Nehemiya 6:1-19
6 Lino Sanibalati, Tobya, Gesyemu Umwina Alabya, na alwani itu yonsi asyala yuvwile ukuti imala ukukuula cipya cipya iciumba nu kuti kusi icipongo icaticisyala (nanti cakuti pa nsita iiya ala ntatala nika ivisaasa umu mpongolo),
2 lilyo kwene sile Sanibalati na Gesyemu yatumile mazwi kuli nene aakuti: “Iza tukomenkane umu mizi iyayela umu mukonko uwa Ono.” Nomba yalondanga ukuncitila iciipe.
3 Fwandi natumile aakuti yakayanene yati: “Mulimo uno nkuomba ukulu sana, nupya ntanga nize kuko. Pano nga niza kuko umulimo umaimilila.”
4 Yantumiile mazwi ali yamwi imiku 4 nupya lyonsi nayasukanga ivili vimwi kwene.
5 Lyene Sanibalati watumile umuomvi wakwe kuli nene na mazwi ali yamwi kwene umuku uwalenga 5, ala atasenda kalata iyulwe umu minwe.
6 Muli kalata iiyo mwali mazwi aakuti: “Icuvwika umu yantu ya mu nko, nupya na Gesyemu kwene akulanda ukuti wemo na Ayuda mukulonda ukupondoka. Uli mulandu uno mukukuulila iciumba; nupya ukulingana na mazwi kwene yaa aakuvwika umaya umwene wao.
7 Nupya watusonta ya kasesema aakuti yamanyisye antu umu musumba onsi uwa Yelusalemu ukuti, ‘Umu mpanga iya Yuda muli umwene!’ Nupya umwene witu wasya auvwe api lyasi lii. Fwandi iza tulanzyanye pa mulandu uu.”
8 Lelo namuwezezizye mazwi aakuti: “Kusi nanti acimwi pali vino ukulanda ivyacitika; ukuvyelenganya sile we mwineco.”
9 Pano yonsi yatutiinyanga ala yakuti: “Yalata ukuomba, nupya umulimo utalaombwa.” Fwandi nkupepa, Leza, nkomye.
10 Lyene naile uku ng’anda yakwe Syemaya mwana Delaya umwana wakwe Meetabeli pa nsita ino wikalanga sile umu ng’anda. Wanenyile ati: “Leka tukakomaane pa ng’anda yakwe Leza wa cumi, mukasi ki tempele, nupya tukayaleko ni visaasa pano yakwiza umu kukukoma. Yakwiza umu kukukoma ilelo usiku.”
11 Lelo naswike inti: “Uzye umuntu uwaya wakwe nene angutuuka? Uzye umuntu uwaya wakwe nene angingila umwi tempele nu kutwalilila ukuya nu umi? Nsikuyamo!”
12 Lyene nilwike ukuti Leza asi aliwe wamutumile, lelo Tobya na Sanibalati aamulipiile pakuti aize alande usesemo uu pali nene.
13 Yaamulipiile pakuti aize antiinye nu kuleka ukuti njembuke, pakuti yanzewanye nu kunsaalula.
14 We Leza wane, si iusya Tobya na Sanibalati ni vicitwa vyao, alino na Noadiya kasesema umwanaci kumwi na ya kasesema yauze asyala aezyanga ukuntiinya lyonsi.
15 Fwandi iciumba casizile pa wanda uwalenga 25 mu mwezi wakwe Eluli,* umu manda 52.
16 Lino alwani itu yonsi yuvwile ukuti iciumba casila nupya lino inko zyonsi izyatuzingulwike zyalola vivyo, yuvwile sana insonyi, nupya iilwike ukuti Leza u wazwilizye pakuti umulimo uu uombwe.
17 Umu manda yaya Ayuda acindikwe yatumanga makalata aingi kuli Tobya, nawe wayasukanga.
18 Antu aingi umu Yuda yalavile ukuti yamatungililanga Tobya pano wali a isivyala wakwe Syekaniya mwana Ala, nupya Yeoanani umwanakwe, watwazile umwana umukazyana wakwe Mesyulamu mwana Belekiya.
19 Lyonsi yanenanga ivisuma pali Tobya nupya nawe yamunenanga vino nalandanga. Lyene nawe wantumilanga makalata aakuntiinya.
Mafutunoti
^ Lolini Ivyeo na Vyuze pa B15.
