Nehemiya 4:1-23
4 Lino Sanibalati uvwile sile ukuti tu kukuula cipya cipya iciumba, wasosile sana nupya watwalilile ukutumfya Ayuda.
2 Lyene Sanibalati walanzile ala na ina yakwe na asilika ya ku Samaliya yakuvwa, ati: “I vyani vino Ayuda yaa atakwata maka yakucita? Uzye yamaomba umulimo uu yonga? Uzye yalaapeela malambo? Uzye yalamala umulimo uu umu wanda onga? Uzye yalaomvya mawe yaa aali umu mitumba nu kuyalenga yaye vino yaali?”
3 Tobya Umwina Amoni uwimilile umupiipi nawe walanzile ati: “Nanti cakuti nkusa wakwela pa ciumba ca mawe cino ya kukuula, cingapona.”
4 Fwandi napefile inti: “Si uvwa we Leza witu, yakutusaalula, nupya si leka umusaalula wao uye pa mitwe yao nu kuyalenga ukuya wa yantu atiyalemwa nu kusendwa umu uzya.
5 Nupya utavimba pa kuluvyanya kwao nanti ukufuuta imembu zyao, pano iyatuka ya kakuula.”
6 Fwandi twatwalilile ukukuula iciumba, nupya iciumba consi calemenkine, cakuuzilwe cipya cipya ukufika pakasi ukuya umupela, nupya antu yatwalilile ukuomba nu mwenzo onsi.
7 Lino sile Sanibalati, Tobya, Aina Alabya, Aina Amoni, na Ina Asyidodi yuvwile ukuti mulimo wa kuzifya iviumba vya Yelusalemu ukuilako pa nkoleelo, nu kuti yakucilika umwali ivipongo, yasosile sana.
8 Yuvwanine ukuti yazanze Yelusalemu nu kuleta icimvulunganya umu musumba.
9 Lelo twapefile kuli Leza witu, nupya twisile alinzi akulinda umusanya nu usiku.
10 Lelo Ayuda yalandanga yakuti: “Aomvi iyacepelwa maka nupya mawe aingi yacili umu mitumba; tutalakwanisya ukukuula iciumba.”
11 Nupya alwani itu yalandanga yakuti: “Lino yacili ukwiluka nu kutulola, tulaya kuli aliyo nu kuyakoma nu kwimika umulimo.”
12 Lyonsi lino Ayuda aikalanga umupiipi iza, yatunenanga imiku ingi iyati: “Yaliza kuli sweswe ukufuma umu ntunga zyonsi.”
13 Fwandi nisile aonsi aakulinda umu ncende izya pansi izyayelile ukwi tundu lya ciumba pa ncende iyalolekanga sana, nupya naisile ukulingana ni ndupwa. Yaali na ya panga, masumo, na maulapwa.
14 Lino naweni vino yaali ni ntete, lilyo kwene sile nakatwike nu kunena antu aacindikwe, alasi, alino na antu yonsi inti: “Mutayatiina. Iusyini Yeova Leza umukulu nupya uwa kutiinya; nupya lwilini aina inu, ana inu alumendo, ana inu akazyana, ya mama inu alino na mang’anda inu.”
15 Pa cisila cakuti alwani itu yuvwa ukuti vino yacitanga ivimanyikwa kuli sweswe nu kuti Leza wa cumi watavulunganya mapange yao, swensi twaswilile umu kukuula iciumba.
16 Kufuma pa wanda kwene uuwa kuya nu ku nkoleelo, afu wa antu yane aonsi yaombanga, nupya afu wa yantu imililanga ya kulinda ala yalemile masumo, visyangu, maulapwa, na makoti ya mpapa. Nupya ya cilolo yatungililanga amu ng’anda yakwe Yuda yonsi
17 aakuulanga iciumba. Aasendanga iviya ivifine yaombanga umulimo ni ikasa lyonga ala ukwi kasa lyuze iyalema icanzo.
18 Nupya pali yano yakuulanga, cila muntu wikanga ulupanga lwakwe umu musana ala akukuula, nupya kalizya wi penga wimililanga umupiipi nani.
19 Lyene nanenyile antu acindikwe na alasi na antu yonsi asyala inti: “Umulimo uukalamba sana, nupya itusalangana lino tukukuula iciumba.
20 Nga muvwa ipenga lyalila mulinzile ukukolongana nu kwiza kuno. Leza witu amatulwila.”
21 Fwandi twaombanga ala afu wa yantu yauze iyalema masumo, ukutandika uku macaca ukufika manguzi lino intanda zyaloleka.
22 Pa nsita iiya nanenyile antu inti: “Lekini cila muntu kumwi nu muomvi wakwe, yaikala usiku umu Yelusalemu, yaatulinda usiku nupya yaomba umusanya.”
23 Fwandi nemo, kumwi na ina yane, aomvi yane, na alinzi ankonsile, tutazulanga ivyakuzwala, nupya swensi twikalanga ala tuli ni vyanzo ukwi kasa li lunji.
