuti Leumu mwana Bani wazifizye iciumba; nupya palondelile Hasyabiya cilolo wa citungu ca Keila icaputwilwe pakasi, nawe kwene wazifizye icumba umu citungu cino wangalilanga.
18 Lyene palondelile aina yao aazifizye icumba, kuli kuti Bavai mwana Henedadi cilolo uwangalilanga afu wa citungu ica Keila.
19 Nupya palondelile Ezeli mwana Yesyua cilolo wa ku Mizipa, wazifizye iciputulwa cuze ica ciumba icalozyanya nu mulundu uwa kuila umu Muputule wa Kusungilamo Ivyanzo pa Lucesi Lwi Linga.
20 Lyene palondelile Baluki mwana Zabai, wacincile pa kuomba nupya wazifizye iciputulwa cuze ica ciumba, kutandikila uku Lucesi Lwi Linga kufika uku mulyango wa ng’anda yakwe Eliyasyibu simapepo mukalamba.
21 Melemoti mwana Uliya umwana wakwe Hakozi nawe wazifizye iciputulwa cuze ica ciumba, kutandikila pa mulyango wa ng’anda yakwe Eliyasyibu kufika pa mpela ya ng’anda yakwe Eliyasyibu.
22 Nupya palondelile ya simapepo, kuli kuti aikalanga umu citungu ca Yodani, yazifizye iciumba.
23 Lyene palondelile Benjamini na Hasyubu, yazifizye iciumba icalozyanyizye ni ng’anda yao. Nupya palondelile Azaliya mwana Maaseya mwana Ananiya, wazifizye iciumba icali umupiipi ni ng’anda yakwe.
24 Lyene palondelile Binui mwana Henedadi wazifizye ciputulwa cuze ica ciumba, kutandikila pa ng’anda yakwe Azaliya kufika pa Lucesi Lwi Linga nu kufika pa koona.
25 Lyene palondelile Palali mwana Uzai wazifizye iciumba icalozyanyizye nu Lucesi Lwi Linga alino nu lupungu ulwa ku ng’anda ya Mwene,* nupya palondelile Pedaiya mwana Palosyi.
26 Nupya aomvi ya pi tempele* aikalanga umu Ofeli yazifizye iciumba ukufika uku Mpongolo ya Manzi iyayelile uku ufumondaka nu lupungu ulutali.
27 Lyene palondelile Aina Tekoa yazifizye iciputulwa cuze ica ciumba kutandikila umupiipi nu lupungu ulutali ukufika uku ciumba ca Ofeli.
28 Ya simapepo yazifizye iciumba icali papela ya Mpongolo ya Mfwalasi, cila muntu wazifizye iciumba icalozyanyizye ni ng’anda yakwe.
29 Lyene palondelile Zadoki mwana Imeli wazifizye iciumba icalozyanyizye ni ng’anda yakwe.
Lyene palondelile Syemaya mwana Syekaniya uwalindanga Impongolo ya ku Ufumondaka, nawe kwene wazifizye iciumba.
30 Lyene palondelile Hananiya mwana Syelemiya na Hanuni umwana umonsi wakwe Zalafi uwalenga 6 yazifizye iciputulwa cuze ica ciumba.
Nupya palondelile Mesyulamu mwana Belekiya wazifizye iciumba icalozyanyizye nu muputule wakwe.
31 Lyene palondelile Malikiya uwali pali ya kengulula yakwe goldi, wazifizye iciumba ukufika uku ng’anda ya yaomvi ya pi tempele* na ya kakazya icalozyanyizye ni Mpongolo ya Kuceecetelapo nu kufika uku muputule uwa papela uwayelile pa koona.
32 Ya kengulula yakwe goldi na ya kakazya nayo yazifizye iciumba icali pakasi ka muputule uwa papela uwa pa koona ni Mpongolo ya Mfwele.
Mafutunoti
^ Mu Ciebele: “Makyubiti 1000.” Lolini Ivyeo na Vyuze pa B14.
^ Nanti “isano,” kuli kuti ulwaya umupiipi nu musolo wa yalinzi.
^ Nanti “Aina Netinimu.” Mu Ciebele: “Aapeelwa.”
^ Nanti “Aina Netinimu.” Mu Ciebele: “Aapeelwa.”
